«ۇزدىك ساۋىنشىلاردى ساراپتاۋ» قيمىلى وتكىزىلدى

ءومىرجان سەيسەنقۇل ۇلى ۇلتتار باسپاسى

2015.05.19 16:15   كەلۋ قاينارى : حالىق تورابى

　　مامىردىڭ 16-كۇنى ۇلتتىق بوياۋىن بويىنا قانىق سىڭىرگەن، ۇلتىمىزدىڭ ايەلدەرىنىڭ اسىل قاسيەتىن تاعى ءبىر قىرىنان ايگىلەيتىن تاماشا ءبىر قيمىل ىلە قازاق اۆتونوميالى وبىلىسى تەكەس اۋدانى شولاقتەرەك قالاشىق مويىنجول قىستاعىندا دابىرالى تويلانىپ ءوتتى. قالاشىق ايەلدەر بىرلەستىك ۇيىمى باس بولىپ ۇلتتىق مادەنيەتكە مۇراگەرلىك ەتىپ، «ۇزدىك ساۋىنشىلاردى ساراپتاۋ» سىندى قيمىلدى الىپ بارىپ، حالقىمىزدا ەجەلدەن كەلە جاتقان مال باعىمشىلىعىن جوعارى ورەگە كوتەرىپ، مال ناسىلدىلىگىن ساپالاندىرىپ، ساۋىنشىلىق ارقىلى وتباسى ايەلدەرىنىڭ كىرىس كوزىن اشۋعا جۇمىلدىرسا، ءبىر جاعىنان وسى ۇلتتىق بوياۋدى ارتتاعى جاس ايەلدەر قاۋىمىنا ونەگە ەتتى.

　　جارىس بەلگىلى مەرزىم ىشىندە، سيىردى ءارى تەز ءارى تولىق يدىرىپ ساۋۋ، شەبەرلىكپەن توكپەي-شاشپاي ساۋۋ، كوپ ساۋۋ سىندى شارتتارمەن شەبەرلەردى تاڭداپ سارالادى. سوڭىندا ەركەقان، قىمبات، بازارقان سىندى ءۇش جۇلدەگەردى سارالاپ شىعۋدان سىرت اۋىل اراسىندا احلاعى، ونەگەسى جاقسى، ۇلتتىق ءداستۇردى قانىق بىلەتىن، يبالى «5 جاقسى كەلىن» دى سارالاۋ، «قىراق قۇس باعالاۋ»، «كۇش اتاسى»، «كوكپار تارتۋ» سەكىلدى جاستارعا بەرەتىن ۇلتتىق تاربيەسى جوعارى ۇلتتىق ويىنداردى الىپ بارىپ قيمىلدىڭ مازمۇنىن بايىتىپ، اۋىل قاۋىمىنىڭ العىسىنا بولەندى.

　　كەلۋ قاينارى: حالىق تورابى