اۋىلداعى قايتالانباس دىر - دۋمان

باعداۋلەت باتىربەك ۇلى

2015.03.19 14:31   كەلۋ قاينارى : حالىق تورابى

　　قۇلجا اۋدانىنداعى قازاق ۇلتى ءجيى قونىستانعان اۋليە، قاراعاش، مازار سياقتى اۋىلداردا ناۋرىز مەرەكەسى جىل سايىن سالتاناتتى تويلانادى. «ءاپپاقتىڭ انىمەن» جالپاق جۇرتقا تانىمالى ءاپپاق اپامىزدىڭ اۋىلى ــ قۇلجا اۋدانىنىڭ قاراعاش اۋىلىندا 11 - ناۋرىز كۇنى «كوكقامىردا ناۋرىز» اتتى دالا ءداستۇرىن بەينەلەيتىن ۇلتتىق ءتۇس العان ويىن - ساۋىق نومىرلەرى مەن اۋىلداعى الامان بايگە قيمىلى اسا تارتىمدى وتكىزىلدى.

　　وسى كۇنى ناۋرىزدىڭ اقشا قارى قاپالاقتاپ، ساحارانىڭ ءسانىن، ساحنانىڭ ءارىن كەلتىردى. ساحنانىڭ ەكى بۇيىرىنە تىگىلگەن اقبوز ءۇي ساحارا ءومىرىن كوز الدىعا ەلەستەتتى.

　　ۇلتتىق ونەر مەن ءتول مادەنيەتكە دەگەن ايرىقشا ىنتاسىمەن كونسەرتتى تاماشالاۋعا كەلگەن 4 مىڭعا جۋىق كورەرمەن قاپالاقتاعان قار مەن ۇيتقي سوققان بوراندى ەلەڭ قۇرلى كورمەدى، بالكىم، كوك جۇزىنەن توگىلگەن اقشا قار اق شاشۋ سپەتتى حالىقتىڭ جىگەرىن جانىپ، شابىت سيلادى. تۇستەن كەيىن بايگەگە ءتىپتى كوپ كورەرمەن جينالدى. ءار جەردەن ۇكىلەنىپ بايگەگە قوسىلعان 50 سايگۇلىك كەڭ دالانى تۇياعىمەن دۇبىرلەتىپ، شابىسىمەن جۇرتتى تامساندىردى. جۇرت اراسىنان «ات پەن بالاعا وبال بولدى – اۋ» دەگەن اڭىستار دا ەستىلدى. ءبىراق، سالدەن كەيىن بۋسانعان تۇلپارلار مەن كوزدەرىنەن وت شاشقان شاباندوز بالالاردى كورگەن جۇرت، ۇلتىمىزدىڭ سان عاسىر بويى ساقتاعان قايسارلىعىن كوزبەن كورىپ، كوڭىلگە ۇيالاتقانداي بولدى.

　　تانىمالى فوتوگراف باعداۋلەت باتىربەك ۇلىنىڭ قازاق ءومىرىنىڭ ءبىر جۇرناعى سپەتتى اۋىل تويىنان تۇسىرگەن تاماشا فوتوسۋرەتتەرىن ۇسىنامىز.

　　كەلۋ قاينارى: حالىق تورابى