«قار جامىلىپ، مۇز قۇرسانعان كورىكتى كوكتوعاي» اتىنداعى ساياحات مەرەكەسى وتكىزىلدى

2015.01.04 15:08  

　　ەرىكتى تىلشىلەر ءتىلشى مۇقامادي ءشارىپ ۇلى، نۇرداۋلەت بەكەن ۇلى حابارلايدى. مەملەكەتتىك دەنە - تاربيە باس مەكەمەسى باس بولىپ، شينجياڭ ۇيعۇر اۆتونوميالى رايوندىق دەنە - تاربيە مەكەمەسى، اۆتونوميالى رايوندىق تاۋعا شىعۋ سپورتىن باسقارۋ ورتالىعى مەن كوكتوعاي اۋداندىق حالىق ۇكىمەتى مىندەتىنە الىپ وتكىزگەن 2015 - جىلعى جۇڭگو دەنە - تاربيە ۇتىس بەلەتى بۇكىل ەل بويىنشا جاڭا جىلدا تاۋعا شىعىپ، دەنە شىنىقتىرۋ قيمىلى جانە «قار جامىلىپ، مۇز قۇرسانعان كورىكتى كوكتوعاي» تاقىرىبىنداعى اۋداننىڭ ءتورتىنشى كەزەكتى قار - مۇز، سالت – سانا ساياحات مەرەكەسى ءبىرىنشى قاڭتار تۇستەن بۇرىن بەيجيڭ ۋاقىتى 11دە اۋداننىڭ قوس قولداۋ باقشاسىندا باستالدى.

　　وسى رەتكى مەرەكەدە ات شانا جارىسى، ساياتشىلىق، توپتىق نەكە تەكتەس ۇلتتىق ءتۇس العان جەلىلەس قيمىلدار جانە قارا وتكەل كورىنىس رايونىندا قار ءۇستى اۆتوكولىك جارىسى ۇيىمداستىرىلدى.

　　باستالۋ مۇراسىمىنداعى «التايدا باس قوسايىق» اتتى ءبي، «كورىكتى كوكتوعاي» اتتى كيىم ۇلگىسىن كورسەتۋ قيمىلى، بارابان ءبيى، قارا جورعا ءبيى مەن شاشۋ تەكتەس كوركەمونەر قيمىلدارى مايداندى دۋمانعا بولەدى.

　　باستالۋ مۇراسىمىندا ايماقتىق پارتكومنىڭ مۇشەسى، ۇگىت ءبولىمىنىڭ باستىعى رازبەك جانە اۆتونوميالى رايوندىق دەنە - تاربيە مەكەمەسى تاۋعا شىعۋ سپورتىن باسقارۋ ورتالىعىنىڭ مەڭگەرۋشىسى چىن جۇڭ ءسوز سويلەدى. اۆتونوميالى رايوندىق دەنە - تاربيە مەكەمەسىنىڭ باستىعى زۇرۇن كەرىم قيمىلدىڭ باستالعانىن جاريالادى.

　　بۇل رەتكى بۇكىل ەل بويىنشا جاڭا جىلدا تاۋعا شىعۋ، دەنە شىنىقتىرۋ قيمىلى بەيجيڭنىڭ باداليڭ قورعانىندا جانە بۇكىل ەلىمىزدەگى 19 ولكە - قالادا تەڭ ۋاقىتتا وتكىزىلدى. كوكتوعاي اۋدانىنان 3000 ادام وسى رەتكى قيمىلعا قاتىناستى.

　　اۆتونوميالى رايوندىق دەنە - تاربيە مەكەمەسىنىڭ باستىعى زۇرۇن كەرىم بىلاي دەدى: جۇرتشىلىقتى جالپى حالىقتىق سپورت قيمىلىنا قاتىناسىپ، دەنە شىنىقتىرۋعا ۇندەدىك. جالپى حالىقتىق سپورت قيمىلى ارقىلى جۇرتشىلىقتىڭ دەنە قۋاتىن كۇشەيتىپ، شينجياڭنىڭ ەكونوميكالىق قۇرىلىسىنا، قوعامنىڭ ورنىقتىلىعى مەن ۇزاق ۋاقىتتىق باياندى تىنشىتىعىنا ۇلەس قوسامىز. سۋرەتتە: كوكتوعاي اۋدانىنىڭ وسى رەتكى قار - مۇز، سالت - سانا، ساياحات مەرەكەسىنەن قيىقتار. سۋرەتتەردى مۇقامادي ءشارىپ ۇلى تۇسىرگەن

　　(كوكتوعاي اۋداندىق راديو - تەلەۆيزيا مەكەمەسىنەن)

　　كەلۋ قاينارى: حالىق تورابى