حالىق تورابى، 25 – قاراشا، بەيجيڭ. شينجياڭنىڭ جەمەنەي اۋدانى مەن قازاقستاننىڭ زايسان اۋدانى ەكى اۋداننىڭ وقۋ – اعارتۋ، مادەنيەت قاتارلى تاراۋلارىنىڭ كوپ رەت ءوزارا بايلانىس جاساۋىنىڭ ارقاسىندا 2014 – جىلى 18 – قاراشادان 19 – قاراشاعا دەيىن مادەنيەت كورمەسىن بىرلىكتە ۇيىمداستىردى، بۇل كورمە قازاقستاننىڭ زايسان اۋدانىنداعى مۇراجايدا وتكىزىلدى. كورمەنىڭ ۇيىمداستىرىلۋى قازاقستان مەن جۇڭگو اراسىنداعى مادەنيەت جاعىنداعى اۋىس – كۇيىس پەن كورشىلەس ەلدەر اراسىنداعى دوستىقتى اناعۇرلىم كۇشەيتە تۇسەتىن بولادى.
جەمەنەي اۋداندىق پارتكوم ۇگىت ءبولىمىنىڭ ورىنباسار باستىعى جاڭالان: مۇراجاي ــ مادەني مۇرالار مەن ورتاق ەستەمەلەر تۋرالى بايانداۋشى، شەتەلمەن مادەنيەت جاعىنداعى اۋىس – كۇيىس جاساسۋ، مادەنيەتتى ۇگىتتەۋدىڭ نەگىزگى دانەكەرلەرىنىڭ ءبىرى، بۇل رەتكى مادەنيەت جاعىندا اۋىس – كۇيىس جاساسۋ قيمىلىندا جەمەنەي اۋدانى فوتوسۋرەتتەر كىرىستىرىلگەن 6 كورمە تاقتاسىن كورمەگە قويدى، بۇل سۋرەتتەر نەگىزىنەن تاريح – مادەنيەت، ايگىلى ادامدار، بەيزاتتىق مادەني مۇرالار قاتارلى ءۇش ءتۇرلى مازمۇندى قامتىدى، - دەپ تانىستىردى.
جەمەنەي اۋدانى شينجياڭنىڭ باتىس سولتۇستىگىندە، باتىسىندا قازاقستانمەن شەكارالاسادى، جەمەنەي اۋدانىندا مەملەكەتتىك 1 – توپتاعى قۇرىلىقتىق وتكەل بار. كوپ جىلداردان بەرى جەمەنەي اۋدانى قازاقستاننىڭ شەكارالاس زايسان اۋدانىمەن سەلبەستىكتى تەرەڭدەتىپ، ساۋدا – ەكونوميكا، مادەنيەت جاعىنداعى اۋىس – كۇيىس، عىلىم – تەحنيكا، وقۋ – اعارتۋ قاتارلى سالالاردا قوماقتى تابىستارعا قول جەتكىزدى. 2008 – جىلى 10 – قاڭتاردا جۇڭگونىڭ جەمەنەي اۋدانى مەن قازاقستاننىڭ زايسان اۋدانى اۋدان – قالا دارەجەلى «تاتۋ سەلبەستىك ورناتقان اۋداندار كەلىسىمىنە» قول قويىپ، تەڭدىك، دوستىق، ءوزارا تيىمدىلىك جەتكىزۋ پرينسيپى نەگىزىندە ەكونوميكا، عىلىم – تەحنيكا، وقۋ – اعارتۋ، مادەنيەت، دەنساۋلىق ساقتاۋ قاتارلى سالالاردا ورتاق تانىمعا كەلىپ، سەلبەستىكتى ورىستەتتى.
كەلۋ قاينارى: حالىق تورابى