ىنتىماق، ۇشتاسۋ بوپ ۇراندارى، باس قوستى قازاعىمنىڭ ۇلاندارى

قازاق ستۋدەنتتەرىنىڭ 14 – كەزەكتى «ۇشتاس» ساۋىق كەشى ورتالىق ۇلتتار ۋنيۆەرسيتەتىندە وتكىزىلدى

2016.10.08 14:13   كەلۋ قاينارى : حالىق تورابى

　　حالىق تورابى، 1 - قازان، بەيجيڭ. قازاق ستۋدەنتتەرىنىڭ 14 – كەزەكتى «ۇشتاس» تەڭبل دوپ دوداسى بايلانىسىمەن ۇيىمداستىرىلعان ساۋىق كەش 30 – قىركۇيەك كەشتە ورتالىق ۇلتتار ۋنيۆەرسيتەتىنىڭ ۇلكەن زالىندا وتكىزىلدى، اسقاق ءان شىرقالىپ، كۇمبىرلى كۇي ورىندالدى، بويجەتكەندەر مەن بوز بالالار بۇرالا بيگە باستى.

　　ساۋىق كەشتىڭ بەتاشارى ايدانا ساعىمبەك قىزىنىڭ «ۇشتاس» اتتى مانەرلى ولەڭمەن اشىلدى، سوڭىنان توپتىق كۇي ورىندالىپ، حالقىمىزدىڭ قادىرلى ءبيى قارا جورعاعا كەزەك بەرىلدى. اقتىلەۋ اقمان ۇلى مەن قۋانىش ازات ۇلى «اۋىل ساعىنىشى» ءانىن شىرقاپ، ستۋدەنتتەردىڭ جۇرەك قىلىن ءداپ باسقانداي بولسا، نۇريلا مۇقتار قىزى «بۇلبۇل» ءانىن ناشىنا كەلتىرە ورىندادى. سوڭىنان مارفۋعا ابدىقايىڭ قىزى مەن تاڭنۇر زىكىر قىزى «اڭشى مەن بۇعى» اتتى بوگەنايى بولەك ءبيدى كورەرمەنگە ۇسىنسا، ايدانا قابيدوللا قىزى «قسىمەت» ءانىن قىسىلماي ورىندادى.

　　وسى ارەدىكتە ەرتەڭگى فۋتبول دوداسىنا قاتىناساتىن 32 كوماندانىڭ جەرەبە تارتۋ كەزەڭى وتكىزىلدى، كوماندا كاپيتاندارى ساحناعا شىعىپ شار سۋىرىپ، جەرەبە تارتۋ جۇرت الدىندا ءادىل وتكىزىلدى.

　　جەرەبە تارتۋ اقىرلاسا سالا، ورالبەك سەرىك ۇلى «تۇنگى قالا» انىمەن تەربەسە،، ورتالىق ۇلتتار ۋنيۆەرسيتەتى دايىندىق ينستيتۋتىنىڭ ستۋدەنتتەرى «سۇلتان» اتتى توپتىق بيمەن تاعى ءبىر جەلپىندىرىپ تاستادى. ماعجان جۇمان ۇلى «حانىشايىم» انىمەن كورەرمەن كوڭىلىنەن جول تاپتى. ءتىل – ادەبيەت فاكۋلتەتىنىڭ ستۋدەنتتەرى قازىر بەلەڭ بەرگەن ۋيچات توڭىرەگىندەگى كەلەڭسىزدىكتەر تۋرالى «ەكىنشى رەت» اتتى كومەديانى ورىنداپ، كورەرمەندى كۇلدىرە وتىرىپ ويلانتتى. ۇشقىن نۇردىن ۇلى «اسپانعا قارايمىن» انىمەن جەلپىنتىپ، قاستەر جەڭىسپەك ۇلى «تولعاۋ» اتتى تەرمەمەن سۋسىنداتتى. ءتىل – ادەبيەت فاكۋلتەتىنىڭ ستۋدەنتتەرى ويناقى «يسپانيا بيىمەن» ساۋىق كەشتى ءبىر ورلەۋگە كوتەرىپ، ەڭ سوڭىندا سەرپىل، ايشۇعا، نۇرگۇل ۇشەۋى ورىنداعان «قۋانىشىم مەنىڭ» انىمەن ساۋىق كەشتىڭ سالتاناتى اقىرلاستى.

　　ەستەرىڭىزگە سالا كەتسەك، ءار كەزەكتى «ۇشتاس» فۋتبول جارىسى مەن ساۋىق كەش، اقىندار ايتىسى قاتارلى ءبىرقىدىرۋ سپورتتىق جانە مادەني شارالاردى ۇلتتار ۋنيۆەرسيتەتى قازاق ءتىل – ادەبيەت فاكۋلتەتىنىڭ وقۋ تاۋىساتىن جىلدىقتاعى ستۋدەنتتەرى ۇيىمداستىرىپ وتكىزۋ سالتقا اينالعان، بيىل «ۇشتاس» فۋتبول دوداسى مەن ساۋىق كەشتى جانە اقىندار ايتىسىن وسى فاكۋلتەتتىڭ 2012 – جىلدىق ستۋدەنتتەرى شىپ – شىرعاسىن شىعارماي، ويداعىداي ۇيىمداستىردى.

　　كەلۋ قاينارى: حالىق تورابى