بەنزين مەن سالەركانىڭ باعاسى بيىل العاش رەت ارزانداتىلدى

2021.04.01 13:23   كەلۋ قاينارى : حالىق تورابى

　　شينحۋا اگەنتتىگىنىڭ تىلشىلەرى داي شياۋحى، ان پەي 3 – ايدىڭ 31 – كۇنى بەيجيڭنەن حابارلايدى. بەنزين مەن سالەركانىڭ باعاسى بيىل ۇزدىكسىز توعىز رەت قىمباتتاعان سوڭ، تۇڭعىش رەت ارزانداتىلدى. مەملەكەتتىك دامىتۋ – رەفورمالاۋ كوميتەتىنىڭ 3 – ايدىڭ 31 – كۇنى ايتۋىنشا، جۋىردان بەرگى حالىقارالىق بازارداعى مۇناي باعاسىنىڭ وزگەرىسىنە نەگىزدەلە وتىرىپ، قازىر اتقارىلىپ وتىرعان وڭدەلگەن مۇناي باعاسىن قالىپتاستىرۋ مەحانيزمىنە ساي، 3 – ايدىڭ 31 – كۇنى ساعات 24 تەن باستاپ، ەل ىشىندەگى بەنزين مەن سالەركانىڭ باعاسى ءار تونناسىنا جەكە – جەكە 225 يۋان جانە 220 يۋان ارزانداپ، ءار ليترىنە شاققاندا 20 تيىن ارزاندادى.

　　مەملەكەتتىك دامىتۋ – رەفورمالاۋ كوميتەتىنىڭ قاتىستى جاۋاپتىسىنىڭ ايتۋىنشا، جۇڭگو مۇناي سەرىكتەستىگى، جۇڭگو مۇناي – حيميا سەرىكتەستىگى، جۇڭگو تەڭىز مۇنايى سەرىكتەستىگى سىندى ءۇش ءىرى سەرىكتەستىك وڭدەلگەن مۇنايدى ءوندىرۋ جانە تاسىمالداۋدى ويداعىداي ۇيىمداستىرىپ، بازاردى ورنىقتى قامداۋعا كەپىلدىك ەتۋى، مەملەكەتتىڭ باعا ساياساتىن قاتاڭ اتقارۋى كەرەك. جەر – جەردەگى قاتىستى تاراۋلار بازاردى باقىلاۋ – باسقارۋ مەن تەكسەرۋ تەبىنىن ارتتىرىپ، مەملەكەتتىڭ باعا ساياساتىن اتقارماۋ ارەكەتتەرىن قاتاڭ انىقتاپ، ءبىرجاقتى ەتۋى، قالىپتى بازار ءتارتىبىن قورعاۋى كەرەك. تۇتىنۋشىلاردىڭ دا 12315 تەكشەسى ارقىلى باعاعا قاتىستى زاڭعا قايشى ارەكەتتەردى اشكەرەلەۋىنە بولادى.

　　وسى رەتكى وڭدەلگەن مۇناي باعاسىن رەتتەۋ مەزگىلىندە، حالىقارالىق بازارداعى شيكىزاتتىق مۇنايدىڭ باعاسى زور مولشەردە تومەندەگەن. مەملەكەتتىك دامىتۋ – رەفورمالاۋ كوميتەتىنىڭ باعانى باقىلاۋ – باسقارۋ ورتالىعى ساراپتاۋ ارقىلى بىلاي دەپ قاراعان: شەتەلدەگى ىندەتتەن ساقتانۋ – تىزگىندەۋ جاعدايىنىڭ قايتادان كۇردەلىلەسە تۇسۋىنە بايلانىستى، بازاردىڭ وسىنىڭ الدىنداعى دۇنيە جۇزىلىك ەكونوميكانىڭ قايتا جاندانۋىنا جاساعان ۇمىتكە تولى بولجامىندا ازداپ سالقىن قاراۋ بايقالعان، قىسقا مەرزىم ىشىندە ەل ىشىندەگى مۇناي باعاسىنىڭ تومەندەۋ قىسىمى ازداپ ارتادى دەپ مەجەلەۋگە بولادى.

　　كەلۋ قاينارى: حالىق تورابى