قازاقستان مەن جۇڭگونىڭ ديپلوماتيالىق قارىم – قاتىناس ورناتقاندىعىنىڭ 25 جىلدىعىنا ارنالعان سالتاناتتى ساۋىق كەش بەيجيڭدە وتكىزىلدى

2016.12.14 15:11   كەلۋ قاينارى : حالىق تورابى

　　حالىق تورابى، 14 – جەلتوقسان، بەيجيڭ. قازاقستان مەن جۇڭگونىڭ ديپلوماتيالىق قارىم – قاتىناس ورناتقاندىعىنا 25 جىل تولۋىنا وراي، ەلىمىزدىڭ مادەنيەت مينيسترلىگى مەن قازاقستاننىڭ جۇڭگودا تۇراتىن ەلشىحاناسى بىرلىكتە ۇيىمداستىرعان سالتاناتتى ساۋىق كەش 13 – جەلتوقسان بەيجيڭ مۋزيكا زالىندا وتكىزىلدى.

　　ساۋىق كەش شىمىلدىعىن «سازگەن سازى» فولكلورلىق - ەتنوگرافيالىق ءانسامبلى باستادى، ىلە – شالا جۇڭگو مادەنيەت مينيسترلىگىنىڭ شەتەلمەن مادەني بايلانىس مەكەمەسىنىڭ باستىعى، پارتكوم شۋجيى شيە جينيىڭ مىرزا مەن قازاقستاننىڭ جۇڭگودا تۇراتىن باس ەلشىسى شاحرات نۇرىشەۆ جەكە – جەكە ءسوز سويلەپ، ەكى ەلدىڭ 25 جىلدان بەرى تاتۋ كورشى، سەنىمدى سەرىك بولعاندىعىن، ٵر سالاداعى سەلبەستىكتىڭ دە اياق الىسىنىڭ جاقسى ەكەندىگىن اتاپ ٶتتى. ونان سوڭ جالعاسىن تاپقان ساۋىق كەشتە «تۇران توبى»، بەرەكە ەنكەبايەۆا، «ءىل كانتو» كۆارتەتى، دۋلات توقانوۆ قاتارلى قازاقستان ونەر جۇلدىزدارى قازاقتىڭ اسەم ٵن – ءتاتتى كۇيىمەن تىڭدارمانداردىڭ قۇلاق قۇرىشىن قاندىرسا، ەلىمىزدىڭ جوعارى داۋىستى ٵنشىسى چى ليميڭ، «ماجيۋۇيە» جۇڭگو جاڭا حالىقتىق مۋزيكا اسپاپتارى ۇيىرمەسى قاتارلى ەلىمىز ونەرپازدارى دا الىستان ات تەرلەتىپ كەلگەن قوناقتارعا «اۋىلدىڭ التى اۋىزىن» شىرقادى. ەكى ەل دوستىعىنىڭ كۋاسىنداي بولعان ساۋىق كەشكە بەيجيڭدەگى ٵر سالا قايراتكەرلەرى مەن ارنايى شاقىرىلعان سيلى قوناقتار قاتىناستى، مۇنان سىرت، بەيجيڭدە وقىپ جاتقان قازاقستان ستۋدەنتتەرى مەن قازاقتىڭ ٵن – كۇيىنە اۋەس وزگە ۇلت ۋاكىلدەرى قاتىناستى.

　　كەلۋ قاينارى: حالىق تورابى