سوت ليۋ تيەناننىڭ پارا الۋ دەلوسىنىڭ ۇكىمىن باسقا كۇنى جاريالايتىندىعىن ايتتى

2014.09.25 15:48   كەلۋ قاينارى : حالىق تورابى

　　حالىق تورابىنىڭ 24-قىركۇيەكتە بەيجيڭنەن بەرگەن حابارى. 24-قىركۇيەكتە، حىبي ولكەسى لاڭفاڭ قالالىق ورتا دارەجەلى حالىق سوتى مەكەمەسى مەملەكەتتىك دامۋ جانە رەفورمالاۋ كوميتەتىنىڭ بۇرىنعى ورىنباسار مەڭگەرۋشىسى، مەملەكەتتىك ەنەرگيا مەكەمەسىنىڭ بۇرىنعى باستىعى ليۋ تيەناننىڭ پارا الۋ دەلوسىن ءبىرىنشى سوتتا قارادى.

　　حىبي ولكەسى لاڭفاڭ قالالىق ورتا دارەجەلى حالىق سوتى مەكەمەسىنىڭ ۇكىمەتتىك بلوگىندا جاريالانعان حابارعا قاراعاندا، لاڭفاڭ قالالىق حالىق پروكۋراتۋراسى 2002-جىلدان 2012-جىلعا دەيىن، ايىپكەر ليۋ تيەنان مەملەكەتتىك جوسپار كوميتەتى شارۋاشىلىقتى دامىتۋ مەڭگەرمەسىنىڭ باستىعى، مەملەكەتتىك دامۋ جانە رەفورمالاۋ كوميتەتى ونەركاسىپ مەڭگەرمەسىنىڭ باستىعى، ورىنباسار مەڭگەرۋشىسى قاتارلى مىندەتتەر وتەگەن كەزدەگى قىزمەت قولايلىلىعىنان پايدالانىپ، باسقالاردىڭ نىسانىن بەكىتتىرىپ بەرۋ، اۆتوموبيل s4 دۇكەنىن اشۋىنا كومەكتەسۋ سياقتى تاسىلدەرمەن زاڭسىز پايدا العان، جەكە نەمەسە ۇلى ليۋ دىچىڭمەن (ايىرىم دەلو تۇرعىزىلىپ تەكسەرىپ ءبىر جاقتىلى ەتىلگەن) بىرلەسىپ شاندۇڭ نانشان توبى شەكتى جاۋاپكەرشىلىك سەرىكتەستىگىنىڭ باس جوراسى سۇڭ زوۋىن، جىجياڭ حىڭ-ي توبى شەكتى جاۋاپكەرشىلىك سەرىكتەستىگىنىڭ باس جوراسى چيۋ جيانلين قاتارلى 5 ادامنان جالپى قۇنى 35 ميلليون 580 مىڭ يۋاننان اساتىن مال-مۇلىك العان، قياناتشىلدىق قىلمىسى بويىنشا ليۋ تيەناننىڭ قىلمىستىق جاۋاپكەرشىلىگىن قۋزاستىرۋ كەرەك دەپ شاعىم ايتتى.

　　سوتتا پروكۋراتۋرا ورگانى قاتىستى دالەل-ىسپاتتاردى كورسەتتى، ايىپكەر ليۋ تيەنان مەن ونىڭ اقتاۋشىسى كۋالاندىرۋ جۇرگىزدى، شاعىم ايتۋشى جاق پەن اقتاۋشى جاق ءوز پىكىرلەرىن تولىق ءبىلدىردى. اقپارات ورىندارىنىڭ تىلشىلەرى، حالىق قۇرىلتايىنىڭ ۋاكىلدەرى جانە ءار سالاداعى بۇقارادان 70 تەن استام ادام سوتقا سىرتتاي قاتىناستى. سوت دەلو ۇكىمىن باسقا كۇنى جاريالايتىندىعىن ايتتى.

　　(جۇڭگو ۇلتتار اۋدارما مەكەمەسى اۋدارعان)

　　كەلۋ قاينارى: حالىق تورابى