ءانۋار تەمىردىڭ «قايىرىمدى ناۋايحاناسى»

2015.05.28 14:03   كەلۋ قاينارى : حالىق تورابى

ءانۋار تەمىر نان جاۋىپ قاربالاستىققا تۇسۋدە.

　　شينجياڭ ۇيعۇر اۆتونوميالى رايونى قۇرىلعاندىعىنىڭ 60 جىلدىعىنا ـــ شينجياڭدىقتاردىڭ ءبىر كۇنى

　　ءانۋار تەمىردىڭ «قايىرىمدى ناۋايحاناسى»

　　11 – مامىر، قاپىرىق ىستىق، ءۇپ ەتكەن جەل جوق. كۇشار اۋدانى ياحا قالاشىعى ورتا مەكتەبىنىڭ ماڭىنداعى دۇكەن الدىندا بەلىنە شالعىش تارتىپ، نان جاۋىپ جاتقان ءانۋار تەمىر ورامالمەن سامايىنان اققان تەرىن ءسۇرتتى.

　　وت جالىنى تونار اۋزىنان سىرتقا قاراي جالاڭدايدى، ءانۋار تەمىر ەڭكەيىپ ناندى تونارعا شاپتاپ قايتا تۇرەگەلگەنشە، جالىن شارپىعان بەتى قىپ – قىزىل بولىپ كەتەدى.

　　ءانۋار تەمىر 20 جىلدان بەرى نان جابۋدى كاسىپ ەتىپ كەلەدى، ءار كۇنى ۇقساس تۇرمىستى قايتالايدى: تاڭەرتەڭ ساعات 6-دا ۋاعىندا ورنىنان تۇرىپ، نان يلەپ، اشىتادى، پياز تۋرايدى، وت جاعادى؛ ونان سوڭ، قامىردى دوڭگەلەكتەپ جاساپ، ونى جايىپ، وعان «گۇل» باسادى؛ ساعات 9-دا پياز قوسىلعان نان پىسىرادى؛ 11-دەن كەيىن جۇمىرتقا ارالاستىرىپ، وقۋشىلارعا بولكا پىسىرادى؛ تۇستەن كەيىن، وقۋشىلاردىڭ ساباقتان تۇسۋىنە ۇلگىرتىپ، 190 ءسۇت قوسىلعان نان جابادى...

　　تۇسكى تاماق مەزگىلىندە ءتىلشىنىڭ كوزى مىناداي ءبىر كورىنىستى شالىپ قالدى: ءانۋار تەمىردىڭ ناۋايحاناسىنا وقۋشىلار تولىپ كەتتى، وقۋشىلاردىڭ كەيبىرەۋىنىڭ قولىندا اقشا بولسا، كەيبىرەۋىنىڭ قولىندا بەلەتى بار، بەلەتكە «ءانۋارجان حورەكتىك نان شايحاناسىنىڭ نان بەلەتى» دەپ جازىلعان. بۇل تۇرمىسىندا قيىنشىلىعى بار وقۋشىلارعا ارنايى باستىرىلعان تەگىن نان الۋ بەلەتى، وسىنداي ءبىر دانا بەلەتپەن ءبىر نان الۋعا بولادى.

　　ءاسىلى ءانۋار تەمىر دۇكەنىنە كەلىپ تاماقتاناتىن وقۋشىلاردىڭ ىشىندە ءبىرتالاي وقۋشىنىڭ وتباسىندا قيىنشىلىعى بار ەكەنىن بايقاعان، وقۋشىلاردىڭ جاقسى تاماقتانۋى ءۇشىن، ول ايەلىمەن اقىلداسىپ، نانعا ءسۇت پەن جۇمىرتقا قوسىپ پىسىرىپ، قيىنشىلىعى بار وقۋشىلارعا تەگىن تاراتقان.

　　الميرا قۇدايبەردى ياحا قالاشىعى ورتا مەكتەبىنىڭ 7 – جىلدىق وقۋشىسى، ول وسى دۇكەننەن ءبىر جىلدان بەرى تەگىن نان الىپ كەلەدى، ءبىر تيىن تاپسىرىپ كورمەگەن. ول: «ءانۋار اعانىڭ ناۋايحاناسىنان تۇسكى تاماق جەپ جۇرگەلى ءبىر جىلدان استى، ول اقشا الىپ كورگەن جوق. ەرجەتكەن سوڭ ونىڭ ەڭبەگىن اقتايتىن بولامىن»، - دەيدى.

　　تىلشىلىك بارىسىندا ءانۋار تەمىردىڭ ايتۋىنشا، ءبىر جولى ونىڭ قولفونىنا بەيجيڭنەن ءبىر تەلەفون كەلەدى. ول تەلەگراف الدامشىلارى بولار دەپ ويلاپ، قابىلداماي قويادى. ءبىراق، تەلەفون قايتا – قايتا كەلە بەرەدى.

　　«اعاي، مەنمىن – عوي. ەسىڭىزدە بارمىن با؟ سىزگە ءبىر جاقسى حابار ايتايىن، مەن ءسىزدىڭ ناۋايحانانىڭ نانىن جەپ ەرجەتتىم، قازىر ورتالىق ۇلتتار ۋنيۆەرسيتەتىنە وقۋعا قابىلداندىم ...» ءانۋار تەمىر بۇل بالانىڭ تەلەفونىن قابىلداعاننان كەيىن كوزىنە جاس الدى. وسى ىستەن سوڭ ول تەك تەر توگۋ مەن تاباندىلىق بولسا «تابىسقا جەتۋگە» بولاتىنىنا قاپىسىز سەندى.

　　كوپ جىلداردان بەرى، ءار كۇنى تۇستە ءانۋار تەمىردىڭ ناۋايحاناسىنان 190 بالا تەگىن تاماق جەگەن. ياحا قالاشىعىنداعى 140 وقۋشىدان سىرت، ول كۇشار اۋداندىق 3 – ورتا مەكتەپتەگى قيىنشىلىعى بار بالالارعا 50 نان جەتكىزىپ وتىرعان.

　　ءانۋار تەمىر كۇن سايىن 30 يۋانداي اقشا جۇمساپ، كۇشار اۋدانىنا نان جەتكىزەدى، ءبىر تاكسي شوفەرى بۇل جاعدايدان حاباردار بولعاننان كەيىن، ونى ءوزى ىزدەپ تاۋىپ، مەكتەپكە تەگىن جەتكىزىپ قويۋعا پەيىل ەكەنىن ايتقان. ول جۇزىنەن كۇلكى ۇيىرىلە: جاقسىلىقتان جاقسىلىق تۋىندايدى، - دەگەن وسى بولار دەيدى.

　　يگى ءىس ەلگە تارالدى. ياحا قالاشىعىنىڭ باسشىلارى بۇل ءىستى بىلگەننەن كەيىن، اتالعان قالاشىقتاعى ورتا مەكتەپپەن بىرلەسە وتىرىپ، ونىڭ ناۋايحاناسىنىڭ ماياقىسىن كەشىرىم ەتىپ، ونىڭ يگى ءىسىن جالعاستىرۋىنا كومەكتەستى. قازىرگە دەيىن، ءانۋار تەمىردىڭ ناۋايحاناسى كۇشار اۋدانىنداعى ون جىل بويى نان باعاسىن وسىرمەگەن «قايىرىمدى ناۋايحانا»: ءبىر ناننىڭ باعاسى ءبىر يۋان.

　　ءانۋار تەمىر قۋانىشتى كوڭىلمەن: «شاكىرتتەرىم ىسكە جاراعان كەزدە، ولارعا دا مەكتەپ ماڭىنان دۇكەن اشتىرىپ، قيىنشىلىعى بار وقۋشىلارعا كومەكتەستىرەمىن. وسىلاي بولعاندا، بىردەن – بىرگە تاراپ، جاقسىلاردىڭ قاراسى مولايا تۇسەدى»، - دەيدى.

　　ءالى ىمىرىت ۇيىرىلمەسە دە، ءانۋار تەمىر ەرتەدەن دەمالۋعا قامداندى: «ەرتە ۇيىقتاۋىم كەرەك، ەرتەڭ ەرتە تۇرىپ وقۋشىلارعا نان جابامىن»، - دەيدى ول. (ءتاڭىرتاۋ تورابىنىڭ ءتىلشىسى لي مين)

　　كەلۋ قاينارى: حالىق تورابى