بەتتى ساقتاۋ | باس بەت ەتۋ | حات ساندىعى | حابارلاسىڭىز | ءبىز تۋرالى
حالىق تورابى

كوپ كوڭىلىنەن شىققان ءماندى قيمىل

2013.12.11 16:44   كەلۋ قاينارى : حالىق تورابى

جيىننان جالپى كورىنىس
جيىننان جالپى كورىنىس

  «ىلە كەشى» گازەتىنىڭ ءتىلشىسى ناعيما قۋاتقان قىزى حابارلايدى. ىلە كەشى گازەتى قازاق رەداكسياسى ۇيىمداستىرعان 3 - رەتكى «قارعالداق» اتىنداعى سيلىقتى شىعارما (اۋدارما) باسەكەسىنىڭ سيلىق تاراتۋ جيىنى جەلتوقساننىڭ 7 - كۇنى ىلە گازەتى مەكەمەسىنىڭ جيىن زالىندا بولىپ ءوتتى.

  وسى رەتكى «قارعالداق» اتىنداعى سيلىقتى شىعارما (اۋدارما) باسەكەسى «1 - قازان » مەملەكەت مەرەكەسىن قۇتتىقتاۋ، «8 - قاراشا » جۋرناليستەر مەرەكەسىن قارسى الۋ بايلانىسىمەن،حالىق تورىنىڭ سەلبەسۋىندە موڭعۇلكۇرە اۋدانى اقدالا اۋىلى ورتا قىزىلمويناق مەكتەبى مەن ءۇرىمجى قالاسى التىن ءتىل اۋدارما شەكتى جاۋاپكەرلىك سەرىكتىگىنىڭ دەمەۋىندە وتكىزىلدى. باسەكە كەزىندە جەر - جەردەن 40 تان استام اۋدارما شىعارما تاپسىرىپ الىنىپ، مۇقيات سارالانۋ ارقىلى باعالاۋ ناتيجەسى جەلتوقساننىڭ 4 - كۇنگى ىلە كەشى گازەتىنىڭ قازاقشا باسىلىمىندا جاريالانعان بولاتىن.

  سيلىق تاراتۋ جيىنىن ىلە كەشى گازەتى قازاق رەداكسياسىنىڭ مەڭگەرۋشىسى سەنبەك اۋەسقان ۇلى باسقاردى. جيىندا ىلە كەشى گازەتى مەكەمەسىنىڭ ورىنباسار باس رەداكتورى نۇرجان جانەتقان ۇلى مامانداردىڭ، اۋدارماشىلاردىڭ، قالامگەرلەردىڭ وسى رەتكى قيمىلعا الىس - جاقىننان ارنايى كەلىپ قاتىناسقاندىعىنا ىلە كەشى گازەتى مەكەمەسى اتىنان العىس ايتتى. ول بىلاي دەدى: «گازەتىمىزدىڭ <قارعالداق> اتىنداعى سيلىقتى شىعارما باسەكەسى جانكۇيەر وقىرماندار مەن بىلىكتى قالامگەرلەردىڭ بەلسەنە ات سالىسۋىمەن ءارى دەمەۋشى ورىنداردىڭ قالتقىسىز كومەگىمەن ءۇش جىلدان بەرى ءساتتى وتكىزىلىپ،بارشا قاۋىمنىڭ العىسىنا بولەنىپ كەلەدى. وسى ورايدا بۇرىندى - سوڭدى وسى قيمىلىمىزدى قارجىلاي قولداعان ورىندارعا، قيمىلىمىزدىڭ ءساتتى وتۋىنە سەلبەسكەن حالىق تورىنداعى ازاماتتارعا شىن جۇرەكتەن العىس ايتامىن ءارى بورىشتىلىق بىلدىرەمىن. اسىرەسە، وسى رەتكى <قارعالداق > اتىنداعى سيلىقتى شىعارما (اۋدارما) باسەكەسىنىڭ ءساتتى وتۋىنە قول ۇشىن بەرىپ، دەمەۋشى بولعان موڭعۇلكۇرە اۋدانى اقدالا اۋىلى ورتا قىزىلمويناق مەكتەبىنە جانە ءۇرىمجى قالاسىنداعى التىن ءتىل اۋدارما شەكتى جاۋاپكەرلىك سەرىكتىگىنە، سونداي - اق اتالعان ورىننىڭ جاۋاپتىلارى شەگەن قالماقباي ۇلى مەن ەربول تولەۋ ۇلىنا؛ قانيا نيازقان قىزى مەن اينۇر وراز قىزىنا گازەت ۇيىمى اتىنان العىس ايتامىن».

  نۇرجان جانەتقان ۇلى تاعى گازەتتىڭ وسى رەتكى سيلىقتى شىعارما باسەكەسى، ياعني اۋدارما جارىسى قىركۇيەكتەن قازاننىڭ سوڭىنا دەيىن جۇرگىزىلىپ،ءبىر جارىم اي جالعاسقانىن، جارىستا ەگيپەت جازۋشىسى احمەت ەميننىڭ «كۇن» اتتى شالقىماسى اۋدارىلاتىن شىعارما بولىپ تاڭدالعانىن، ۋاقىت تىعىزداۋ بولسا دا قالامگەرلەر مەن اۋدارماشىلاردىڭ قيمىلعا بەلسەنە ات سالىسقانىن، مۇنىڭ ىشىندە جۇرتقا تانىمال ىسىلعان اۋدارماشىلار دا، ورتا مەكتەپ قۇشاعىنداعى وقۋشىلاردىڭ دا بار ەكەنىن، اسىرەسە، جاڭادان اۋدارماعا ارالاسىپ جۇرگەن جاستاردىڭ بەلسەنە قاتىناسىپ، قولداۋ كورسەتكەنىن اتاپ ءوتتى.

  وسى رەتكى اۋدارماشىلاردىڭ بارلىعى ءبىر تۋىندىنى اۋدارعاندىقتان، ونىڭ ۇستىنە، ءار اۋدارۋشىنىڭ ءوز سلوبى، ءوز مانەرى بولاتىندىقتان باعالاۋدا نەگىزىنەن دالدىك پەن كوركەمدىك ولشەم ەتىلىپ، دۇرىس اۋدارۋ باستى ورىنعا قويىلعان ءارى سول نەگىزدە كوركەمدىكتى جەتكىزۋى قاداعالانعان. ساراپتاۋ ارقىلى 5 تۋىندى جاقسى اۋدارما، 3 تۋىندى 3 - دارەجەلى، 2 تۋىندى 2 - دارەجەلى بولىپ باعالانعان. باس جۇلدە ءتاڭىر تاۋى تورابىنىڭ قىزمەتكەرى قۇرمانگۇل اسپەن قىزىنىڭ ەنشىسىنە بۇيىرعان.

  جيىندا ىلە گازەتى مەكەمەسىنىڭ بۇرىنعى باستىعى بەيىلقان مۇقاش ۇلى، ىلە وبلىستىق راديو- تەلەۆيزيا،مادەنيەت، دەنەتاربيە مەكەمەسى تەلە فيلم اۋدارۋ، جاساۋ ورتالىعىنىڭ مەڭگەرۋشىسى باتىرقان قاسىم ۇلى، ىلە پەداگوگيكا ينستيتۋتى فيلولوگيا ينستيتۋتى بارتيا باس ياچەيكاسىنىڭ شۋجيى سەرىكبول داۋلەتكەلدى ۇلى قاتارلىلار كەزەگىمەن ءسوز الىپ،«ىلە كەشى» گازەتىنىڭ قازاقشا باسىلىمى جارىق كورە باستاعاننان بەرى وندا ىستەپ وتىرعان قىزمەتكەرلەردىڭ ءبىر جاعادان باس، ءبىر جەڭنەن قول شىعارا وتىرىپ قۇلشىنۋىندا، گازەتتى ءوز سيپاتى بويىنشا ويداعىداي شىعارىپ، قالىڭ وقىرماندار مەن اۆتورلاردىڭ القاۋىنا يە بولعاندىعىن، سونىمەن بىرگە، بۇرىندى - سوڭدى «قارعالداق» اتىنداعى ولەڭ باسەكەسى،شاعىن اڭگىمە باسەكەسى، ادەبي اۋدارما باسەكەسى سىندى يگىلىكتى قيمىلداردى وتكىزىپ، قوعامدا جاقسى اڭىس قوزعاعاندىعىن القادى جانە بۇل قيمىلدىڭ مۇنان بىلاي دا وسى بەتالىسپەن جالعاسىن تابا بەرۋىن ءۇمىت ەتتى.

  وسى رەتكى جيىندا اۋدارما باسەكەسىندە اعالاپ العا شىققان قۇرمانگۇل اسپەن قىزى (ءۇرىمجى قالاسى) 1 - دارەجەلى بولىپ 800 يۋانمەن،باقىتبەك نەسىپبەك ۇلى (قۇلجا قالاسى) ، جەڭىس جىكباس ۇلى (التاي) 2 - دارەجەلى بولىپ، جەكە - جەكە 500 يۋانمەن، قۋات جۇماش ۇلى (شاعانتوعاي اۋدانى)، بايتۇرعان دانابەك ۇلى (كۇنەس اۋدانى)، بەكمۇقامەت نۇردانبەك ۇلى (نىلقى اۋدانى) 3 - دارەجەلى سيلىقتى ەنشىلەپ، جەكە - جەكە 300 يۋانمەن سيلانسا، ءدىلنۇر قالامبەك قىزى (نىلقى اۋدانى)، قايرات جولاۋشى ۇلى (التاي قالاسى)، تىلەك سىمان ۇلى (موڭعۇلكۇرە اۋدانى)، جاينا جاقسىلىق قىزى (بۋرىلتوعاي اۋدانى)، ريشات سابىرباي ۇلى (تولى اۋدانى) قاتارلىلاردىڭ اۋدارمالارى جاقسى اۋدارما سيلىعىن ەنشىلەپ، ءار قايسىسى 200 يۋانمەن سيلاندى.

  وسى رەتكى قيمىلدى قولداعان ءۇرىمجى قالاسى التىن ءتىل اۋدارما شەكتى جاۋاپكەرلىك سەرىكتىگى مەن موڭعۇلكۇرە اۋدانى اقدالا اۋىلى ورتا قىزىلمويناق مەكتەبىنە رەداكسيا اتىنان كەستەلى تۋ ۇسىنىلدى.

  جيىندا تاعى سيلانعان اۆتورلار اتىنان باقىتبەك نەسىپبەك ۇلى، بەكمۇقامەت نۇردانبەك ۇلى، تىلەك سىمان ۇلى قاتارلىلار سوزگە شىعىپ، قيمىلدىڭ ۇلتىمىز قالامگەرلەرىنىڭ جاسامپازدىعىنا دەم بەرۋدە ءارى اۋدارما جاسامپازدىعىن دامىتۋدا، مۇنان دا ماڭىزدىسى، جاس تالاپكەرلەردى، ادەبي اۋدارما اۋەسكەرلەرىن باۋلۋدا اسا ماڭىزدى رول اتقارعانىن تىلگە تيەك ەتتى. مۇنان تىس، اۆتورلار تاعى ورتا، باستاۋىش مەكتەپ وقۋشىلارىنا ارنالعان ادەبي تۋىندىلار مەن اۋدارما تۋىندىلارىن جاريالايتىن ارناۋلى ستون اشىپ، جاسامپازدىعىنا دەم بەرۋدى ۇسىنىس رەتىندە ورتاعا سالدى.

  وسى رەتكى قيمىلعا قولداۋ كورسەتكەن موڭعۇلكۇرە اۋدانى اقدالا اۋىلى ورتا قىزىلمويناق مەكتەبىنىڭ مەڭگەرۋشىسى شەگەن قالماقباي ۇلى اسەرلى بەينەدە: «انا تىلىمىزدە جارىق كورىپ وتىرعان وسى گازەت ۇلتىمىز وقىرماندارىنا ءتۇرلى مازمۇنداردا سۇبەلى تۋىندىلاردى ۇسىنۋمەن بىرگە،ءبىلىم، مادەنيەت، ينفورماتسيا تاراتۋدا، اۆتورلاردى باۋلۋدا ءوز رولىن ساۋلەلەندىرىپ كەلەدى. ءبىز كوپتىڭ كوڭىلىنەن شىعىپ كەلە جاتقان ەلىمىزدەگى بىردەن - ءبىر كەشكى گازەتتىڭ وسىنداي يگىلىكتى قيمىلدى ۇيىمداستىرعانىنا قولداۋشى بولعانىمىزدى ماقتانىش سانايمىز ءارى مۇنان كەيىن دە قول ۇشىن بەرۋگە قاشان دا دايىنبىز»،-دەدى.

  كەلۋ قاينارى: حالىق تورابى

【1】 【2】 【3】 【4】 【5】 【6】 【7】 【8】 【9】 【10】 【11】 【12】 
جاۋاپتى رەداكتورى : مۇحيت امانتاي ۇلى

 سۋرەت

  • جيىننان جالپى كورىنىس