لي چياڭ جۇڭگو دامۋ جوعارى دارەجەلىلەر تالقى مىنبەرىنىڭ 2023 - جىلعى جىلدىق جينالىسىنا قاتىناسقان شەكارا سىرتىنداعى ۋاكىلدەرمەن كەزدەستى
2023.03.28 16:28 كەلۋ قاينارى : حالىق تورابى
شينحۋا اگەنتتىگى، 3 - ايدىڭ 27 - كۇنى، بەيجيڭ. مەملەكەتتىك كەڭەستىڭ زۇڭليى لي چياڭ 3 - ايدىڭ 27 - كۇنى تۇستەن كەيىن بەيجيڭدە جۇڭگو دامۋ جوعارى دارەجەلىلەر تالقى مىنبەرىنىڭ 2023 - جىلعى جىلدىق جينالىسىنا قاتىناسقان شەكارا سىرتىنداعى ۋاكىلدەرمەن كەزدەستى ءارى ولارمەن اڭگىمە ءماجىلىسىن وتكىزدى. قاتىستى ەلدەردىڭ ساياسي قايراتكەرلەرى، دۇنيە جۇزىندەگى 500 مىقتى كاسىپورىننىڭ جاۋاپتىلارى، حالىقارالىق ايگىلى عىلمي زەرتتەۋ قۇرىلىمدارىنىڭ مامان - وقىمىستىلارى، نەگىزگى حالىقارالىق ۇيىمداردىڭ ۋاكىلدەرى قاتارلىلار قاتىناستى.
لي چياڭ كوپشىلىكتىڭ جۇڭگونىڭ دامۋىنا كوپ جىلدان بەرى قوسقان ۇلەسىنە العىس ايتتى. ول بىلاي دەپ اتاپ كورسەتتى: قازىر دۇنيە ءجۇزى ەكونوميكاسىنىڭ دامۋى كۇردەلى دە قۇبىلمالى قيىنشىلىق كەزەڭىندە تۇر، كوپشىلىكتىڭ كوبىرەك وي جۇگىرتۋىنە، كوبىرەك تالقى جۇرگىزۋىنە، اۋىس - كۇيىستى كۇشەيتۋىنە تۋرا كەلەدى. حاۋىپ - قاتەر مەن سىن - سايىسقا توتەپ بەرۋدە، ەڭ اۋەلى، سەنىمدى بەكەمدەپ، مەجەنى ورنىقتىرۋ، اسىرەسە، كوز ايانى كەڭەيتىپ، الىسقا كوز جىبەرۋ كەرەك. بۇل، بەينە، جاڭبىرلى كۇنى جول جۇرگەنگە ۇقسايدى، ەگەر ۇنەمى باستى ەڭكەيتىپ اياعىمىزعا قاراساق، جەر باتپاق بولىپ كورىنەدى؛ ەگەر ۇنەمى باستى كوتەرىپ الدىڭعى جاققا قاراساق، جاڭبىردان كەيىنگى كەمپىرقوساقتى كورە الامىز. ءار جاق ورتاق تانىمدى كۇشەيتىپ، سەلبەستىكتى نىعايتىپ، دۇنيە ءجۇزى ەكونوميكاسىنىڭ قالپىنا كەلۋىن بىرگە جەبەۋى كەرەك.
لي چياڭ بىلاي دەپ دارىپتەدى: وتكەن 10 جىلدا شي جينپيڭ جولداستى ۇيىتقى ەتكەن پارتيا ورتالىق كوميتەتىنىڭ پارمەندى باسشىلىعىندا، جۇڭگو ەكونوميكاسى باستان - اياق ورنىقتى دامۋدى جالعاستىرىپ، دۇنيە ءجۇزى ەكونوميكاسىنىڭ ”ورنىقتىرعىشتىق“، ”قوزعاۋشى كۇش قاينارىندىق“ رولىن ساۋلەلەندىرىپ، دۇنيە ءجۇزىنىڭ بەيبىتشىلىگى مەن دامۋىنا اناعۇرلىم كوپ تۇراقتىلىق ۇستەدى. بولاشاقتا جۇڭگو ەكونوميكاسى بەلگىلى ارتۋ قارقىنىن جالعاستىرۋمەن بىرگە، ساپا وزگەرىسىن، ونىمدىلىك وزگەرىسىن، قوزعاۋشى كۇش وزگەرىسىن جەدەلدەتىپ، اناعۇرلىم ساپالى دامۋدى قۇلشىنا جۇزەگە اسىرىپ، بۇقارانىڭ تۇرمىسىن اناعۇرلىم جاقسارتادى. وسىنىڭ ءبارى دۇنيە ءجۇزى ەكونوميكاسىنىڭ ارتۋىن جاڭا قوزعاۋشى كۇشپەن قامدايدى، سونداي - اق ءار ەل كاسىپورىندارىنىڭ جۇڭگوداعى دامۋىنا كەڭ ءورىس ازىرلەيدى.
لي چياڭ مىنالاردى دارىپتەدى: جۇڭگو ەكونوميكاسى دۇنيە جۇزىلىك جۇمىس ءبولىسى جۇيەسىمەن تەرەڭ توعىستى، جۇڭگونىڭ دامۋى دۇنيە جۇزىنەن ايرىلا المايدى، دۇنيە ءجۇزىنىڭ دامۋى دا جۇڭگوعا مۇقتاج. حالىقارالىق جاعداي قالاي وزگەرسە دە، جۇڭگو سىرتقا ەسىك اشۋدى تاباندىلىقپەن كەڭەيتەدى. ءبىز جوعارى ولشەمدى حالىقارالىق ەكونوميكا - ساۋدا ەرەجەسىمەن ۇشتاستىرىپ، بازارعا كىرۋگە رۇقسات ەتۋدەن بۇرىن ازاماتتىق مامىلەدەگى شەكتەلگەن سالالار ءتىزىمىن قوسىپ باسقارۋ ءتۇزىمىن ىشكەرىلەي اتقارىپ، ساۋدانىڭ، قارجى قوسۋدىڭ ەركىن، قولايلى بولۋ دەڭگەيىن ۇزدىكسىز جوعارىلاتىپ، تۇزىمدىك ەسىك اشۋدى ورنىقتى كەڭەيتىپ، بازارلانعان، زاڭمەن جونگە سالىناتىن، حالىقارالانعان ماڭداي الدى تيجارات - ساۋدا ورتاسىن كۇش سالا قالىپتاستىرامىز. جۇڭگونىڭ اشىق ەسىگى بارعان سايىن ايقارا اشىلىپ، ورتاسى بارعان سايىن جاقسارىپ، قىزمەت وتەۋى بارعان سايىن ساپالىلانادى. جۇڭگوعا قارجى قوسۋ، جۇڭگوعا تامىر تارتۋ − ءتىپتى دە جاقسى بولاشاقتى تاڭداعاندىق. جۇڭگو ءار جاقپەن قول ۇستاسىپ، ەسىك اشىپ سەلبەسۋدىڭ، ءوزارا تيىمدىلىك جەتكىزىپ تەڭ يگىلىككە كەنەلۋدىڭ جاڭا تاراۋىن ۇزدىكسىز جازۋدى قالايدى.
اليانس قامسىزداندىرۋ توبى القالار كەڭەسىنىڭ ءتوراعاسى، قوسىمشا باس اتقارۋشى ءمانساپتىسى بەيت، الما سەرىكتەستىگىنىڭ باس اتقارۋشى ءمانساپتىسى كۋك، ليتو توبىنىڭ باس اتقارۋشى ءمانساپتىسى شى داۋچىڭ، حيتاچى توبىنىڭ باستىعى توشىحارا مينجاۋ، بوستون اقىل - كەڭەس بەرۋ توبىنىڭ دۇنيە جۇزىلىك قۇرمەتتى ءتوراعاسى بوكەنا قاتارلى سىرت جاقتىڭ ۋاكىلدەرى ىلگەرىندى - كەيىندى لەبىز ءبىلدىردى. كوپشىلىك مىنالاردى ءبىلدىردى: جاڭا تيپتى ايدارشا ۆيرۋس وكپە قابىنۋ ىندەتى تۋىلىپ، 3 جىل وتكەننەن كەيىن جۇڭگوعا قايتا ورالعانىمىزعا ەرەسەن قۋانىشتىمىز، جۇڭگونىڭ ەكونوميكالىق، قوعامدىق دامۋدا قول جەتكىزگەن ماڭىزدى تابىستارىن بارىنشا القايمىز. ىندەتتى جەڭىپ، ىندەتتەن كەيىنگى ەكونوميكانىڭ قالپىنا كەلۋىن ىلگەرىلەتىپ، دۇنيە جۇزىلىك سىن - سايىسقا توتەپ بەرۋ ءار ەلدىڭ قول ۇستاسا قۇلشىنۋىن قاجەت ەتەدى، جۇڭگونىڭ دۇنيە جۇزىلىك ماسەلەلەردى شەشۋ بارىسىندا ماڭىزدى رول اتقارۋىن ءۇمىت ەتەمىز. ەل اتتاعان كاسىپورىندار جۇڭگونىڭ رەفورما جاساپ، ەسىك اشۋىنان جانە جەدەل دامۋىنان يگىلىككە كەنەلدى ءارى جۇڭگونىڭ دامۋىنا بەلسەندى ۇلەس قوستى، بولاشاقتا جۇڭگومەن سەلبەستىكتى ۇزدىكسىز تەرەڭدەتەدى. جۇڭگونىڭ تابىسقا جەتۋى − بۇكىل دۇنيە جۇزىندەگى كاسىپورىنداردىڭ تابىسى. جۇڭگونىڭ ەسىك اشۋدى ۇزدىكسىز كەڭەيتىپ، دۇنيە ءجۇزى ەكونوميكاسىنىڭ دامۋىنا ماڭىزدى ۇلەس قوساتىنىنا، جۇڭگونىڭ نۇرلى بولاشاق جاراتاتىنىنا سەنەمىز.
مەملەكەتتىك كەڭەستىڭ مۇشەسى، قوسىمشا سىرتقى ىستەر مينيسترى چىن گاڭ قاتارلىلار كەزدەسۋدە بىرگە بولدى.
كەلۋ قاينارى: حالىق تورابى
جاۋاپتى رەداكتورى : نۇرعيسا قۇرمانجان ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
