جۇڭگونىڭ وزبەكستانداعى حالىقتىق كاسىپورنىنىڭ جىلدىق ءونىم قۇنى 56 ميلليون ا ق ش دوللارىنا جەتتى

2014.09.25 16:47   كەلۋ قاينارى : حالىق تورابى

　　حالىق تورابى، 24 – قىركۇيەك، بيشكەك. (نۇرعيسا قۇرمانجان ۇلى) حالىق تورابىنىڭ «جاڭا جىبەك جولىنا ساپار» اتتى تىلشىلەر ۇيىرمەسى جۇڭگونىڭ وزبەكستانداعى ەڭ ءىرى حالىقتىق كاسىپورنى ـــ پىڭشىڭ ونەركاسىپ باقشاسىن گۇلدەندىرۋ شەكتى سەرىكتىگىنە (تومەندە قىسقاشا «پىڭشىڭ» دەپ اتالادى) بارىپ، اتالعان كاسىپورىننىڭ وزبەكستانداعى دامۋ جاعدايىمەن تانىستى. ونەركاسىپ باقشاسىنىڭ جارناگەرىنىڭ ءبىرى جي چيۋحايدىڭ تىلشىگە تانىستىرۋىنشا، وزبەكستاننىڭ جەڭىل ونەركاسىپ ونىمدەرىنە دەگەن سۇرانىسى جوعارى، ەڭبەككۇش قۇنى ارزان بولعاندىقتان، ولار بۇل ارانى زاۆود قۇرۋعا تاڭداعان.

　　پىڭشىڭ سەرىكتىگىنە جۇڭگو جاق قارجى قوسقان، سەرىكتىك وزبەكستاندا تىركەۋگە الىنعان، تاشكەنت قالاسىنان 75 كيلومەتر جەردەگى سىر ءداريا وبلىسىنا ورنالاسقان، 10 جىلدان بەرگى قۇلشىنىستىڭ ناتيجەسىندە، ونەركاسىپ باقشاسىنىڭ كولەمى 37 گەكتارعا، قۇرىلىس اۋماعى 100 مىڭ شارشى مەترگە، جۇمىسشىلارىنىڭ سانى 1100 ادامعا جەتكەن، جۇمىسشىلارىنىڭ %80تەن استامى جەرگىلىكتى ورىننان قابىلدانعان. قازىر ونەركاسىپ باقشاسىندا قولفون قۇراستىرۋ، مونشا زاپشاستارىن جاساۋ، تەرى بۇيىمداردى وڭدەۋ قاتارلى بىرنەشە سەح جۇمىس ىستەيدى، جەرگىلىكتى ورىننان ماركاعا تىزىمدەلگەن UZTE قولفونى بىلتىر اتالعان ونەركاسىپ باقشاسىنا ىرگە تەپكەن، وزبەكستان جاقپەن ەلىمىزدىڭ حالىقتىق كاسىپورنى بىرلىكتە قارجى قوسقان مونشا زاپشاستارى زاۆودى دا بيىل جىل سوڭىنا دەيىن ىسكە قوسىلادى دەپ مەجەلەنۋدە.

　　تانىستىرۋعا قاراعاندا، ونەركاسىپ باقشاسى 2005 – جىلى قۇرىلعاننان بەرى، جيىنى 45 ميلليون ا ق ش دوللارى قارجى قوسىلىپ، 2013 – جىلعى جىلدىق ءونىم قۇنى 56 ميلليون ا ق ش دوللارى بولعان،

　　جۇڭگو قارجى قوسقان كاسىپورىن وزبەكستاننىڭ جەرگىلىكتى ماركاسىن جاراتتى

　　ءتىلشىنىڭ ۇعىسۋىنشا، UZTE قولفونى پىڭجۇڭ شيڭشىڭ شەكتى سەرىكتىگىنىڭ وزبەكستاندا تىركەۋگە الدىرعان ماركاسى، پىڭجۇڭ شيڭشىڭ ەلىمىزدەگى جۇڭشيڭ حابارلاسۋ سەرىكتىگى مەن پىڭشىڭ سەرىكتىگى قارجى قوسىپ، وزبەكستاندا قۇرعان سەرىكتىك. قازىر UZTE وزبەكستاندا ساتىلۋدان سىرت، ورتا ازياداعى باسقا ەلدەرگە دە شىعارىلا باستاعان.

　　زاۆود باستىعى فاڭ شياڭميڭنڭ تانىستىرۋىنشا، UZTE قولفونى ەل ىشىندە وندىرىلگەن زاپشاستاردى وزبەكستاندا قۇراستىرىپ، وڭدەۋدەن وتكىزەدى، 2013 – جىلى ماۋسىمدا وندىرىسكە قوسىلعاننان بەرى، زاۆود 110 مىڭ دانا قولفونعا زاكاز قابىلداعان، مۇندا نەگىزدىك فۋنكتسيالى قاراپايىم تەلەفوندارعا دەگەن سۇرانىس كوپ ءبولىمىن يەلەپ، 70 مىڭ داناسىن ۇستاعان. قازىر زاۆود كۇنىنە 800 ~ 1000 دانا قولفون وندىرەدى.

　　قازىر زاۆودتا جەرگىلىكتى ورىننان قابىلدانعان 40 جۇمىسكەر مەن جۇڭگو جاقتان بارعان باسقارۋعا جاۋاپتى 8 ادام جۇمىس اتقارادى. فاڭ شياڭميڭنىڭ تانىستىرۋىنشا، زاۆود ءوزى تۇرعان سىر ءداريا وبلىسىنان ءارى سول جەردەگى تەحنيكۋم مەكتەپتەن تىكەلەي جۇمىسكەر قابىلداعان.گانجينا بىلتىر عانا مەكتەپتەن وسى زاۆودقا قابىلدانعان، تانىستىرۋشىنىڭ ايتۋىنشا، بيىل 18 جاسقا كەلگەن گانجينانىڭ ۇيرەنۋ قابىلەتى جوعارى، جۇڭگولىق قىزمەتكەرلەرمەن كۇندەلىكتى ارالاسۋ بارىسىندا حانزۋشا قاراپايىم سويلەمدەردى ۇيرەنىپ العان، ءتىلشىنىڭ سۇراقتارىن ءوزى ءتۇسىندى، حانزۋشا ءوز اتى – ءجونىن جازا دا الادى.

　　گانجينانىڭ تىلشىگە ايتۋىنشا، زاۆود وسىزاماندانعان تەحنيكامەن جابدىقتالعان، ول قىزمەت بارىسىندا حانزۋشا ۇيرەنۋ ارقىلى حانزۋشا – ورىسشا اۋدارماشى بولۋدى، قىزمەت بارىسىندا تاجىريبە توپتاۋ ارقىلى كەلەشەكتە حابارلاسۋ سالاسىندا تەحنيكالىق مامان بولىپ جەتىلۋدى ارماندايدى.قازىر زاۆودتاعى جۇمىسكەرلەر ءتۇرلى قوعامدىق قامسىزداندىرۋ قاراجاتتارىن شىعارىپ تاستاعاندا 250 ا ق ش دوللارى مولشەرىندە ەڭبەكاقى الادى.

　　كەلۋ قاينارى: حالىق تورابى