كوكتەمنىڭ بۇيرا بۇلتتارى

(فوتو شالقىما)

باقىتبەك ءجۇمادىل ۇلى

2015.04.14 13:31   كەلۋ قاينارى : حالىق تورابى

　　جەر بەتىن جاڭا تۇسكە بولەپ، بار الاپقا قىزۋ تىرشىلىك تىنىسىن باعىشتايتىن كوكتەم كەلۋىن كىم اڭسامايدى دەيسىڭ! ءبارىمىز اسىعا كۇتەتىن وسى كوكتەمنىڭ كەلە جاتقانىن مەن ءار جىلى باتىس كوكجيەكتەن بۇيرالانا كوتەرىلگەن اقشا بۇلتتاردان اڭعارعانداي بولامىن. ويتكەنى كوكتەمنىڭ بۇلتى ىزعارلانا جەر بەتتەپ قاپتاپ كەلىپ توڭىرەكتى بىلدىرتپەي وراپ الاتىن قىستىڭ سۇرعىلت سۋىق بۇلتى مەن قارا قوشقىلدانا الاي - دۇلەي جەتىپ، قوينىنان نوسەر توگەتىن جازعى جاۋىن بۇلتىنا ۇقسامايدى.

　　سامارقاننىڭ كوك تاسىن جىبىتەتىن ناۋرىز ايى كەلىپ، جىل باسى بولا باستاعان جاي جادىرا كەزدەردىڭ جاۋىن - شاشىنسىز كۇندەرىندە اشىق اسپانعا ءساپ سالا قارار بولساڭىز، قىبىلا جاق كوكجىيەكتەن نەمەسە اق شىلاۋىشتى الىس تاۋلاردىڭ ۇشار باسىن وراي كوتەرىلگەن كوكتەمنىڭ بۇيرا بۇلتتارى الۋان ءتۇرلى كوركەم مۇسىنىمەن، كۇلىمدەگەن اقشا جۇزدى ارۋداي جىلىمىق شىرايىمەن اسەم كورىنەدى.

　　كوكتەمنىڭ بۇلتتارى مەيلى اسقار تاۋ باسىن وراي كوشسە دە، كەڭ كوسىلگەن كەرىم دالانىڭ كوكجيەگىن جاعالاپ، بىيىكتە جىلجىپ بارا جاتسا دا، اتىزداردى اتتاپ، ۇلان - قايىر ولكەدەن ەندەي ءوتىپ بارا جاتسا دا، ايتەۋ كوڭىل اۋدارىپ قارار بولساڭىز، التىن كۇننىڭ اپتابىنا شاعىلىسا، شەكسىز اسەم مۇسىنىمەن، كىرشىكسىز تازا تۇسىمەن كوگىلدىر اسپان استىن ارايلاندىرىپ، ءسىزدى وزىنە باۋرايدى.

　　كەڭ دالا قۇشاعىندا ساپارعا بەت الىپ بارا جاتقان جاتقانىڭىزدا، يا بولماسا بەل - بەلەستىڭ ءبىر بىيىگىندە الىسقا كوز سالىپ تۇرعان ساتتەرىڭىزدە، كوكتەمنىڭ وسى بۇيرا بۇلتتارى كوزىڭىزگە شالىنسا، وعان استە كوڭىل بۇرماي قالماڭىز. ويتكەنى ونداي سامارقاۋلىق سەبەبىنەن ءسىز سول اسەم اقشا بۇلتتاردىڭ لەزدە وزگەرىپ مىڭ قۇبىلعان كوركەم فورمالارىنان تابيعاتتىڭ شەكسىز شەبەرلىگىن بايقاۋدان، ونىڭ كىرشىكسىز اپپاق تۇسىنەن شىنايى پاكتىكتى كورىپ، جان دۇنيەڭىز جادىراپ، وي الەمىڭىز تازارىپ، جاڭا كوكتەمدە كوڭىل كوگىڭىزگە ورالار ءتاتتى ويلاردى سەزۋدەن قۇر قالاسىز!

　　كوكتەمنىڭ بۇيرا بۇلتتارى ايالسىز ۋاقىت كەرۋەنى سەكىلدەنىپ، كوك جۇزىندە تىنباي كوشىپ، اسپان اياسىن ايشىقتايدى. كوشە - كوشە اقشالانعان ءجۇزى كۇرەڭىتىپ جازدىڭ جاۋىنىن اڭسايدى. ءارى ماڭگى وسىلاي قايتالانار بالكىم! بۇل ۇلى جاراتىلىستىڭ زاڭدىلىعى. الايدا ءبىز تۋعان ولكەنىڭ الداعى عۇمىرىمىزدا كورۋگە ءناسىپ بولعان ءار كوكتەمىندە، جەر بەتىنەن كوتەرىلگەن ىس - تۇتەك اسپان الەمىن تورلاماي، كوكتەمنىڭ اقشا بۇلتتارى سول كىرشىكسىز تازالىعىمەن كورىنسە ەكەن دەپ تىلەيمىز!

　　ايتپاقشى، «كوكتەمنىڭ بۇيرا بۇلتتارى» اتتى وسى شاعىن فوتو شالقىمامدى كورگەن الىستاعى اعايىن، مىنا سۋرەتتەردەگىدەي كوركەم دە كىرشىكسىز بۇيرالانعان اقشا بۇلتتى ءوز كوزىڭىزبەن كورىپ، ۇلى تابيعات قۇشاعىنان تاۋسىلماس شابىت ءنارىن العىڭىز كەلسە، ءبىزدىڭ تاۋعا مارحابات!

　　اۆتوردىڭ قىزمەت ورنى: ىلە حالىق راديو ستانسياسى

　　كەلۋ قاينارى: حالىق تورابى