ورتا مەكتەپ وقۋشىلارىنىڭ عىلىم-تەحنيكادا جاڭالىق جاراتۋ باسەكەسى ءوتتى

2015.04.28 13:21   كەلۋ قاينارى : حالىق تورابى

　　ساعىنبەك رابات ۇلى حابارلايدى. 26-ءساۋىر ـــ دۇنيە جۇزىلىك ءبىلىم مەنشىك ۇقىعى كۇنى. جاستار مەن ورەندەردىڭ عىلىم-تەحنيكادا جاڭالىق جاراتۋ رۋحى مەن امالياتتىق قابىلەتىن جەتىلدىرۋ، عىلىم-تەحنيكا جەتەكشىلەرىنىڭ عىلمي ساپاسى مەن شەبەرلىگىن ءوسىرۋ، مەكتەپتەردە عىلىم-تەحنيكالىق تاربيەنى جالپىلاستىرۋ جانە دامىتۋ ءۇشىن، التاي ايماقتىق ءبىلىم مەنشىك ۇقىعى مەكەمەسى مەن ايماقتىق وقۋ-اعارتۋ مەكەمەسى ءساۋىردىڭ 26-كۇنى التاي قالالىق 3-ورتا مەكتەپتە ورتا مەكتەپ وقۋشىلارىنىڭ 2015-جىلعى عىلىم-تەحنيكادا جاڭالىق جاراتۋ باسەكەسىن وتكىزدى.

　　بۇل باسەكەگە 2012-جىلدان 2015-جىلعا دەيىن مەملەكەت جاعىنان پاتەنت ۇقىعىن العان جانە تەحنيكالىق جاڭالىق جاراتقان وقۋشىلاردىڭ 25 پارشا تۋىندىسى قاتىناستىرىلىپ، 6 وقۋشى وزدەرىنىڭ تاپقىرلىق جاراتۋىنا قانداي ويدىڭ تۇرتكى بولعانىن، تاپقىرلىق جاراتۋ بارىسىن قوس تىلدە قىسقاشا تانىستىردى. سوڭىندا ەرقايرات سالتانات ۇلىنىڭ «اياق جىلىتاتىن شاقاي» اتتى تۋىندىسى 1-دارەجەلى سيلىققا، گۇلسىم قادىلبەك قىزىنىڭ «تۇيە ساۋعاندا كيەتىن كيىم مەن شەلەك» اتتى تۋىندىسى مەن دارقان جۇكەن ۇلىنىڭ «قولايلى دوسكا» اتتى تۋىندىسى 2-دارەجەلى سيلىققا، 3 تۋىندى 3-دارەجەلى سيلىققا، 8 تۋىندى شابىتتاندىرۋ سيلىعىنا يە بولىپ، جەكە-جەكە 500، 300، 200 جانە 100 يۋانمەن سيلاندى.

　　وسى رەتكى باسەكەدە 1-دارەجەلى سيلىق العان، تولىق ورتا 2-جىلدىق وقۋشىسى ەرقايرات سالتانات ۇلى ءوزىنىڭ تاپقىرلىعى جايىندا توقتالعاندا: مەن تاپقىرلاعان شاقاي ادەتتەگى شاقايمەن ۇقساس، ىشىنە جوعارى كەدەرگىلى ەلەكتىر سىمى ورناتىلعان، ول ەلەكتر كوزىنە جالعانعاندا جىلۋ شىعارىپ، اياقتىڭ تابانىن، جان-جاعىن جىلىتادى، ءارقانداي شاقايعا ورناتۋعا كەلەدى، سونداي-اق ونىڭ تەمپەراتۋراسىن ءوز قاجەتىڭىزگە قاراي تەڭشەيتىن تەتىگى بار،-دەسە؛ 2-دارەجەلى سيلىق العان، تولىق ورتا 3-جىلدىق وقۋشىسى گۇلسىم قادىلبەك قىزى ءوزىنىڭ تاپقىرلىعى جايىندا توقتالعاندا: اۋىلدا تۇيەشىلەردىڭ ءبىر قولىمەن شەلەگىن كوتەرىپ، ەندى ءبىر قولىمەن تۇيە ساۋۋى ماعان وي سالدى. مەنىڭ تاپقىرلىعىمنىڭ اتى: تۇيە ساۋعاندا كيەتىن كيىم مەن شەلەك، شاشىراعان ءسۇتتىڭ ءنىلىن سۇرتۋگە وڭاي بولۋ ءۇشىن كيىمى مەن ماسكاسى سۋلياۋدان جاسالادى، كيىمنىڭ يىعىندا اسپاباۋ، بەلىندە بەلبەۋى بار، شەلەك وسى اسپاباۋ مەن بەلبەۋگە ىلىنەدى، ءسۇتتىڭ تازا بولۋى ءارى توگىلمەۋى ءۇشىن شەلەكتىڭ اۋزىنا سۇزگىش جانە ۆورونكا قويىلادى، شەلەكتىڭ ىشكى بۇيىرىندە شكالاسى بار، ول ءسۇتتىڭ مولشەرىن كورسەتەدى. وسى تاپقىرلىعىم تۇيەشىلەردىڭ جۇمىسىنا از دا بولسا قولايلىلىق اكەلسە، نۇر ۇستىنە نۇر بولار ەدى،-دەدى.

　　التاي قالالىق 3-ورتا مەكتەبىنىڭ ورىنباسار باستىعى ورالبەك سامەت ۇلى: «ەديسون اۋىلدا» اتىنداعى تاپقىرلىق جاراتۋ گرۋپپاسىنىڭ تاپقىرلىق جاراتقانىنا 10 جىل بولايىن دەپ قالدى. سونداي-اق ۇلتىمىز وقۋشىلارىنىڭ تاپقىرلىق جاراتۋ جاعىنداعى نەگىزى كۇشتى. مەكتەبىمىز وقۋشىلاردىڭ جالعاستى تاپقىرلىق جاراتۋعا دەم بەرىپ، ولار ءۇشىن قولايلى تەكشە جاراتادى،-دەدى.

　　ۇعىسۋعا قاراعاندا، التاي قالالىق 3-ورتا مەكتەپ وقۋشىلارى قۇرعان «ەديسون اۋىلدا» اتىنداعى تاپقىرلىق جاراتۋ گرۋپپاسىنداعى 5 وقىتۋشى مەن 40 نەشە وقۋشى 100 نەشە ءتۇرلى تاپقىرلىقتان مەملەكەتتىك پاتەنت ۇقىعىن الىپتى. «ەديسون اۋىلدا» اتىنداعى تاپقىرلىق جاراتۋ گرۋپپاسى قيمىلىنىڭ كۇن سايىن دامۋىنا ىلەسە، ايماقتىق ءبىلىم مەنشىك ۇقىعى مەكەمەسى ءار جىلى بۇل مەكتەپكە پاتەنت ۇقىعىنىڭ ءوتىنىش قاراجاتى مەن قيمىل قاراجارتى ءۇشىن جەكە-جەكە 10 مىڭ يۋاننان قارجى بەرىپ، قولداۋ كورسەتىپ كەلەدى ەكەن. سۋرەتتە: ءساۋىردىڭ 26-كۇنگى قيمىلدان قيمالار.

　　حابارىن جازىپ، سۋرەتىن تۇسىرگەن ساعىنبەك رابات ۇلى

　　كەلۋ قاينارى: حالىق تورابى