از ۇلتتار سپورت جارىسىنداعى الاۋ جالعاۋشى قازاق قىزى

2015.08.18 14:38   كەلۋ قاينارى : حالىق تورابى

　　حالىق تورابى، 14 – تامىز، وردوس. وردوستا وتكىزىلگەن از ۇلتتار سپورت جارىسىنىڭ الاۋىن تۇتاندىرۋ جانە الاۋ جالعاۋدى باستاۋ سالتىندا ەلىمىزدەگى 56 ۇلتتان 56 ۋاكىل الاۋ جالعاۋ ءىس – شاراسىنا قاتىناستى. قازاق ۇلتىنىڭ ۋاكىلى رەتىندە كۇنبيكە ەسىمدى ارۋىمىز الاۋ جالعاۋشى بولدى.

　　كۇنبيكە بيىل 21 جاستا، شينجياڭ كوركەمونەر ينيستيتۋتىنىڭ كينو – تەاتر فاكۋلتەتى حانزۋشا جۇرگىزۋشىلىك كاسىبىندە وقيدى.

　　كۇنبيكە: قازاق ۇلتىنا ۋاكىل رەتىندە وسىنداي سالتاناتتى جارىسقا قاتىناسىپ وتىرعانىمدى ماقتانىش ەتەمىن. بۇل جولى ورنالاستىرىلعان مىندەتتى ورىنداۋدان سىرت، وزگە ۇلت وكىلدەرىمەن تانىستىق، وردوستىڭ اسەمدىگى مەن گۇلدەنگەن بەينەسىن كوزىمىزبەن كوردىك، ىشكى موڭعۇل ساحاراسىنىڭ كوركىن تاماشالادىق، ىشكى موڭعۇلعا، وردوس قالاسىنا تىلەكتەسپىن، ىستەرى ىلگەرى بولسىن، - دەدى.

　　كۇنبيكە نۇر قىزى 2014 – جىلى قاڭتار ايىندا جۇڭگوداعى 56 ۇلت اراسىندا وتكىزىلگەن 3 - رەتكى قىز سىنى بايقاۋىندا باس جۇلدەنى جەڭىپ الدى، بۇل بايقاۋعا تۇڭعىش رەت قاتىناسقان كۇنبيكە ءوز ونەرى، كوركى، تالانتىمەن 56 ۇلتتىڭ گۇلى اتاندى. كۇنبيكە قازاق، حانزۋ، اعىلشىن تىلدەرىندە ەمىن – ەركىن سويلەيدى، دومبىرا شەرتىپ، ءبي بيلەيدى. ءتۇرلى سايىستارعا قاتىناسىپ، تالاي رەت جەڭىس تورىنەن كورىنگەن، «شينجياڭ ارۋى» بايقاۋىنىڭ جەڭىمپازى اتانعان. جۇڭگوداعى باستى تەلەارنالاردا جۇرگىزۋشى بولۋدى ارماندايدى.

　　كەلۋ قاينارى: حالىق تورابى