جورتقاندا جولىڭ بولسىن

2014.11.13 15:41   كەلۋ قاينارى : حالىق تورابى

　　حالىق تورابى، 5 – قاراشا، بەيجيڭ. (نۇرعيسا) جۇڭگو ۋىنجوۋ حالىقارالىق تاۋلى جەر – دالا سپورت باسەكەسى بيىل ءساۋىر ايىنىڭ 15 – جۇلدىزىندا اياقتادى، بۇل رەتكى جارىس حالىقارالىق دالالىق جارىس تۇرلەرى بويىنشا دارەجەسى مەن كولەمى جاعىنان 10 جىلدان بەرى ەلىمىزدە وتكىزىلگەن ەڭ ءىرى جارىس.

　　ال، وسى جارىستا حالىقارالىق جارىس ساڭلاقتارىنىڭ اراسىندا 10 ورىنعا تابان تىرەپ، ەلىمىزدەگى دالالىق كوماندالاردىڭ ىشىندە 1 – ورىندى يەلەگەن حۇڭنيۋ دالالىق سپورت 2 - كومانداسىنىڭ بەلدى مۇشەسى ەرسىن اتتى قازاق جىگىت ەل ىشىنە تانىمالى بولا باستادى.

　　وسى جولعى جارىستا حۇڭنيۋ 2 – كومانداسىنداعى ەرسىن مەن ونىڭ ءۇش سەرىگى 23 ساعات 32 مينۋت 11 سەكۋندتا جارىستى اياقتاتىپ، ەلىمىزدەن وسى جارىسقا قاتىناسقان كوماندالار ىشىندە سيلىق ساحناسىنا كوتەرىلگەن بىردەن – ءبىر كوماندا بولدى.

　　ەرسىن حۇڭنيۋ دالالىق سپورت 2 – كومانداسىنا بىلتىر قابىلدانعان. ونىڭ وسىنداي قاجىر – قايراتتى، مىعىم دەنساۋلىقتى قاجەت ەتەتىن سپورت تۇرىمەن شۇعىلدانۋىنىڭ وزىندىك نەگىزى بار، بالا كۇنىنەن – اق جەل تابان بولىپ وسكەن ەرسىن تولىق ورتا وقىپ جۇرگەندە اۋدانداعى جارىستاردا توپ جارىپ جۇرسە، كەيىن ىلە وبلىسى مەن شينجياڭ ۇيعۇر اۆتونوميالى رايونى كولەمىندە 5000 مەترگە، 10000 مەترگە جۇگىرۋدەن اعا جۇلدەگەر بولدى.

　　وسىدان سوڭ ەرسىن نازارىن ەل ىشىندە وتكىزىلەتىن حالىقارالىق جارىستارعا بۇرىپ، يۇننان، جياڭسۋ، گۋاڭشي، جىجياڭ قاتارلى جەرلەردە وتكىزىلگەن ءتۇرلى ۇزاققا جۇگىرۋ جارىستارىنا قاتىناسىپ، بارىنەن ناتيجەلى ورالدى. ونىڭ بۇل تابىستارىن بىردەن جىپكە ءتىزىپ وتىرۋ ءتىپتى قيىنداۋ. ءبىر عانا مىسال كەلتىرسەك، 2013 – جىلى جىجياڭ ولكەسى نيڭبو قالاسىندا وتكىزىلگەن ۇزاققا جۇگىرۋ جارىسىندا ەرسىن 1 – دارەجەلى سيلىقتى يەلەنىپ، «شاشاسىنا شاڭ جۇقپاس» جۇيرىكتىگىن ايگىلەدى.

　　كەيىن كەلە ەرسىن دالالىق سپورت تۇرىمەن شۇعىلدانۋعا اۋەستەنىپ، ۇزاققا جۇگىرۋ مەن قاتار ۆەلوسيپەت، مالتاۋ، قايىق ەسۋ سىندى سپورت تۇرلەرىنە دە بىردەي جاتتىقتى. وسىنىڭ ناتيجەسىندە 2013 – جىلى ماۋسىمدا شينجياڭدا وتكىزىلگەن ۆەلوسيپەت جارىسىندا 1 – دارەجەلى سيلىققا يە بولىپ، حۇڭنيۋ دالالىق سپورت 2 – كومانداسىمەن كەلىسىمشارتقا وتىرىپ، اتالعان كوماندانىڭ مۇشەسى بولىپ قابىلداندى.

　　الىسقا جۇگىرۋ، مالتاۋ، ۆەلوسيپەت ايداۋ، قايىق ەسۋ سىندى كوپ ءتۇرلى سپورتتى ءبىر تۇلعالاندىرعان دالالىق سپورت باسەكەسى قايتپاس قاجىرلىلىقتى قاجەت ەتەتىن سپورت ءتۇرى. ەرسىن وسىنداي ەلەۋلى تابىستارعا قول جەتكىزۋ ءۇشىن ەرىنبەي ەڭبەكتەندى، جاپا – ماشاقاتقا شىدادى. ەرسىننىڭ الدىنا قويعان ماقساتى ــ جۇڭگوداعى ەڭ ۇزدىك دالالىق سپورت شەبەرى بولۋ.

　　«كورىنگەن تاۋدىڭ الىستىعى جوق» دەيدى قازاق، ەرسىن ءۇشىن بۇل ماقسات تا الىنباس اسۋ ەمەستەي، تەك العان بەتىڭنەن قايتپا، ءالى تالاي تابىستار سەنى كۇتىپ تۇر، «جورتقاندا جولىڭ بولسىن»، ەرسىن باۋىر.

　　كەلۋ قاينارى: حالىق تورابى