اپتا ارقاۋى: ليۆيانىڭ 11 جولاۋشىلار ۇشاعى جوعالدى

2014.09.05 12:59  

　　حالىق تورابى، 4 – قىركۇيەك، بەيجيڭ. جۇڭگو گازەتى تورابىنىڭ 3 – قىركۇيەكتە انگليانىڭ «كۇندەلىك پوچتا گازەتىنە» سىلتەمە جاساپ حابارلاۋىنشا، ليۆيانىڭ استاناسى تريپولي حالىقارالىق اۋەجايىنداعى ساۋدالىق 11 ۇشاق جوعالعان، ا ق ش ءمانساپتىلارى ۇشاقتاردى ءىسلام قارۋلى ەلەمەنتتەرىنىڭ ۇرلاپ اكەتىپ، اتالعان وڭىردە «11 – قىركۇيەك» لاڭكەستىك شابۋىلى تەكتەس وقيعا تۋدىرۋىنان الاڭداۋدا.

　　بۇل 11 ۇشاق ليۆياداعى مەملەكەت مەنشىگىندەگى ەكى اۆياتسيا سەرىكتىگىنىڭ ۇشاقتارى، الدىڭعى ايدا «ليۆيا تاڭى» اتتى قارۋلى ۇيىم تريپولي حالىقارالىق اۋەجايىن باسىپ العاننان كەيىن بۇل ۇشاقتار جوعالعان. ماروككونىڭ اسكەري مامانى مايكاۋيدىڭ ايتۋىنشا، ۇشاقتى «بۇركەنىشتى قوسىن» اتتى باسقا ءبىر ءىسلام ۇيىمى اكەتكەن بولۋى مۇمكىن، اتالعان ۇيىم ەكى جىلدىڭ الدىندا ا ق ش – تىڭ بەنحازيدا تۇراتىن كونسۋلدىعىنا جاسالعان شابۋىلدىڭ باس جوسپارلاۋشىسى.

　　مايكاۋيدىڭ ايتۋىنشا، «سەنىمدى احبارعا» قاراعاندا، «‹بۇركەنىشتى قوسىن› قازىر وسى ۇشاقتارمەن ماعريب ەلدەرىنە شابۋىل جاساۋدى جاسىرىن جوسپارلاۋدا»، 11 – قىركۇيەك كۇنى جوسپارلارىن ىسكە اسىرۋى مۇمكىن.

　　لاڭكەستىككە قارسى تۇرۋ مامانى گوركانىڭ «ۋاشينگتون ەركىندىك ماياگىنا» بەرگەن سۇحباتىندا، لاڭكەستەر ەكى ءتۇرلى جولمەن سولتۇستىك افريكاداعى، ءتىپتى ساۋد ارابياسىنداعى مۇناي الاپتارىنا شابۋىلداۋى مۇمكىن. ءبىرى، 2001 – جىلى 11 – قىركۇيەك وقيعاسىنا ۇقساس، جولاۋشىلار ۇشاعىن «باسقارىلمالى بومبى» رەتىندە پايدالانۋ؛ ەندى ءبىرى، حالىقتىق ۇشاقتىڭ بەلگىسىنەن پايدالانىپ، لاڭكەس ەلەمەنتتەردى ماقساتتى شابۋىلداماق بولعان جەرگە جەتكىزۋى مۇمكىن.

　　ا ق ش ۇكىمەتى بۇل 11 ۇشاقتىڭ جوعالعانىن ءالى رەسمي راستاعان جوق، الايدا مالىمەتكە نەگىزدەلە وتىرىپ، ۇشاقتاردىڭ دەرەگىن ىزدەستىرۋدە.

　　2001 – جىلى 11 – قىركۇيەكتە ءال – حايدا ۇيىمى نيۋ – يوركتەگى دۇنيە جۇزىلىك ساۋدا ورتالىعى مەن ۋاشينگتونداعى بەسبۇرىشتى سارايعا لاڭكەستىك شابۋىل جاساعان؛ 2012 – جىلى 11 – قىركۇيەكتە ءىسلام قارۋلى ەلەمەنتتەرى ا ق ش – تىڭ ليۆياداعى بەنحازي قالاسىندا تۇراتىن كونسۋلدىعىنا لاڭكەستىك شابۋىل جاساپ، ا ق ش – تىڭ باس ەلشىسى ستەفندى قامتىعان 4 ادام قازا بولعان بولاتىن.

　　كەلۋ قاينارى: حالىق تورابى