موڭعۇلكۇرەدەگى جىلقى مادەنيەتى مۇراجايى

2016.09.29 13:37   كەلۋ قاينارى : حالىق تورابى

　　كوشپەندىلەر ءۇشىن جىلقى تۇلىگىنىڭ ورنى ەرەكشە، «ەر قاناتى ــ ات» دەگەن قازاق حالقى جىلقى تۇلىگىن ايىرىقشا جوعارى باعالاپ، عاسىرلار بويى جىلقى تۇلىگىن مىنىسكە، ۇرىس مايدانىنا پايدالانعان، ۇلان اسىر تويدا، بايلاردىڭ اسىندا ات شاپتىرىپ، بايگە سالعان.

　　ىلە تۇلپارىنىڭ مەكەنى ــ موڭعۇلكۇرە اۋدانى جىلقى شارۋاشىلىعىنا ەرەكشە ءمان بەرىپ، وسى ارقىلى ساياحات كاسىبىنە دەم بەرىپ وتىرعان اۋدان. اۋداندا جىلقى مادەنيەتى مۇراجايى جاڭادان سالىنىپ بىتۋگە تاياعان، مۇراجايدان جىلقى تۇلىگى تۋرالى، جىلقى شارۋاشىلىعىنىڭ موڭعۇلكۇرەدەگى جاعدايى تۋرالى مول مالىمەتتەرگە يە بولۋعا بولادى.

　　مۇراجايدىڭ قابىرعالارىنا ىلىنگەن تاقتالاردا جىلقى تۇلىگى تۋرالى قازاقشا، حانزۋشا، اعىلشىنشا تولىق تۇسىنىكتەمەلەر بەرىلەۋدەن سىرت، اعاش بۇتاقتارىنا ەلىكتەپ جاسالعان شاعىن ەكراندى تۇعىرلاردان مول ماعلۇماتتاردى كورە الاسىز.

　　مۇنان سىرت، مۇراجاي قابىرعالارىنا قازاقتىڭ جىلقىعا بايلانىستى ۇلتتىق سالت – ءداستۇر، سپورت ويىندارى مەن ات – ابزەلدەرىنىڭ سۋرەتتەرى ءىلىنىپ، تۇسىنىكتەمەلەر جازىلعان. بۇل مۇراجايدا كولەمدى كىتاپحانا دا قۇرىلۋ ۇستىندە، كىتاپحاناعا تەك قانا جىلقى تۇلىگى تۋرالى كىتاپتار جيناستىرىلاتىن بولادى.

　　مۇراجايدى تاماشالاۋشىلار قابىرعاداعى ەكراننان جىلقى تۇلىگى تۋرالى سۇراۋلارعا جاۋاپ بەرۋ ارقىلى قىزىقتى ويىنعا قاتىناسا الادى، مۇراجاي قىزمەتكەرىنىڭ تانىستىرۋىنشا، الدا كومپيۋتەرلىك جۇيەدەن پايدالانعان ەلىكتەمەلى ويىندار دا ىسكە قوسىلادى. (نۇرعيسا قۇرمانجان ۇلى)

　　كەلۋ قاينارى: حالىق تورابى