مەملەكەت ءتوراعاسى شي جينپيڭ 2017 – جىلعى جاڭا جىلعا ارنالعان قۇتتىقتاۋ ءسوزىن جاريالادى

2017.01.01 11:20   كەلۋ قاينارى : حالىق تورابى

　　

　　حالىق تورابى اۋداردى. شينحۋا اگەنتتىگى، 31 – جەلتوقسان، بەيجيڭ. مەملەكەت ءتوراعاسى شي جينپيڭ جاڭا جىل قارساڭىندا جۇڭگو حالىقارالىق راديو ستانسياسى، ورتالىق حالىق راديو ستانسياسى، ورتالىق تەلەۆيزيا ستانسياسى، جۇڭگو حالىقارالىق تەلەۆيزيا ستانسياسى (جۇڭگو عالامدىق تەلەۆيزيا تورابى) جانە ينتەرنەت ارقىلى 2017 – جىلعى جاڭا جىلعا ارنالعان قۇتتىقتاۋ ءسوزىن جاريالادى. تولىق ءماتىنى مىناداي:

　　2016 – جىلدى اتتاندىرعالى تۇرمىز، جاڭا جىل قوڭىراۋى دا سوعىلۋ الدىندا تۇر. كونە جىلعا قوش ايتىپ، جاڭا جىلدى قارسى الار مەرەيلى ساتتە، بۇكىل ەلىمىزدەگى ءار ۇلت حالقىنا، شياڭگاڭ ەرەكشە اكىمشىلىك رايونىنداعى باۋىرلاستارعا، اۋمىن ەرەكشە اكىمشىلىك رايونىنداعى باۋىرلاستارعا، تايۋاندىق باۋىرلاستارعا جانە شەتەلدەگى باۋىرلاستارعا، الەمنىڭ ءارقايسى ەلدەرى مەن رايوندارىنداعى دوستارعا جاڭا جىل قۇتتى بولسىن ايتامىن!

　　2016 – جىل جۇڭگو حالقى جونىنەن تاماشا ءارى ۇمىتىلماس جىل بولدى، بۇلاي دەيتىنىمىز: «13 – بەسجىلدىق» ءساتتى باستالدى. ءبىز جاڭاشا دامۋ تانىمىن امالياتتا بەلسەندىلىكپەن ايگىلەپ، جاپپاي دوڭگەلەك داۋلەتتى قوعام قۇرىپ شىعۋ اياق الىسىن تەزدەتىپ، ەلىمىز ەكونوميكاسىنىڭ ارتۋىنىڭ جالعاستى الەمنىڭ الدىڭعى قاتارىنان كورىنۋىن ىلگەرىلەتتىك. ءبىز رەفورمانى جاپپاي تەرەڭدەتۋدى بەلسەنە ىلگەرىلەتىپ، قامداۋ جاعىنداعى قۇرىلىمدىق رەفورمادا ماڭىزدى قادام تاستادىق، مەملەكەت قورعانىسى مەن ارميا رەفورماسى جاعىندا كەلەلى تابىسقا قول جەتكىزدىك، ءتۇرلى سالالاردا رەفورمانىڭ ارقاۋ سيپاتتى تۇلعالىق قۇرىلىمىن نەگىزىنەن تۇراقتاندىردىق. ءبىز مەملەكەتتى جاپپاي زاڭمەن باسقارۋدى بەلسەنە ىلگەرىلەتىپ، ءادىليالىق ءتۇزىلىس رەفورماسىن تەرەڭدەتىپ، ءادىليانىڭ ادىلدىگىن كۇش سالا ىلگەرىلەتىپ، قوعامدىق تەڭدىك پەن ادىلدىكتى كۇش سالا قورعادىق. پارتيانى جاپپاي قاتاڭ وڭاۋدى بەلسەنە ىلگەرىلەتىپ، «جولبارىس سوعۋ مەن شىبىن قاعۋدان» بۇلجىماي، ساياسي ەكولوگيانى ۇزدىكسىز كىرشىكسىزدەندىرىپ، پارتيا ستيلىن، اكىمشىلىك ستيلدى، قوعامدىق ستيلدى ۇزدىكسىز جاقسارتتىق.

　　2016 – جىلى «جۇڭگونىڭ عارىش كوزى» سالىنىپ بولىپ، ىسكە قوسىلدى، «ۋكۇڭ» جاساندى سەرىگى وربيتاعا شىعارىلعالى ءبىر جىل بولدى، «موزى» جاساندى سەرىگى عارىشقا ۇشىرىلدى، «شىنجوۋ – 11» مەن «تيانگۇڭ – 2» عارىشتى شارلادى، جۇڭگونىڭ وليمپيادا ساڭلاقتارى كەسەك ناتيجەلەرگە قول جەتكىزدى، جۇڭگو ايەلدەر ۆالەيبول كومانداسى 12 جىلدان كەيىن وليمپيادانىڭ ەڭ جوعارى سيلىق مىنبەسىنە قايتا كوتەرىلدى... مۇنان سىرت، رەفورمالاۋ ارقىلى اۋىل – قىستاقتان ويىسقانداردىڭ قالا تۇرعىنىنا اينالۋى اناعۇرلىم قولايلى بولدى، كوپتەگەن كەدەي رايونداردا بالالاردىڭ وقۋعا ءتۇسۋ شارت – جاعدايى جاقساردى، بۇقارالار سىرت جەردە ءجۇرىپ ازاماتتىق كۋالىگىن بىتىرگەندە اۋىلىنا بارىپ - كەلىپ شاپقىلامايتىن بولدى، ۇزاق ۋاقىت نوپوسسىز جۇرگەندەر نوپوسقا تىركەلە الاتىن بولدى، كوپتەگەن بۇقارا وتباسىلىق شيپاگەرگە يە بولدى، ءاربىر وزەنگە «وزەنباسىلارىن» سايلادىق ... وسىلاردىڭ بارلىعى كوڭىلىمىزگە جۇبانىش سيلادى.

　　2016 – جىلى كورىكتى شيزى كولىنىڭ جاعاسىندا 20 ەل توبى باسشىلارىنىڭ 11 – رەتكى ءماجىلىسىن وتكىزىپ، دۇنيەگە جۇڭگونىڭ اقىل – پاراساتى مەن جۇڭگونىڭ جوباسىن ۇسىنۋدان سىرت، دۇنيە جۇزىنە جۇڭگونىڭ ءارلى اسەرى مەن كوركەم كەلبەتىن تانىتتىق. «ءبىر بەلدەۋ، ءبىر جول» قۇرىلىسىن جەدەل ىلگەرىلەتىپ، ازيا نەگىزدىك قۇرىلعىلاردى قارجىلاندىرۋ بانكەسى رەسمي اشىلدى. ءبىز بەيبىتشىلىك پەن دامۋعا تاباندى بولىپ، تەرريتوريا ۇقىعى مەن تەڭىز – مۇحيتتاعى ۇقىق – مۇددەمىزدى باتىل قورعادىق. جۇڭگو حالقى كىمدە – كىمنىڭ بۇل ماسەلەدە پالە شىعارۋىنا مۇلدە جول بەرمەيدى!

　　وسى ءبىر جىلدا كوپ جەردە تابيعي اپاتتار مەن ءوندىرىس حاۋىپسىزدىگىنە ساياتىن شىرعالاڭدار تۋىلىپ، حالىقتىڭ ءومىرى مەن مال – مۇلكىنە جانە ءوندىرىسى مەن تۇرمىسىنا اۋىر زيان سالدى، بۇعان قاتتى قايعىردىق. جۇڭگونىڭ بىتىمگەرشىلىك قوسىنىنداعى بىرنەشە جولداس ەرلىكپەن قۇربان بولىپ، دۇنيە ءجۇزىنىڭ بەيبىتشىلىگى ءۇشىن قىمباتتى ومىرلەرىن قيدى، ولاردى ەسكە الامىز، ولاردىڭ جاناشىرلارىنا ويداعىداي قامقورلىق جاساۋىمىز كەرەك.

　　2016 – جىلى ءبىز جۇڭگو كوممۋنيستىك پارتياسى قۇرىلعاندىعىنىڭ 95 جىلدىعىن سالتاناتپەن قۇتتىقتادىق، جۇڭگو جۇمىسشى – ديحان قىزىل ارمياسىنىڭ ۇزاق جورىق جەڭىسىنىڭ 80 جىلدىعىن ەسكە تۇسىردىك، ءبىز جۇڭگو حالقى مەن جۇڭحۋا ۇلتتارىنا ۇلەس قوسقان اعا بۋىندى ەستە بەرىك ساقتاپ، ءتۇپ ماقساتتى ۇمىتپاي، ۇزدىكسىز العا باسۋىمىز كەرەك.

　　«جاڭا مەن كونە الماسىپ وتىرادى، ۋاقىت كوشى ايالدامايدى». الدا كەلە جاتقان 2017 – جىلى جۇڭگو كوممۋنيستىك پارتياسىنىڭ 19 – قۇرىلتايى اشىلادى، جاپپاي دوڭگەلەك داۋلەتتى قوعام قۇرىپ شىعۋ، رەفورمانى جاپپاي تەرەڭدەتۋ، مەملەكەتتى جاپپاي زاڭمەن باسقارۋ، پارتيانى جاپپاي قاتاڭ وڭاۋ جاعىندا ۇزدىكسىز كۇش سالۋىمىز كەرەك. «الما ءپىس، اۋىزىما ءتۇس» دەمەي، قۇلشىنعاندا عانا ارماندى ىسكە اسىرۋعا بولادى.

　　دوڭگەلەك داۋلەتتى قوعام قۇرۋ جولىندا ەشكىم دە قاتاردان قالماۋى كەرەك! ءبىر جىلدان بەرى، تاعى دا 10 ميلليوننان استام ادام كەدەيلىكتەن قۇتىلدى، كەدەيلىكتەن قۇتىلدىرۋدا قامال الۋدىڭ العى شەبىندە كۇرەسىپ جاتقان جولداستار، جاپا شەكتىڭىزدەر، مەن بۇل جولداستارعا قۇرمەت بىلدىرەمىن. جاڭا جىل قارساڭىندا، مەن قيىنشىلىعى بار بۇقارانىڭ قارنى توق پا، ءۇيى جىلى ما، ولار جاڭا جىلدى، شاعاندى ويداعىداي تويلاي الار ما ەكەن دەپ ەرەكشە الاڭدايمىن. ءىشىنارا بۇقارانىڭ كاسىپتەنۋ، پەرزەنتتەرىن وقۋعا بەرۋ، ەمدەلۋ، باسپانا قاتارلى جاقتاردا قيىنشىلىقتارى بار ەكەنىن بىلەمىن، بۇل ماسەلەلەردى جالعاستى شەشىم ەتۋ ــ پارتيا مەن ۇكىمەتتىڭ باس تارتپاس مىندەتى. بۇكىل پارتياداعىلار، بۇكىل قوعامداعىلار كەدەيلەر مەن قيىنشىلىعى بار بۇقاراعا ۇزدىكسىز كوڭىل ءبولۋى، رەفورما مەن دامۋ جەمىستەرى اناعۇرلىم كوپ بۇقارانى يگىلىككە كەنەلتۋى، حالىقتىڭ تۇرمىسىن اناعۇرلىم باياشات ەتۋىمىز كەرەك.

　　«جۇمىلا كوتەرگەن جۇك جەڭىل». ءبىر ميلليارد 300 ميلليوننان استام حالقىمىز ءبىر نيەتپەن بىلەك بىرىكتىرسە، پارتيامىز ماڭگى حالىقپەن بىرگە بولسا، بارلىعىمىز بىلەك سىبانىپ، قايراتتانا قىزمەت ىستەسەك، ءبىزدىڭ ءداۋىرىمىزدىڭ ۇزاق جورىعىن ويداعىداي باسا الامىز.

　　جۇڭگولىقتار ەجەلدەن «الەم حالقى ۇلى بىرلىكتى كوكسەيدى، كۇللى ادامزات ءبىر ءۇيلى جانداي» دەگەن ۇستانىمدى دارىپتەيدى. جۇڭگو حالقى ءوز قامىن عانا ويلاپ قالماستان، ءار ەل حالقىنىڭ دا جاقسى تۇرمىسقا كەنەلۋىن تىلەيدى. قازىر سوعىس پەن كەدەيلىك ءبىر ءبولىم مەملەكەتتەر مەن رايونداردى قىسپاعىنا الۋدا، اۋرۋ مەن اپات تا ءالسىن – ءالسىن ادامدارعا ويران سالۋدا. مەن حالىقارالىق قوعامنىڭ سەلبەسە وتىرىپ، ادامزات ــ تاعدىرلاس ورتاق تۇلعا دەگەن تانىمدى ۇستانىپ، عالامشارىمىزدى اناعۇرلىم بەيبىت، اناعۇرلىم وركەندەگەن عالامشار ەتىپ قۇرىپ شىعۋىن شىن جۇرەكتەن ءۇمىت ەتەمىن.

　　سەنىم مەن ۇمىتكە تولى كوڭىلمەن جاڭا جىل قوڭىراۋىن بىرگە قارسى الايىق!

　　كوپشىلىككە راحمەت.

　　كەلۋ قاينارى: حالىق تورابى