اۋىلدا وتكەن الامان ايتىس

2014.08.25 16:04   كەلۋ قاينارى : حالىق تورابى

　　ايتىس ساحناسى

　　ەرىكتى ءتىلشى مۇقامادي ءشارىپ ۇلى حابارلايدى. توسكەيى ءتورت تۇلىككە، القابى استىققا، قويناۋى قۇتقا تولعان، تابيعي كوركىمەن كورگەن جاننىڭ كوزىن سۇرىندىرگەن، اققۋ ۇشىپ، قاز قونعان، كوكتوعاي مەملەكەتتىك 5A دارەجەلى كورىنىس رايونىنىڭ ماڭىزدى ءبىر بولەگى بولعان تۇرعىن اۋىلىنىڭ قاراوتكەل كولى بويىنداعى كوكتال سازدىعىندا كوكتوعاي اۋدانىنىڭ 19 - كەزەكتى اقىندار ايتىسى مەن 13 - كەزەكتى «ەرتىس قاينارى» مادەنيەت - كوركەمونەر مەرەكەسى 22 - تامىزدان 23 - تامىزعا دەيىن ەكى كۇنگە جالعاستى. التاي ايماعىنىڭ جەر - جەرىنەن، اقىتتاي عۇلاما تۋعان قاسيەتتى قايىرتىدان، قۋەرتىستەي قۇتتى مەكەننەن، شاكۇرتى، قاراتۇڭكە، دۇرەدەي شارۋاشىلعى شالقىعان قالاشىقتان، كۇرتى، قارابۇلعىنداي قاسيەتتى اۋىلدان، سامال ەسكەن سارتوعايدان، كەنىشتى قالاشىق كوكتوعايدان ات سابىلتىپ، ايتىس تويىن اڭساپ كەلگەن ەگىنشى - مالشىلار، قۇرمەتتى قوناقتار ونەر تويىن، ولەڭ تويىن تاماشالادى.

　　وسى رەتكى ايتىس قيمىلىنىڭ مازمۇنى باي، فورماسى الۋان ءتۇرلى بولىپ، ونەرپازدار كەنىشتى مەكەن، كورىكتى مەكەن، مال شارۋاشىلىعىنداعى ءىرى اۋدان، ساياحاتتا سارا اۋدان اتانعان كوكتوعاي اۋدانىنداعى ەلەۋلى وزگەرىستەردى، وسىندا جاساپ جاتقان ءار ۇلت بۇقاراسىنىڭ بەرەكە-بىرلىگىن، جالىندى تىرلىگىن، باقىتتى تۇرمىسىن تىلگە تيەك ەتىپ، جاقۇت جىرلارىمەن اسقاقتاتا جىرلاپ، تىڭدارمان قاۋىمنىڭ كوڭىلىن جەلپىندىرىپ، ولەڭ تويدىڭ مەرەيىن اسىرىپ، تويشىل قاۋىمدى ولەڭ، جىرمەن سۋسىنداتتى.

　　اۋداننىڭ وسى رەتكى اقىندار ايتىسى مەن «ەرتىس قاينارى» مادەنيەت كوركەمونەر مەرەكەسىندە اقىندار ايتىسى، تەرمە، ات بايگەسى، جورعا، پالۋان سالۋ، توعىز قۇمالاق ويىنى قاتارلى جارىستار مەن اسىل تاس، قولونەر بۇيىمدارى جارمەنكەسى، زورلىقتى كۇش، لاڭكەستىككە قارسى تۇرۋ سياقتى مازمۇندارداعى ءتۇرلى زاڭدىق ۇگىت قيمىلدارى وتكىزىلىپ، بۇقارانىڭ مادەني تۇرمىسىن بايتىپ، زاڭدىق تانىمدارىن جوعارىلاتتى. سۋرەتتە: كوكتوعاي اۋدانىنىڭ 19 - كەزەكتى اقىندار ايتىسى مەن 13 - كەزەكتى «ەرتىس قاينارى» مادەنيەت - كوركەمونەر مەرەكەسىندە وتكىزىلگەن ءتۇرلى قيمىلداردان كوز ايىم ساتتەر.

　　كوكتوعاي اۋداندىق راديو - تەلەۆيزيا مەكەمەسىنەن

　　كەلۋ قاينارى: حالىق تورابى