تۇلپار مەكەنىندە ناۋرىز

2015.03.16 16:34  

　　سەرىك تۇرسنالى ۇلى، قايرات قايىپجان ۇلى حابارلايدى. ناۋرىز مەرەكەسى ــ قازاق حالقىنىڭ ءداستۇرلى مەرەكەسى، جاڭا جىلدىڭ بەينەسى، بەرەكە - بىرلىكتىڭ جاقسىلىقتىڭ سيمۆولى. سوندىقتان دا قازاق حالقى ناۋرىز ايىنا، جۇيەدەن ناۋرىز مەرەكەسىنە باسا ءمان بەرىپ كەلگەن. باي - باياشات، جاراسىمدى دا شاتتىققا تولى بۇگىنگى تاڭدا دا حالقىمىز دانا پارتيامىزدىڭ باسشىلىعىندا، قولداپ - قۋاتتاۋىندا، ناۋرىز مەرەكەسىنىڭ ءمانىن اسىرىپ كەلەدى. ايتالىق، جوعارىدان تومەنگە، اۋىل – قىستاقتارعا دەيىن ناۋرىز كونسەرت نومەرلەرىن ۇيىمداستىرىپ، بارشا قاۋىمعا مەرەكەلىك شاشۋ، تاماشا شاتتىققا تولى ەستەمە سيلاپ، حالىقتىڭ رۋحاني تۇلەۋىنە جەبەۋشى بولىپ، ۇلتىمىزدىڭ وزىق ءداستۇرلى مادەنيەتىن ساحارادان ساحناعا اكەلىپ، بارشا حالىقپەن قاۋىشتىرىپ وتىر.

　　موڭعۇلكۇرە اۋدانى بىرنەشە جىلدان بەرى ناۋرىز مەرەكەسىنىڭ كونسەرتىنە باسا ءمان بەرىپ، نومىرلەردى سارالاۋ، ونەرپازداردى تاربيەلەۋ، حالىق ىشىندەگى ونەرپازداردى، سارا تۋىندىلاردى حالىققا جەتكىزىپ، ۇلتتار ىنتىماعىن، باقىتتى تۇرمىستى، جاراسىمدى دا ورنىقتى موڭعۇلكۇرەنىڭ بەت - بەينەسىن ايگىلەۋگە كۇش سالىپ كەلەدى.

　　موڭعۇلكۇرە اۋداندىق پارتكوم ۇگىت ءبولىمى، اۋداندىق مادەنيەت، دەنە تاربيە، راديو - كينو - تەلەۆيزيا مەكەمەسىنىڭ باس بولۋىمەن، اۋداندىق ءان – ءبي ۇيىرمەسى ۇستىنە الىپ وتكىزگەن موڭعۇلكۇرە اۋداننىڭ قوي جىلىنداعى ناۋرىز مەرەكەسىن تويلاۋعا ارنالعان 2015 – جىلعى «تۇلپار مەكەنىندە ــ ناۋرىز » اتتى ساۋىق كەشى 14 – ناۋرىز تۇستەن بۇرىن كورەرمەندەرمەن جۇزدەستى.

　　موڭعۇلكۇرە اۋداننىڭ 4 باسشىلىق القاسى مەن ءار سالا، ءار كاسىپتەن كەلگەن مىڭنان استام كورەرمەن، جالپى بەتتىك جاراسىمدى قوعام قۇرۋ، ۇلتتار ىنتىماعىن بەكەمدەپ، حالىق بۇقاراسىمەن ەتەنە بولۋ، قوعام ورنىقتىلىعىن قورعاۋدى باستى تاقىرىپ ەتكەن باي مازمۇندى كونسەرتتى تاماشالادى.

　　كونسەرت بالدىرعان بالاپاندار ورىنداعان توپتىق ءبيى «قوشاقانىممەن» باستالىپ، جەكە ءان، قوس داۋىستى ءان، ۇلاسپالى كۇي، توپتىق ءبي، سەرىك ويىنى سىندى كورەرمەن كوڭىلىن تاپقان ويىن نومىرلەرىمەن جالعاسىن تاۋىپ، موڭعۇلكۇرە اۋدانىنىڭ ەكونوميكا - مادەنيەت ىستەرىنىڭ قارىشتاپ دامىعان، حالىق تۇرمىسىنىڭ كۇن سايىن جاقسارعان جاڭاشا بەت - بەينەسىن ءار قىرىنان بەينەلەپ، ۇلتتىق ءداستۇرىمىزدى ۇلاعاتتاپ،ءار ۇلت حالقىن بەرەكەگە شاقىرىپ، بارشا جۇرتتى باياندى دامۋعا ۇندەدى.

　　وسى رەتكى كونسەرتكە تۇلپار مەكەنىنىڭ تۇلەگى، بۇكىل شينجياڭ قازاقتارىن مۇڭلى دا سازدى اۋەنىمەن باۋراعان جاس تالانتتى ءانشى احىمەتجان رابجان ۇلى، تامىلجىعان ءتاتتى اندەرىمەن تامام جۇرتتى تامساندىرعان گۇلماريا جاقىپباي قىزى ۇسىنىسپەن شاقىرتىلدى. ولاردىڭ تامىلجىتا ورىنداعان اندەرى، حالىققا زور رۋحاني ءلاززات باعىشتاپ، كونسەرتتىڭ ورەسىن ءتىپتى دە جوعارىلاتا ءتۇستى.

　　وسى رەتكى كونسەرتتىڭ دايىندىق قىزمەتى مەن كونسەرتتىڭ نەگىزگى مازمۇنى جونىندە موڭعۇلكۇرە اۋدانىنىڭ ورىنباسار اكىمى جانبولات باتەن ۇلى تىلشگە بىلاي دەدى: موڭعۇلكۇرە اۋدانىنىڭ 2015 – جىلعى ناۋرىز مەرەكەسىنە ارنالعان كونسەرتى اۋدانىمىزداعى ءار ۇلت ونەرپازدارىنڭ كۇش سالۋىندا تابىسپەن اياقتادى. وسى رەتكى كونسەرتتە 18 ءنومىردى دايىنداپ، حالىققا تارتۋ ەتتىك. وسى نومىرلەردى دايىنداۋعا 2 اي ۋاقىت كەتتى. كونسەرتىمىز موڭعۇلكۇرە اۋداندىق حالىق كينوحاناسىندا وتكىزىلىپ، ساحنانىڭ ارتقى كورىنىسى، شىراقتارى بۇرىنعى جىلدارداعى كونسەرت قويىپ جۇرگەن ساحنامىزعا قاراعاندا وتە جاقسى بولىپ، ساحنا مەن ويىن نومىرلەرى ەرەكشە قابىسىپ، كورەرمەندەرگە ايرىقشا ءلاززات باعىشتادى. ناۋرىز مەرەكەسى ءبىر جىلدا ءبىر كەلەتىن ۇلتتىق مەرەكە بولعاندىقتان، كونسەرتتىڭ مازمۇنى جاعىندا حالىق اۋەندەرىن ارقاۋ ەتكەن كۇي، ءداستۇرلى اندەردى نەگىز ەتتىك. سونىمەن جالپى كونسەرتىمىز حالىقتىڭ جاقسى باعاسىنا يە بولدى، حالىقتىڭ رۋحاني قاجەتىن قاناعاتتاندىرۋعا جاقسى نومىرلەردى تارتۋ ەتتىك دەپ ويلايمىز. ۇيتكەنى، تولاستاماي سوعىلعان حالىقتىڭ شاپالاعى كونسەرت ساحناسىنداعى ارتيستەرىمىزگە زور شابىت، مەدەۋ بەرىپ وتىردى. سۋرەتتى تۇسىرگەن: قايرات قايىپجان ۇلى

　　كەلۋ قاينارى: حالىق تورابى