ىلە وبلىسىنىڭ 18 – كەزەكتى اقىندار ايتىسى باستالدى

2016.07.22 14:15   كەلۋ قاينارى : حالىق تورابى

　　حالىق تورابى، 22 – شىلدە، بەيجيڭ. ءتاڭىرتاۋ تورابىنىڭ حابارلاۋىنشا، ىلە قازاق اۆتونوميالى وبلىسىنىڭ 18 – كەزەكتى اقىندار ايتىسى بۋرىلتوعاي اۋدانىنىڭ كورىكتى ەكى وتكەن جايلاۋىندا شىمىلدىعىن اشتى. وبلىستىڭ اقىندار ايتىسى 3 جىلدا ءبىر رەت وتكىزىلەدى.

　　وسى رەتكى اقىندار ايتىسىن ىلە قازاق اۆتونوميالى وبلىستىق پارتكوم مەن ۇكىمەت ۇيىمداستىرعان، التاي ايماقتىق اكىمشىلىك مەكەمەسى وتكىزگەن. 3 كۇن وتكىزىلەتىن اقىندار ايتىسىندا قازاقتىڭ ايتىس ونەرى نەگىز ەتىلىپ، كۇي ونەرى، تەرمە ايتۋ، قيسا – داستان ايتۋ، قوبىز تارتۋ قاتارلى جارىستار مەن ۇلتتىق سپورت تۇرلەرى دە قامتىلادى.

　　اشىلۋ سالتىندا، التاي ايماقتىق پارتكوم شۋجيىنىڭ ورىنباسارى، ايماق ءۋاليى تالعات ۇسەن ۇلى بىلاي دەدى: التاي ايماعى وسى رەتكى اقىندار ايتىسىن وراي ەتە وتىرىپ، اقىندار ايتىسىنىڭ رۋحاني مانەرىن اناعۇرلىم تەرەڭدەي ءتۇسىنىپ جانە وعان مۇراگەرلىك ەتىپ، اقىندار ايتىسىنىڭ فورماسى مەن مازمۇنىن ۇزدىكسىز بايىتىپ، اناعۇرلىم مول، اناعۇرلىم تاماشا مادەنيەت – كوركەمونەر تۋىندىلارىن جاراتۋدى تەزدەتەدى. سونىمەن بىرگە، التاي ايماعى جوعارى دەڭگەي،قاتاڭ تالاپ، مۇقيات جاۋاپكەرشىلىكپەن وسى رەتكى ايتىستىڭ «داياشىلىعىن» ويداعىداي اتقارىپ، ايتىس تويىنىڭ تابىستى وتكىزىلۋىنە كەپىلدىك ەتەدى. اقىنداردىڭ وسى ورايدان پايدالانا وتىرىپ، اقىندىق ونەرلەرىن تولىق ايگىلەۋىن ءۇمىت ەتەمىز.

　　2006 – جىلى ەلىمىزدىڭ بەيزاتتىق مادەني مۇرالاردى قورعاۋ ينجەنەرياسىنىڭ جاپپاي اتقارىلۋىنا بايلانىستى، قازاقتىڭ اقىندار ايتىسى العاشقى توپتا مەملەكەتتىك بەيزاتتىق مادەني مۇرالار تىزىمىنە ەنگىزىلگەن. اقىندار ايتىسىن وتكىزۋدىڭ ماقساتى ــ قازاقتىڭ حالىقتىق مادەنيەتىن جالعاستىراتىن كوركەمونەر دارىندىلارىن بايقاۋ، جەتىلدىرۋ ارقىلى اتادان ميراس قالعان ايتىس ءداستۇرىن ونان دا بيىك ورەگە كوتەرۋ، حالىقتىق قازىنامىزدى بۇكىل ەلگە، دۇنيە جۇزىنە تانىمالى ەتۋ.

　　كەلۋ قاينارى: حالىق تورابى