«تارباعاتاي» جۋرنالىنىڭ بەيجيڭگە ارنالعان سانىن تاراتۋ سالتى ءوتتى

2015.05.25 14:37   كەلۋ قاينارى : حالىق تورابى

　　حالىق تورابى، 25 - مامىر، بەيجيڭ. «تارباعاتاي» جۋرنالىنىڭ بەيجيڭگە ارنالعان سانىن تاراتۋ سالتى 2015-جىلى 23 - مامىر تۇستەن كەيىن ساعات 2:30دا، بەيجيڭدەگى ۇلتتار باسپاسىنىڭ جيىن زالىندا وتكىزىلدى. جۋرنالدىڭ تاراتىلۋ سالتىنا ۇلتتار باسپاسىنىڭ قازاق رەداكسياسى، ورتالىق حالىق راديو ستانسياسىنىڭ قازاق راديوسى، ورتالىق ۇلتتار ۋنيۆەرسيتەتى قازاق ءتىل-ادەبيەت فاكۋلتەتى، ورتالىق اۋدارما مەكەمەسىنىڭ قازاق ءبولىمى، ۇلتتار جۋرنالىنىڭ قازاق رەداكسياسى، حالىق تورابىنىڭ قازاقشا ارناسى، ورتالىق تەلەۆيزيا تورابىنىڭ قازاقشا ارناسى، جۇڭگو قازاق راديو تورابى سىندى مەكەمە - ورىنداردان ۋاكىلدەر جانە وسى جۋرنالعا شىعارمالارى جاريالانعان اۆتورلار قاتىناستى.

　　جينالىستىڭ باستالۋ ءسوزىن ۇلتتار باسپاسى باس رەداكتورىنىڭ كومەكشىسى مۇناي ءابىلباي ۇلى باستادى. «تارباعاتاي» جۋرنالىنىڭ باس رەداكتورى مادەنيەت مۇقاتاي ۇلى جۋرنال جايلى قىسقاشا تانىستىرۋ جاساپ، كوپشىلىكتەن جۋرنالدىڭ ەندىگى جەردەگى بەتالىسى تۋرالى قۇندى پكىرلەر بەرۋىن ۇسىندى. جينالىسقا كەلگەن بەيجيڭدەگى اقپارات - باسپا ءسوز سالاسىنداعى مايتالمان ماماندار، ورەلى وقىرماندار جۋرنالدىڭ بۇرىنعى جەتكەن تابىسىن ايتا كەلىپ، ەرتەڭگى جەتەر بيىگىنە دەگەن قۇندى ۇسىنىس پىكىرلەرىن ورتاعا سالدى. تالقىدا جۋرنالدىڭ باس رەداكتورى مادەنيەت مۇقاتاي ۇلى قازىرگى زامان اۋقىمىنا ساي جۋرنالعا ارنالىپ ارناۋلى ۋيچات تەكشەسىن قۇرعاندىعىن، الداعى جوسپاردا جۋرنالدىڭ قازاقشا سايتىن اشىپ قازاقءتىلىن سۇيەتىن ينتەرنەت اۋماعىنداعى توراپ وقىرماندارىنىڭ جۋرنالمەن تانىسىپ، ادەبي ءنار الىپ، حالقىمىزدىڭ قاتپارى مول قاستەرلى مادەنيەتىمەن، قارا سوزدەن قايماق تۇسىرىپ، ولەڭنەن ورنەك ورەتىن مايتالمان قالامگەرلەردىڭ شىعارماسىمەن سۋسىنداتپاقشى بولعان ورەلى ويىندا تالقىعا جينالعان حالايىقپەن ءبولىستى. شاۋەشەك قالاسىنىڭ باستىعى رومان تاۋقان ۇلى جين سوڭىن جيناقتاي كەلە، بەيجيڭدەگى احبارات-باسپا ءسوز سالاسىندا ەڭبەكتەنىپ، ەلى ءۇشىن تەر توككەن، حالقىنىڭ قالاۋلىسى، ۇلتىنىڭ ماقتانىشى بولعان اعا بۋىن پەنسيونەر قارتتاردىڭ، جينالىسقا كەلگەن مەكە ورىنداردىڭ ۋاكىلدەرىنىڭ وسى ءبىر سوناۋ الىس اتا مەكەندە انا ءتىل ءۇشىن ارىماي ەڭبەك ەتىپ جاتقان ادەبي كوركەم جۋرنال «تارباعاتاي» جۋرنالىن قولداپ - قۋاتتاعاندارىنا شىنايى العىسىن ءبىلدىردى جانە وسى تالقى جيىننىڭ اشىلۋىنا قولداۋشى بولىپ كەلگەن تارباعاتاي ايماقتىق جەركومنىڭ تۇراقتى مۇشەسى ءالميراعا راحىمەتىن ايتتى.

　　كەلۋ قاينارى: حالىق تورابى