قارلى القاپتاعى اسەم ورنەكتەر

ماقالاسىن جازىپ سۋرەتتەرىن تۇسىرگەن باقىتبەك ءجۇمادىل ۇلى

2014.02.18 14:17   كەلۋ قاينارى : حالىق تورابى

　　اق مامىق قار بار الاپتى قىمتاعاندا، اينالا اسەم تۇسكە ەنەدى. ۇلى تابيعات ەمىرەنىپ، تىم-تىرىس، تولاسسىز جاۋعان قاردان كەيىن جەر انا اق كورپەسىن جامىلىپ، تاۋ دالا تەگىس كىرشىكسىز كۇمىس تۇسكە ەنگەندە، كەڭ دالا شەتىنە نە تاۋ قۇشاعىنىڭ بىرىنە بارىپ كورسەڭىز، قاردان كەيىنگى جەلسىز اشىق كۇندەگى تىڭ دالانىڭ كورىنىسى ادامدى شەكسىز قيال تەڭىزىنە باتىرىپ، شابىت شالقارىنا جەتەلەيدى. ۇلى جاراتىلىستىڭ وسى سىرلى سۇلۋلىعى قيال دۇنيەڭدى دە، بارشا وي ولكەڭدى دە وزىمەن بىرگە اعارتىپ، كوڭىل قاتپارلارىڭدا زارەدەي كۇڭگىرتتىك قالدىرماي تازارتىپ جىبەرگەندەي، اقجارقىن كۇي كەشەسىڭ. وسى ساتتە اينالاڭدى باجايلاپ بايقاي الساڭ، اسەم تاۋ، ارۋ دالانىڭ شەبەر تابيعات كەستەلەگەن كوركەم كەلبەتى اپپاق قارمەن كومكەرىلگەندە ءتىپتى دە سۇلۋ، ءتىپتى دە سىرلى بولىپ كەتەرى حاق.

　　جۋىقتان بەرى، قىستىڭ سوڭىن الا بولسا دا، ىلە اڭعارىندا جەر بەتىنە قۇت اكەلەتىن تولاسسىز قالىڭ قار جاۋىپ، تابيعاتقا ءسان، ەلگە قۋانىش سيلادى. وسى ساتتە ءوتىپ جاتقان «اپپاق قارعا ماحاببات» اتتى قار-مۇز ساياحات مەرەكەسىنىڭ جەلىلەس قيمىلدارىنا قاتىناسۋ ورايىندا، موڭعۇلكۇرە اۋدانىنىڭ قاراسۋ اۋىلى ماڭىنداعى سازدى القاپتان قاردان كەيىنگى اشىق كۇندە شەبەر تابيعات ورنەكتەگەن مىنا «قارلى القاپتاعى اسەم ورنەكتەردى» فوتو اپپارات كوزىنە ءتۇسىردىم.

　　اسەمدىككە بولعان تالپىنىس ادامزاتتىڭ ماڭگىلىك تاقىرىبى. ۇلى تابيعات قۇشاعى شەكسىز اسەم كورىنىسكە تولى. تەك سول تابيعاتتاعى الۋان ءتۇرلى، كوپ سىرلى كوركەمدىكتى بايقاۋ ورەسى عانا ادامداردىڭ اسەمدىكتى تانۋ جانە ودان ءلاززات الۋ ولشەمى بولماق. سوندا ءبىز ايتىپ وتىرعان «بايقاۋ ورەسى» جاسامپازدىقپەن اينالىسىپ جۇرگەن فوتوگرافتار مەن اۋەسكەرلەردىڭ تالعامدى تۋىندى جاراتىپ تابىسقا جەتۋىندە ءتىپتى دە ماڭىزدى.

　　اۆتوردىڭ قىزمەت ورنى: ىلە حالىق راديو ستانسياسى

　　كەلۋ قاينارى: حالىق تورابى