حالىق گازەتى، 28 – قازان، بەيجيڭ. مەملەكەتتىك حالىق قۇرىلتايى تۇراقتى كوميتەتىنىڭ باستىعى جاڭ دىجياڭ 28 – قازاندا حالىق قۇرىلتايى سارايىندا قازاقستان پارلامەنت ءماجىلىسى ءتوراعاسىنىڭ ورىنباسارى نازاربايەۆامەن كەزدەستى.
جاڭ دىجياڭ بىلاي دەدى: قازاقستان جۇڭگونىڭ تاتۋ كورشىسى جانە جالپى بەتتىك ستراتەگيالىق سەرىگى. ءتوراعا شي جينپيڭ مەن نازاربايەۆ زۇڭتۇڭ كوپ رەت كەڭەس وتكىزىپ، شىنايى دوستىق ورناتتى، ەكى جاق اراسىنداعى قارىم – قاتىناستى كۇشەيتۋ تۋرالى كوپتەگەن ماڭىزدى تۇيىندەردە ورتاق تانىمعا كەلدى. جۇڭگو مەملەكەتتىك حالىق قۇرىلتايى قازىرگى نەگىزدە قازاقستان پارلامەنتىمەن دوستىق قارىم – قاتىناستى اناعۇرلىم كۇشەيتۋدى، زاڭ جاساۋ، ەلدى باسقارۋ قاتارلى جاقتاردا تاجىريبە اۋىستىرۋدى، ءار ەكى جاقتىڭ ءوز ەلدەرىندەگى زاڭ – ءتۇزىم قۇرىلىسىن ىلگەرىلەتىپ، گۋمانيتارلىق سالاداعى قارىم – قاتىناستى بەلسەنە جەبەپ، ەكى جاقتىڭ جىبەك جولى ەكونوميكالىق بەلدەۋىن كوركەيتۋ جانە ەنەرگيا، نەگىزدىك قۇرىلعى قاتارلى سالالارداعى سەلبەستىگىن كۇشەيتۋ ءۇشىن ويداعىداي زاڭ – ءتۇزىم ورناتىلعان ورتا جاراتۋدى قالايدى. قازاقستاننىڭ تۇڭعىش پرەزيدەنتىنىڭ اتىنداعى قور قوعامى مەن جۇڭگونىڭ شەتەلدەرمەن دوستىق قوعامى قاتارلى قۇرىلىمداردىڭ رولىن تولىق ساۋلەلەندىرىپ، جۇڭگو – قازاقستان دوستىعىنىڭ حالىقتىق نەگىزىن نىعايتۋىمىز كەرەك.
نازاربايەۆا قازاقستان پارلامەنت ءماجىلىسىنىڭ جۇڭگو مەملەكەتتىك حالىق قۇرىلتايىمەن جالپى بەتتىك سەلبەستىكتى نىعايتۋدى، قازاقستان مەن جۇڭگو قارىم – قاتىناسىن جاڭا بەلەسكە كوتەرۋدى قالايتىندىعىن ءبىلدىردى.
كەلۋ قاينارى: حالىق تورابى