ورتالىقتىڭ اۋىل – قىستاق قىزمەتى ءماجىلىسى بەيجيڭدە اشىلدى

2013.12.25 13:07   كەلۋ قاينارى : حالىق تورابى

　　شينحۋا اگەنتتىگىنىڭ 24 – جەلتوقساندا بەيجيڭنەن بەرگەن حابارى. ورتالىقتىڭ اۋىل – قىستاق قىزمەتى ءماجىلىسى 23 -، 24 – جەلتوقساندا بەيجيڭدە اشىلدى. ءماجىلىس پارتيا 18 – قۇرىلتايىنىڭ جانە 18 – كەزەكتى ءۇشىنشى جالپى ءماجىلىستىڭ رۋحىن ىشكەرىلەي دايەكتىلەندىرىپ، «اۋىل شارۋاشىلىعى، اۋىل – قىستاق، ديقاندار» قىزمەتىندە ءدۇپ كەلىپ وتىرعان جاعدايلار مەن مىندەتتەرگە جان – جاقتىلى تالداۋ جاساپ، اۋىل – قىستاق رەفورماسىن جاپپاي ىشكەرىلەي جۇرگىزۋ، اۋىل شارۋاشىلىعىنىڭ وسىزاماندانۋ اياق الىسىن جەدەلدەتۋ سىندى كەلەلى ساياساتتار جونىندە اقىلداسىپ، 2014 – جىلعى جانە بۇدان بىلايعى ءبىر مەزگىلدەگى اۋىل شارۋاشىلىعى مەن اۋىل – قىستاق قىزمەتى جونىندە ورنالاستىرۋلار جاسادى.

　　ج ك پ ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ، ج ك پ ورتالىق كوميتەتى ساياسي بيۋروسىنىڭ تۇراقتى مۇشەسى، مەملەكەتتىك كەڭەستىڭ زۇڭليى لي كىچياڭ، ج ك پ ورتالىق كوميتەتى ساياسي بيۋروسىنىڭ تۇراقتى مۇشەسى، مەملەكەتتىك حالىق قۇرىلتايى تۇراقتى كوميتەتىنىڭ باستىعى جاڭ دىجياڭ، ج ك پ ورتالىق كوميتەتى ساياسي بيۋروسىنىڭ تۇراقتى مۇشەسى، مەملەكەتتىك ساياسي كەڭەستىڭ ءتوراعاسى يۇي جىڭشىڭ، ج ك پ ورتالىق كوميتەتى ساياسي بيۋروسىنىڭ تۇراقتى مۇشەسى ليۋ يۇنشان، ج ك پ ورتالىق كوميتەتى ساياسي بيۋروسىنىڭ تۇراقتى مۇشەسى، ورتالىق ءتارتىپ تەكسەرۋ كوميتەتىنىڭ شۋجيى ۋاڭ چيشان، ج ك پ ورتالىق كوميتەتى ساياسي بيۋروسىنىڭ تۇراقتى مۇشەسى، مەملەكەتتىك كەڭەستىڭ ورىنباسار زۇڭليى جاڭ گاۋلي ماجىلىسكە قاتىناستى.

　　ءماجىلىس مىنالاردى باسا دارىپتەدى: جۇڭگونىڭ قۇدىرەتتەنۋى ءۇشىن، ءسوز جوق، اۋىل شارۋاشىلىعى الۋەتتەنۋ قاجەت؛ جۇڭگونىڭ كوركەم بولۋى ءۇشىن، ءسوز جوق، اۋىل – قىستاق كوركەم بولۋ قاجەت؛ جۇڭگونىڭ اۋقاتتانۋى ءۇشىن، ءسوز جوق، ديقاندار اۋقاتتانۋ قاجەت. اۋىل شارۋاشىلىعىنىڭ نەگىزى بەرىك بولسا، اۋىل – قىستاق جاراسىمدى، ورنىقتى بولسا، ديقاندار الاڭسىز تۇرمىس كەشىرسە، جالپى جاعداي قامتاماسىزداندىرىلىپ، ءتۇرلى قىزمەتتەر ءبىرشاما ىرىقتى جۇرىلەدى. ءبىز «اۋىل شارۋاشىلىعى، اۋىل – قىستاق، ديقاندار» ماسەلەسىن ويداعىداي شەشۋدى بۇكىل پارتيا قىزمەتىنىڭ ەڭ ماڭىزدى ءتۇيىنى ەتۋگە تاباندى بولىپ، ونەركاسىپ ارقىلى اۋىل شارۋاشىلىعىن سۇيەمەلدەۋ، قالا ارقىلى اۋىل – قىستاققا كومەك بەرۋ جانە كوپ بەرۋ، از الۋ، جانداندىرۋ باعىتىنا تاباندى بولىپ، اۋىل شارۋاشىلىعىن قۋاتتاندىرۋ، ديقاندارعا جەڭىلدىك جاساۋ، ديقانداردى اۋقاتتاندىرۋ ساياساتىنىڭ تەبىنىن ۇزدىكسىز ارتتىرىپ، «اۋىل شارۋاشىلىعى، اۋىل – قىستاق، ديقاندار» قىزمەتىن باستان – اياق مىقتى ۇستاۋىمىز، مىقتى يگەرۋىمىز كەرەك.

　　(ورتالىق ۇلتتار اۋدارما مەكەمەسى اۋدارعان)

　　كەلۋ قاينارى: حالىق تورابى