شينجياڭ پايزاۋات اۋدانىندا 6.4 بال جەر سىلكىنىسى تۋىلدى، قازىرشە ءولىم – ءجىتىم جايلى مالىمەت جوق

2020.01.20 16:07   كەلۋ قاينارى : حالىق تورابى

　　جۇڭگو جەر سىلكىنىس ستانسياسى تورىنىڭ رەسىمي ولشەۋىنە قاراعاندا، 1-ايدىڭ 19-كۇنى ساعات 21 دەن 27 مينۋت وتكەندە، شينجياڭ پايزاۋات اۋدانىندا 6.4 بال جەر سىلكىنىسى تۋىلعان، جەر سىلكىنىس قاينارى 16 كيلومەتر، سىلكىنىس ورتالىعى سولتۇستىك ەندىك 39.83 گرادۋس، شىعىس بويلىق 77.21 گرادۋسقا ورنالاسقان.

　　جەر سىلكىنىسى تۋىلعاندا، پايزاۋات اۋدانىنىڭ سىلكىنىس اسەرى كۇشتى بولىپ، تۇرعىندار ۇيىندە ءۇيدىڭ ۇزدىكسىز ءدىرىلىن سەزىنگەن، ءۇي ىشىندەگى اسپالى شامدار وڭدى – سولدى تەڭسەلىپ، ءبىرسىپىرا ادام سىرتقا شىعىپ تاسالانعان. توڭىرەگىندەگى قاشقار قالاسى، اقتاۋ اۋدانى، ۇلقشات اۋدانىندا دا سىلكىنىس اسەرى كورنەكتى بولعان.

　　ءتىلشىنىڭ ءپايزاۋات اۋداندىق پارتكومنان ۇعىسۋىنشا، قازىرگە دەيىن ءولىم – ءجىتىم جايلى مالىمەت تاپسىرىپ الماعان، اپاتقا ۇشىراۋ جاعدايى ساناققا الۋ ۇستىندە ەكەن، پايزاۋات اۋدانى، قاشقار قالاسى، يوپۇرعا اۋدانى جەر سىلكىنىس اترەتىنەن جيىنى 11 اۆتوكولىكپەن 53 ادام اپاتقا ۇشىراعان ورىنعا بارىپ اپات جاعدايىن انىقتايدى.

　　جەر سىلكىنىسى تۋىلعاننان كەيىن، جەرگىلىكتى ورىن، سونداي – اق توڭىرەگىندەگى اۋداندىق، قالالىق قارۋلى ساقشى، ءورت وشىرۋ، ەلەكتر قۋاتى قاتارلى تاراۋلار شۇعىل جاعدايعا توتەپ بەرۋگە دەر كەزىندە ءۇن قوسىپ، قۇتقارۋ كۇشتەرىن جيناپ بۇيرىق كۇتۋدە.

　　پايزاۋات اۋدانى تارىم ويپاتىنىڭ باتىس جيەگىنە ورنالاسقان. شينجياڭ ۇيعۇر اۆتونوميالى رايوندىق جەر سىلكىنىسىن باقىلاۋ مەكەمەسىنىڭ اڭىسىنا قاراعاندا، سىلكىنىس ورتالىعى پايزاۋات اۋدان قالاشىعىنان 56 كيلومەتر، قاشقار قالاسىنان 112 كيلومەتر، ءۇرىمجى قالاسىنان 970 كيلومەتر قاشىقتىقتا ەكەن.

　　كەلۋ قاينارى: حالىق تورابى