قاراجوننان قالىقتادى ءان مەن جىر

حابارىن جازىپ سۋرەتتەرىن تۇسىرگەن باقىتبەك ءجۇمادىل ۇلى،  تاسقىن مازاق ۇلى 

2017.07.27 13:39   كەلۋ قاينارى : حالىق تورابى

　　دۇنيە جۇزىلىك جاراتىلستىق مۇراعاتتار تىزىمدىگىنە ەنگەن 5A دارەجەلى كورىنىس رايونى، ءجاننات مەكەن قاراجون جايلاۋىندا 23 - شىلدە كۇنى تەكەس اۋدانىنىڭ «ءتاڭىرتاۋ مادەنيەت ساياحات ماۋسىمى» جەلىلەس قيمىلدارىنىڭ ءبىرى بولعان 24 - كەزەكتى اقىندار ايتىسى شىمىلدىعىن اشتى.

　　تەكەس اۋدانىنىڭ ءارقايسى اۋىل، قالاشىقتارىنان قاراجون جايلاۋىنا شىققان مالشى قاۋىم، «توي دەسە قۋ باس دومالايدى» دەگەندەي ولەڭ تويدىڭ حابارىن ەستىپ بارعان ءار ۇلت حالىق بۇقاراسى مەن رايونىمىزدىڭ ءىشى- سىرتىنان كەلگەن ساياحاتشىلار بولىپ، 10 مىڭنان استام ادام بۇل رەتكى ايتىستى تاماشالادى. تەكەس اۋدانىنىڭ ءتورت باسشىلىق القاسىنداعى باسشىلار دا ارنايى بارىپ وسى يگى ءىستىڭ باسى - قاسىندا بولدى. تەكەس اۋداندىق حالىق قۇرىلتايى تۇراقتى كوميتەتىنىڭ مەڭگەرۋشسى ءنۇسىپ ايتجان ۇلى ءسوز سويلەپ، ايتىستىڭ باستالعاندىعىن جاريالادى.

　　ءبىر جىلدا ءبىر رەت وتكىزىلەتىن تەكەس اۋدانىنىڭ اقىندار ايتىسى ساحاراداعى مالشى قاۋىمنىڭ رۋحاني تۇرمىسىن بايىتىپ قالماستان، اۋدانداعى ءار ۇلت بۇقاراسىنىڭ ءوزارا بارىس - كەلىس جاساۋىن، كوڭىل - كۇيلەرىنىڭ توعىسۋىن جەبەۋگە تاماشا تەكشە ازىرلەۋمەن بىرگە «ۇلتتار ىنتىماعىنىڭ بەرەكەلى شاڭىراعى قيمىلىن» جانداندىرۋعا دا وڭتايلى وراي بولدى.

　　وسى رەتكى ايتىس «شارۋالار شاتتىعى» اتىنداعى ادەبيەت - كوركەمونەر نومىرلەرىمەن باستالىپ، تەكەستىڭ ءتول تۋماسى كۇيشى، كومپوزيتور اكيما دوسمىرزا ۇلى مەن مەملەكەتتىك بۇقارالىق مادەنيەتتىڭ تەتە اعا زەرتتەۋشىسى، كۇيشى، كومپوزيتور نۇرىمباي سۇلەيمەن ۇلىنىڭ ەسەلى ەڭبەكتەرى تىلگە تيەك ەتىلىپ، قاراجون باۋارايىن ءان مەن جىرعا بولەدى. جىر دوداسىنا تۇسكەن اقىندار ۇلى وتانىمىزدى، پارتيانى جىرلاپ، تەكەس اۋدانىنىڭ جۋىق جىلداردان بەرى قول جەتكىزگەن تابىستارىن، قوعام ورنىقتىلعى مەن ۇلتتاردىڭ ۇلى ىنتىماعىن جىرعا قوسىپ، جيىلعان جۇرتقا وتكىر ءتىلدى ولەڭنەن شاشۋ شاشتى. ايتىس سوڭىندا 10، 15 كيلومەترلىك ات بايگەسى، 5 كيلومەترلىك قۇنان بايگە، كوكپار تارتۋ جانە بالۋان قاتارلى ءداستۇرلى دەنە تاربيە قيمىلدارى دا جيىلعان جۇرتتى باۋراپ، ولەڭ تويدىڭ مەرەيىن اسىرا ءتۇستى. وسى رەت تاعى جىلقى، سيىر، قوي تۇلىكتەرى بويىنشا اسىل تۇقىمدى مالدىڭ ءناسىل ساپاسىن سارالاۋ باسەكەسى دە وتكىزىلدى. جۇلدە العان تاڭداۋلى ءناسىلدى مالداردىڭ ولشەم رەكوردى تەكەس اۋدانىنىڭ مال شارۋاشىلىق قىزمەتىندەگى سۇبەلى تابىستارىن ءبىر قىرىنان ايگىلەدى.

　　قارا قىلدى قاق جارعان ءادىلقازىلاردىڭ باعاسى بويىنشا، جىر دوداسىنا تۇسكەن اقىنداردان باتىربەك جايداربەك ۇلى 1 - دارەجەلى، ۇلجان جۋرىن قىزى مەن بەردىبەك ايتبەك ۇلى 2 - دارەجەلى سيلىققا يە بولدى. سونىمەن بىرگە باسقا اۋدانداردان ارنايى شاقىرىلعان ءپاتىعالى مۇقان ۇلى، ۇمىتگۇل تۇرسىن قىزى، سالتانات جۇماجان قىزى قاتارلى اقىندارعا قۇرمەت كورسەتىلىپ، سيلىق بەرىلدى. تەرمەشى، كۇيشى ونەرپازدار دا ماراپاتقا يە بولدى.

　　قيمىل سوڭىندا، كەلەسى كەزەكتەگى اقىندار ايتىسىن كوكتەرەك قىرعىز ۇلتتىق اۋىلى ۇستىنە الىپ وتكىزەتىن بولىپ ايتىس گەربى مەن تۋى وتكىزىپ بەرىلدى.

　　كەلۋ قاينارى: حالىق تورابى