شي جينپيڭ جەكە - جەكە ماۆريتانيا زۇڭتۇڭىمەن، بۋرۋندي زۇڭتۇڭىمەن، گۆيانا زۇڭتۇڭىمەن، گرۋزيا زۇڭليىمەن كەزدەستى
2023.07.31 15:21 كەلۋ قاينارى : شينجياڭ گازەتى
شينحۋا اگەنتتىگىنىڭ 7 - ايدىڭ 28 - كۇنى چىڭدۋدان بەرگەن حابارى (تىلشىلەر ۋىن شين، يۋان چيۋيۋە). 7 - ايدىڭ 28 - كۇنى تۇستەن كەيىن مەملەكەت ءتوراعاسى شي جينپيڭ چىڭدۋدا 31 - كەزەكتى دۇنيە ءجۇزى جوعارى مەكتەپ وقۋشىلارى جازعى سپورت جارىسىنىڭ باستالۋ سالتىنا قاتىناسۋ ءۇشىن جۇڭگوعا كەلگەن ءارى جۇڭگودا ساپاردا بولاتىن ماۆريتانيانىڭ زۇڭتۇڭى عازۋانيمەن كەزدەستى.
شي جينپيڭ بىلاي دەپ اتاپ كورسەتتى: جۇڭگو مەن ماۆريتانيا ديپلوماتيالىق قارىم - قاتىناس ورناتقان 58 جىلدان بەرى ەكى جاق باستان - اياق ءبىر - بىرىنە شىن نيەتپەن مامىلە جاساپ، ءوزارا قولداۋ كورسەتىپ، قويۋ دوستىق ورناتتى. دۇنيە جۇزىندەگى 100 جىلدىق وزگەرىس جاعدايى الدىندا، جۇڭگو − ماۆريتانيا ەكى ەل ۇزدىكسىز ءوزارا قولداۋ كورسەتەتىن جاقسى دوس، دامۋعا بىرگە ۇمتىلاتىن جاقسى سەرىك بولىپ، ەكى ەلدىڭ ورتاق مۇددەسى مەن حالىقارالىق ادىلدىكتى، ادىلەتتىلىكتى قول ۇستاسا قورعاۋى كەرەك. بىلتىر جىل سوڭىندا ءبىز ساۋد ارابياسىنىڭ ريادىندا تۇڭعىش كەزەكتى جۇڭگو − اراب ەلدەرى باسشىلار ماجىلىسىنە بىرگە قاتىناستىق ءارى كەڭەس وتكىزىپ، كوپتەگەن ماڭىزدى ورتاق تانىمعا كەلدىك، ءسىزدىڭ وسى رەت جۇڭگودا ساپاردا بولۋىڭىز ەكى ەل قارىم - قاتىناسىنىڭ بولاشاعى ءۇشىن جاڭا جوبا كەسكىندەيتىندىگىنە سەنەمىن.
شي جينپيڭ بىلاي دەپ باسا دارىپتەدى: جۇڭگو جاق ماۆريتانيا جاقتىڭ جۇڭگونىڭ وزەكتى مۇددەسىنە ساياتىن ماسەلەلەردە باستان - اياق جۇڭگو جاقپەن باتىل بىرگە تۇرعاندىعىنا العىس ايتادى، ماۆريتانيا جاقتىڭ ءوز ەلىنىڭ مەملەكەت جاعدايىنا ۇيلەسەتىن دامۋ جولىمەن ءجۇرۋىن بۇرىنعىداي قولدايدى، سىرتقى كۇشتەردىڭ ماۆريتانيانىڭ ىشكى ىسىنە كيلىگۋىنە قارسى تۇرادى. جۇڭگو جاق ماۆريتانيا جاقپەن ەل باسقارۋ جاعىندا تاجىريبە اۋىستىرۋدى كۇشەيتىپ، ۇزدىكسىز ماۆريتانيا جاققا شاماسىنىڭ جەتىسىنشە كومەك كورسەتىپ، ماۆريتانياعا كومەك كورسەتۋدە ەگىن شارۋاشىلىعى، مال شارۋاشىلىعى سىندى ەكى تەحنيكالىق ۇلگى كورسەتۋ ورتالىعىنىڭ رولىن تولىق ساۋلەلەندىرىپ، باكتەريا ءشوپ ەگىمشىلىگى تەحنيكالىق سەلبەستىگىن كۇشەيتىپ، بالىق شارۋاشىلىعى، ەگىن شارۋاشىلىعى، مال شارۋاشىلىعى سياقتى سالالارداعى سەلبەستىكتى تەرەڭدەتۋدى قالايدى. جۇڭگو مەن ماۆريتانيانىڭ ”ءبىر بەلدەۋ، ءبىر جولدى“ بىرگە قۇرۋ سەلبەستىك جوباسىنا قول قويىسىپ، ەكى ەلدىڭ ءارقايسى سالاداعى اۋىس - كۇيىستى، سەلبەستىكتى تەرەڭدەتەتىندىگىنە جانە كەڭەيتەتىندىگىنە سەنەمىن. جۇڭگو جاق اناعۇرلىم كوپ قۋاتتى جۇڭگو كاسىپورىندارىن ماۆريتانيانىڭ نەگىزدىك قۇرىلعىلار، ەنەرگيا سياقتى سالالارداعى سەلبەستىگىنە ات سالىسۋعا جىگەرلەندىرەدى جانە قولداۋ كورسەتەدى. بيىل جۇڭگونىڭ ماۆريتانياعا شەتەلگە كومەكتەسەتىن ەمدەۋ اترەتىن جىبەرگەندىگىنىڭ 55 جىلدىعى، جۇڭگو جاق ماۆريتانيا جاققا ۇزدىكسىز جوعارى ورەلى ەمدەۋ اترەتىن جىبەرىپ، ماۆريتانيا جاقتىڭ كۇڭزى شۋەيۋانىن جانە جۇڭگو ءتىل - جازۋى وقىتۋىن ويداعىداي جۇرگىزۋىنە قولداۋ كورسەتىپ، مادەنيەت، جاستار، اقپارات، جەرگىلىكتى ورىندار سياقتىلارداعى اۋىس - كۇيىستى، سەلبەستىكتى بايىتىپ، جۇڭگو − ماۆريتانيا دوستىعىن جۇرت جۇرەگىنە تەرەڭ ۇيالاتۋدى، ۇرپاقتان - ۇرپاققا جالعاستىرۋدى قالايدى.
شي جينپيڭ بىلاي دەپ اتاپ كورسەتتى: جۇڭگو جاق ماۆريتانيا جاقپەن تۇڭعىش كەزەكتى جۇڭگو − اراب ەلدەرى باسشىلار ءماجىلىسىنىڭ جانە جۇڭگو − افريكا سەلبەستىگى تالقى مىنبەرى داكار ءماجىلىسىنىڭ جەتىستىكتەرىن جەدەل تياناقتاندىرىپ، جۇڭگو مەن اراب ەلدەرىنىڭ، جۇڭگو مەن افريكانىڭ ناقتى سەلبەستىگىنىڭ تىڭ ساتىعا كوتەرىلۋىن ىلگەرىلەتۋدى قالايدى. ەكى جاق كوپتەگەن ماڭىزدى حالىقارالىق جانە وڭىرلىك ماسەلەردە ۇقساس نەمەسە شامالاس كوزقاراسقا يە، كوپ جاقتى ىستەستىكتى، سايكەستىكتى جيىلەتىپ، ناعىز كوپ جاقتىلىقتى امالياتتا ايگىلەپ، حالىقارالىق ادىلدىكتى، ادىلەتتىلىكتى قورعاپ، قالىڭ وركەندەپ كەلە جاتقان ەلدەردىڭ ورتاق مۇددەسىن قورعاپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋ كەرەك.
عازۋاني مىنانى ءبىلدىردى: ماۆريتانيا − جۇڭگو ەكى ەلدىڭ قويۋ دوستىق سۇيىسپەنشىلىگى بار، باستان - اياق تىعىز ىنتىماقتاسىپ، ءوزارا كومەك كورسەتىپ كەلەدى. جۇڭگو جاقتىڭ ماۆريتانيا جاققا قىرۋار قالتقىسىز كومەك كورسەتكەندىگىنە، اسىرەسە، جۇڭگونىڭ ماۆريتانياعا كومەكتەسەتىن ەمدەۋ اترەتىنىڭ ماۆريتانيا حالقىنىڭ سالاماتتىعى ءۇشىن وراسان زور ۇلەس قوسقاندىعىنا العىس ايتامىن. ماۆريتانيا جاق ءبىر جۇڭگو ساياساتىن باتىل ۇستانادى، ءبىر جۇڭگو پرينسيبىنە قايشى كەلەتىن ءسوز - ارەكەت اتاۋلىعا باتىل قارسى تۇرادى، جۇڭگو جاقپەن ەكونوميكا - ساۋدا، ەنەرگيا سياقتى سالالارداعى سەلبەستىكتى كۇشەيتىپ، ماۆريتانيا − جۇڭگو قارىم - قاتىناسىن تىڭ بيىككە كوتەرۋدى قالايدى. ءتوراعا شي جينپيڭ العا قويعان ”ءبىر بەلدەۋ، ءبىر جولدى“ بىرگە قۇرۋ باستاماسى، الەمدىك دامۋ باستاماسى، الەمدىك حاۋىپسىزدىك باستاماسى، الەمدىك وركەنيەت باستاماسى ءار ەلدىڭ تاۋەلسىزدىگىنە، يەلىك ۇقىعىنا، تۇرلىشە وركەنيەتتەردىڭ اۋىس - كۇيىس جاساپ، ءوزارا ۇلگى الۋىنا قۇرمەت ەتۋ سىندى حالىقارالىق قارىم - قاتىناستىڭ ولشەمىنە بۇكىلدەي ۇيلەسەدى، ناعىز كوپ جاقتىلىقتى قورعاپ، دۇنيە ءجۇزىنىڭ بەيبىتشىلىگىن، حاۋىپسىزدىگىن جانە بىرگە دامۋىن جەبەپ، اناعۇرلىم ءادىل دە ۇيلەسىمدى حالىقارالىق ءتارتىپتىڭ ورناۋىن ىلگەرىلەتۋگە پايدالى، ماۆريتانيا جاق مۇنى بارىنشا القايدى، بەلسەندى قولدايدى. ماۆريتانيا جاق جۇڭگو جاقپەن بىرگە قۇلشىنىپ، اراب ەلدەرى مەن جۇڭگونىڭ، افريكا مەن جۇڭگونىڭ قارىم - قاتىناسىنىڭ ۇزدىكسىز دامۋىن ىلگەرىلەتىپ، ادامزاتتىڭ تاعدىرلاس ورتاق تۇلعاسىن قۇرۋدى، جەبەۋدى قالايدى.
كەزدەسۋدەن كەيىن ەكى ەلدىڭ مەملەكەت باسشىلارى «جۇڭحۋا حالىق رەسپۋبليكاسى ۇكىمەتى مەن ماۆريتانيا ءىسلام رەسپۋبليكاسى ۇكىمەتىنىڭ ”ءبىر بەلدەۋ، ءبىر جول“ قۇرىلىسىن بىرگە ىلگەرىلەتۋ جونىندەگى سەلبەستىك جوباسىنا» قول قويۋعا بىرگە كۋا بولدى.
ساي چي، ديڭ شۋەشياڭ، ۋاڭ ي، شىن يچين قاتارلىلار جوعارىدا اتالعان قيمىلدارعا قاتىناستى.
شينحۋا اگەنتتىگىنىڭ 7 - ايدىڭ 28 - كۇنى چىڭدۋدان بەرگەن حابارى (تىلشىلەر ياڭ يجۇن، شۋە يۇيبين). 7 - ايدىڭ 28 - كۇنى تۇستەن كەيىن مەملەكەت ءتوراعاسى شي جينپيڭ چىڭدۋدا 31 - كەزەكتى دۇنيە ءجۇزى جوعارى مەكتەپ وقۋشىلارى جازعى سپورت جارىسىنىڭ باستالۋ سالتىنا قاتىناسۋ ءۇشىن جۇڭگوعا كەلگەن ءارى جۇڭگودا ساپاردا بولاتىن بۋرۋنديدىڭ زۇڭتۇڭى ىندايشىمييەمەن كەزدەستى.
شي جينپيڭ بىلاي دەپ اتاپ كورسەتتى: جۇڭگو − بۋرۋندي قارىم - قاتىناسى حالىقارالىق الماعايىپ وزگەرىستىڭ سىنىنان ءوتتى، ەكى ەل تار جول، تايعاق كەشۋلەردى بىرگە وتكەرگەن بارلىق جاعدايدا بىردەي دوستار جانە ءبىرىن - ءبىرى قۇرمەتتەپ، قول ۇستاسا داميتىن جاقسى سەرىكتەر. جۇڭگو جاق بۋرۋنديدىڭ مەملەكەتتىڭ تاۋەلسىزدىگىن، يەلىك ۇقىعىن، تەرريتوريا تۇتاستىعىن قورعاۋىن تاباندىلىقپەن قولدايدى، سىرتقى كۇشتەردىڭ كيلىگۋىنە قارسى تۇرادى، بۋرۋنديدىڭ دەربەس، ءوز - وزىنە قوجايىن بولعان دامۋ جولىمەن ءجۇرۋىن قولدايدى، بۋرۋندي جاقپەن ءبىر - ءبىرىنىڭ وزەكتى مۇددەسىنە ساياتىن ماسەلەلەردە ۇزدىكسىز تاباندىلىقپەن ءوزارا قولداۋ كورسەتىپ، اناعۇرلىم جوعارى دەڭگەيدەگى ءوزارا پايدا جەتكىزىپ، بىرگە يگىلىككە كەنەلۋدى جانە بىرگە دامۋدى جۇزەگە اسىرۋدى قالايدى.
شي جينپيڭ بىلاي دەپ باسا دارىپتەدى: جۇڭگو جاق بۋرۋندي جاقپەن ەل باسقارۋ جاعىندا تاجىريبە اۋىستىرۋدى كۇشەيتىپ، جۇڭگو − بۋرۋندي بارلىق جاعدايدا بىردەي سەرىكتەستىك قارىم - قاتىناسىنىڭ مازمۇنىن بايىتۋدى قالايدى. جۇڭگو مەن بۋرۋنديدىڭ ناقتى ىستەردەگى سەلبەستىگى بۋرۋندي ەكونوميكاسىنىڭ دامۋى مەن حالىق تۇرمىسىنىڭ جاقسارۋىن پارمەندى جەبەدى، جۇڭگو جاق قاتىستى كەلەلى سەلبەستىك نىساندارىن جەدەل ىلگەرىلەتىپ، بۋرۋنديدىڭ اۋىل شارۋاشىلىق ونىمدەرىنىڭ تەزدەن جۇڭگوعا جەتكىزىلۋىن قولداپ، اۋىل شارۋاشىلىعى تەحنيكاسىنان ۇلگى كورسەتۋ ورتالىعى مەن اۋىل شارۋاشىلىعى ماماندارىنىڭ رولىن تولىق ساۋلەلەندىرىپ، قۋاتتى جۇڭگو قارجىلاندىرعان كاسىپورىنداردى بۋرۋنديعا بارىپ قارجى قوسۋعا شابىتتاندىرىپ، بۋرۋنديدىڭ استىقپەن ءوزىن - ءوزى قامداۋىن جانە دەربەس باياندى دامۋىن جۇزەگە اسىرۋىنا دەم بەرەدى. جۇڭگو جاق بۋرۋندي جاقپەن كەلەلى حالىقارالىق ىستەر، اسىرەسە، افريكانىڭ قولامتالى ماسەلەلەرى جونىندە بايلانىستى، ىستەستىكتى ۇزدىكسىز كۇشەيتىپ، افريكانىڭ بەيبىتشىلىگى، ورنىقتىلىعى ءۇشىن بىرگە بەلسەندى ۇلەس قوسۋدى قالايدى.
شي جينپيڭ بىلاي دەپ باسا دارىپتەدى: جۇڭگو − افريكا ەجەلدەن تاعدىرلاس ورتاق تۇلعا. افريكا ەلدەرىمەن ىنتىماقتى، سەلبەستىكتى دامىتۋ − جۇڭگونىڭ سىرتقا باعىتتالعان ساياساتىنىڭ ماڭىزدى ىرگە تاسى ءارى جۇڭگو جاقتىڭ بەرىك ستراتەگيالىق تالعامى. ۇزاق ۋاقىتتان بەرى جۇڭگو مەن افريكانىڭ ءارقايسى سالاداعى سەلبەستىگىنىڭ تابىسى سۇبەلى بولىپ، افريكاعا ناقتى پايدا الىپ كەلۋىمەن بىرگە، حالىقارالىق قوعامنىڭ افريكامەن سەلبەستىك ورىستەتۋىنە دە اناعۇرلىم تاماشا شارت - جاعداي ازىرلەدى. كەزەكتە دۇنيە جۇزىندە كوپتەگەن سىن - سايىستار مەن داعدارىستار كىرىگىپ، قاباتتاستى، جۇڭگو − افريكا ىنتىماقتى، سەلبەستىكتى ءتىپتى دە كۇشەيتىپ، قالىڭ وركەندەپ كەلە جاتقان ەلدەردىڭ ورتاق مۇددەسى مەن حالىقارالىق ادىلدىكتى، ادىلەتتىلىكتى قورعاۋى كەرەك. جۇڭگو جاق ءوزىنىڭ جاڭا دامۋى ارقىلى افريكا جاقتى جاڭا ورايمەن قامداپ، بۋرۋنديدى قامتىعان افريكالىق باۋىرلاستارمەن بىرگە جۇڭگو − افريكا سەلبەستىك تالقى مىنبەرى داكار ءماجىلىسىنىڭ تابىسىن ويداعىداي تياناقتاندىرىپ، ”ءبىر بەلدەۋ، ءبىر جولدى“ بىرگە قۇرۋ سەلبەستىگىن ىلگەرىلەتىپ، الەمدىك دامۋ باستاماسىنىڭ افريكا ەلدەرى وداعىنىڭ «2063 - جىلعا دەيىنگى كەڭەستىك تارتىبىمەن» ءتۇيىلىسۋىن ىلگەرىلەتىپ، بىرگە دامۋدى، بىرگە العا باسۋدى جۇزەگە اسىرۋدى قالايدى.
ىندايشىمييە مىنالاردى ءبىلدىردى: بۋرۋندي − جۇڭگو ەكى ەلدىڭ اراسى شالعاي بولعانىمەن، ەكى ەل حالقىنىڭ دوستىعى ۋاقىت وتكەن سايىن بەكەمدەلىپ، باستان - اياق ءوزارا قۇرمەتتەپ، ءوزارا سەنىم ارتىپ، ءوزارا قولداۋ كورسەتىپ كەلەدى. بۋرۋندي جاق جۇڭگو جاقتىڭ كورسەتكەن قىمباتتى قولداۋىنا العىس ايتادى، جۇڭگونى مەملەكەتتىڭ دامۋىن جۇزەگە اسىرۋداعى بارلىق جاعدايدا بىردەي سەلبەستىك سەرىكتەسى سانايدى. بۋرۋندي جاق ءبىر جۇڭگو ساياساتىن تاباندى اتقارىپ، تايۋاندى جۇڭگونىڭ ايرىلماس ءبىر بولىگى دەپ بىلەدى. بۋرۋندي جاق جۇڭگو جاق ورتاعا قويعان ”ءبىر بەلدەۋ، ءبىر جولدى“ بىرگە قۇرۋ باستاماسىن، الەمدىك دامۋ باستاماسىن، الەمدىك حاۋىپسىزدىك باستاماسىن، الەمدىك وركەنيەت باستاماسىن باتىل قولداپ، ادامدىق ۇقىق ماسەلەسىندە قوس ولشەم قولدانۋعا، وزگە ەلدىڭ ىشكى ىسىنە كيلىگۋگە قارسى تۇرادى. بۋرۋندي جاق جۇڭگو جاقپەن اۋىل شارۋاشىلىعى، كەن شارۋاشىلىعى، مال شارۋاشىلىعى سياقتى سالالارداعى سەلبەستىكتى كۇشەيتۋدى، افريكا ەلدەرى وداعىنىڭ «2063 - جىلعا دەيىنگى كەڭەستىك تارتىبىمەن» ءتۇيىلىسىپ، بۋرۋندي مەن افريكانىڭ دامۋدى جۇزەگە اسىرۋىنا دەم بەرىپ، افريكا − جۇڭگو قارىم - قاتىناسىنىڭ اناعۇرلىم زور دامۋعا قول جەتكىزۋىن ىلگەرىلەتۋدى ءۇمىت ەتەدى. افريكا − جۇڭگو سەلبەستىگى ءوزارا پايدا جەتكىزىپ، تەڭ يگىلىككە كەنەلەتىن سەلبەستىك، بۋرۋندي جاق جۇڭگو جاقپەن وڭىرلىك جانە حالىقارالىق ىستەردەگى بايلانىستى، ىستەستىكتى كۇشەيتىپ، افريكا مەن جۇڭگونىڭ ىنتىماعىن، سەلبەستىگىن كۇشەيتىپ، اناعۇرلىم ءادىل، ۇيلەسىمدى حالىقارالىق ءتارتىپ ورناتۋدى قالايدى.
ساي چي، ديڭ شۋەشياڭ، ۋاڭ ي، شىن يچين قاتارلىلار كەزدەسۋگە قاتىناستى.
شينحۋا اگەنتتىگىنىڭ 7 - ايدىڭ 28 - كۇنى چىڭدۋدان بەرگەن حابارى (تىلشىلەر يۋان شۋاي، جوۋ شياڭجي). 7 - ايدىڭ 28 - كۇنى تۇستەن بۇرىن مەملەكەت ءتوراعاسى شي جينپيڭ چىڭدۋدا 31 - كەزەكتى دۇنيە ءجۇزى جوعارى مەكتەپ وقۋشىلارى جازعى سپورت جارىسىنىڭ باستالۋ سالتىنا قاتىناسۋ ءۇشىن جۇڭگوعا كەلگەن ءارى جۇڭگودا ساپاردا بولاتىن گۆيانانىڭ زۇڭتۇڭى اليمەن كەزدەستى.
شي جينپيڭ بىلاي دەپ اتاپ كورسەتتى: جۇڭگو مەن گۆيانانىڭ اراسى شالعاي بولعانىمەن، دوستىعى ارىدان باستاۋ الادى. گۆيانا كارايب وڭىرىندەگى ءبىر جۇڭگو پرينسيبىن ەڭ ەرتە مويىنداعان ءارى جاڭا جۇڭگومەن ديپلوماتيالىق قارىم - قاتىناس ورناتقان مەملەكەت. بىلتىر جۇڭگو مەن گۆيانا ديپلوماتيالىق قارىم - قاتىناس ورناتقاندىعىنىڭ 50 جىلدىعىن سالتاناتپەن قۇتتىقتادى. سوڭعى جىلدارى گۆيانانىڭ ەكونوميكاسى تەز قارقىنمەن دامىپ، مەملەكەت قۇرىلىسى كۇن سايىن جاڭاردى، جۇڭگو جوعارى ساپالى دامۋ ارقىلى جۇڭگو ۇلگىسىندەگى وسىزاماندانۋدى جاپپاي ىلگەرىلەتۋدە. جۇڭگو مەن گۆيانا ەكى ەل ءبىر - بىرىنە سەنەتىن، ءبىر - بىرىنە ارقا سۇيەيتىن جاقسى دوس بولىپ، ورايدان بىرگە يگىلىكتەنىپ، سىن - سايىستاردى بىرگە قارسى الىپ، سەلبەستىكتى بىرگە جوسپارلاپ، دامۋدى بىرگە جەبەپ، جۇڭگو مەن گۆيانانىڭ اناعۇرلىم تىعىز تاعدىرلاس ورتاق تۇلعاسىن قۇرۋدى ىلگەرىلەتۋى كەرەك.
شي جينپيڭ بىلاي دەپ باسا دارىپتەدى: جۇڭگو مەن گۆيانا ەكەۋى دە وركەندەپ كەلە جاتقان ەلدەر، ەكى ەل حالقىنىڭ ءتۇبىرلى مۇددەسى مەن ۇزاق بولاشاقتىق مۇددەسىن شىعار ءتۇيىن ەتىپ، قارىم - قاتىناستى، سەلبەستىكتى كۇشەيتىپ، تاباندىلىقپەن ءبىرىن - ءبىرى قولداپ، جۇڭگو − گۆيانا قارىم - قاتىناسىنىڭ ورنىقتى قاداممەن الىسقا جەتۋىن ىلگەرىلەتۋ كەرەك. جۇڭگو جاق ”ءبىر بەلدەۋ، ءبىر جولدى“ بىرگە قۇرۋ باستاماسىنىڭ گۆيانانىڭ ”تومەن كومىر قىشقىل گازدى دامۋ ستراتەگياسى 2030ىمەن“ تەرەڭدەي ءتۇيىلىسۋىن ىلگەرىلەتىپ، ەكى ەلدىڭ ”ءبىر بەلدەۋ، ءبىر جولدى“ جوعارى ساپالى بىرگە قۇرۋ سەلبەستىك دەڭگەيىن جوعارىلاتۋدى قالايدى. گۆيانا جاقتىڭ جۇڭگو حالىقارالىق يمپورت كورمەسىنە قاتىناسىپ، گۆيانانىڭ اناعۇرلىم كوپ ەرەكشەلىككە يە ساپالى ونىمدەرىنىڭ جۇڭگو بازارىنا كىرۋىن ىلگەرىلەتۋىن قارسى الامىز. جۇڭگو جاق جۇڭگو كاسىپورىندارىن گۆياناعا بارىپ قارجى قوسىپ، ەنەرگيا، كەن كاسىبى، فينانس، اۋىل شارۋاشىلىعى، بالىق شارۋاشىلىعى، نەگىزدىك قۇرىلعى قۇرىلىسى سياقتى سالالارداعى ءوزارا پايدا جەتكىزۋدى، سەلبەستىكتى كەڭەيتىپ، جاڭا ەنەرگيا، جاسىل دامۋ سياقتى جاڭا ارتۋ تۇيىندەرىن جەتىلدىرۋگە شابىتتاندىرادى. ەكى جاق گۋمانيتارلىق اۋىس - كۇيىستى جيىلەتىپ، ادامداردىڭ بارىس - كەلىسىنە قولايلىلىق جاساپ، ەكى ەل دوستىعىنىڭ حالىق رايى نەگىزىن بەكەمدەۋى كەرەك. جۇڭگو مەن گۆيانا ەكى ەل حالىقارالىق جانە وڭىرلىك ىستەردە كەڭ كولەمدى ورتاق مۇددەگە جانە قارايلاس تۇرعىعا، قۋاتتاماعا يە. گۆيانانىڭ 2024 - جىلدان 2025 - جىلعا دەيىنگى بىرلەسكەن مەملەكەتتەر ۇيىمى حاۋىپسىزدىك القالار كەڭەسىنىڭ بەيتۇراقتى القا ەلى بولىپ سايلانعاندىعىن قۇتتىقتايمىن، جۇڭگو جاق گۆيانا جاقتىڭ حالىقارالىق جانە وڭىرلىك ىستەردە اناعۇرلىم زور رول اتقارۋىن قولدايدى، گۆيانا جاقپەن بىرگە ناعىز كوپ جاقتىلىقتى امالياتتا ايگىلەپ، قالىڭ وركەندەپ كەلە جاتقان ەلدەردىڭ ورتاق مۇددەسىن قورعاپ، كليمات وزگەرىسى، استىق حاۋىپسىزدىگى، ەنەرگيا حاۋىپسىزدىگى سياقتى الەمدىك سىن - سايىستارعا بىرگە توتەپ بەرىپ، ادامزاتتىڭ تاعدىرلاس ورتاق تۇلعاسىن قول ۇستاسا قۇرۋدى قالايدى.
شي جينپيڭ بىلاي دەپ اتاپ كورسەتتى: 2013 - جىلى مەن كارايب وڭىرىندە تۇڭعىش رەت ساپاردا بولىپ، كارايب وڭىرىندەگى ديپلوماتيالىق قارىم - قاتىناس ورناتقان 9 ەلدىڭ باسشىلارىمەن بىرگە جۇڭگو مەن كارايب ەلدەرى جان - جاقتى سەلبەستىك سەرىكتەستىك قارىم - قاتىناسىن تۇراقتاندىرعان ەدىك. جۇڭگو جاق كارايب ەلدەرىنىڭ ىنتىماقتاسا وتىرىپ ءوزىن الۋەتتەندىرۋىن، دامىپ گۇلدەنۋىن ۇدايى قولداپ كەلەدى، كارايب ەلدەرى جاقپەن قول ۇستاسا وتىرىپ اناعۇرلىم تىعىز جۇڭگو − كارايب ەلدەرى تاعدىرلاس ورتاق تۇلعاسىن قۇرۋدى قالايدى. گۆيانا جاقتىڭ جۇڭگونىڭ كارايب ەلدەرىمەن قارىم - قاتىناسىنىڭ دامۋىندا ۇزدىكسىز بەلسەندى رول اتقارۋىن ءۇمىت ەتەمىن.
الي مىنالاردى ءبىلدىردى: گۆيانا − جۇڭگو قارىم - قاتىناسىنىڭ دامۋى جاقسى، ساياسي ءوزارا سەنىمدىلىگى توتەنشە بەرىك. گۆيانا مەن جۇڭگو ديپلوماتيالىق قارىم - قاتىناس ورناتقاننان بەرگى 50 جىل، دوستاسقان، سەلبەسكەن جانە ءوزارا قولداۋ كورسەتكەن 50 جىل بولدى. گۆيانا جاق ءبىر جۇڭگو پرينسيبىنە بۇلجىماي تاباندى بولادى، ءتوراعا شي جينپيڭنىڭ ۇزدىك باسشىلىق قۋاتىنا ايرىقشا سۇيىنەدى، جۇڭگونىڭ حالىقاراداعى ىقپال كۇشىن ايرىقشا قاستەرلەيدى. جۇڭگو گۆيانانىڭ جانە كارايب ءوڭىرىنىڭ ەكونوميكالىق، قوعامدىق دامۋىندا ماڭىزدى رول اتقارىپ، جۇڭگونىڭ تاجىريبەلەرىن بولىسۋمەن بىرگە، گۆيانانىڭ جانە وڭىردەگى ەلدەردىڭ نەگىزدىك قۇرىلعىلاردى دامىتۋ، ۇلاستىرۋ - تۇتاستىرۋ، ەمدەۋ، ءدارى - دارمەك، دەنساۋلىق ساقتاۋ سياقتىلارىنا قىمباتتى كومەك كورسەتتى. گۆيانا جۇڭگونى ايرىقشا سەنىمدى سەلبەستىك سەرىگى دەپ قارايدى، جۇڭگو كاسىپورىندارىنىڭ گۆياناعا بارىپ قارجى قوسىپ، شارۋاشىلىعىن گۇلدەندىرۋىن قارسى الادى، جۇڭگو جاقپەن تىعىز سەلبەستىك ورىستەتىپ، ەنەرگيا، كليمات وزگەرىسى جانە استىق حاۋىپسىزدىگى سياقتى الەمدىك سىن - سايىستارعا اناعۇرلىم ويداعىداي توتەپ بەرۋدى ءۇمىت ەتەدى. گۆيانا جاق ءتوراعا شي جينپيڭ العا قويعان ءبىر قىدىرۋ كەلەلى باستامالاردى قولدايدى، ”ءبىر بەلدەۋ، ءبىر جولدى“ بىرگە قۇرۋعا بەلسەنە ات سالىسادى، جۇڭگو جاقپەن تىعىز بايلانىس جاساپ، سەلبەسىپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋدى، اناعۇرلىم ءادىل، ۇيلەسىمدى حالىقارالىق ءتارتىپ ورناتۋدى ىلگەرىلەتۋدى قالايدى. گۆيانا جاق كارايب ەلدەرى ورتاق تۇلعاسىنىڭ جۇڭگومەن قارىم - قاتىناسىنىڭ دامۋىن ۇزدىكسىز بەلسەنە ىلگەرىلەتەدى.
ساي چي، ديڭ شۋەشياڭ، ۋاڭ ي، شىن يچين قاتارلىلار كەزدەسۋگە قاتىناستى.
شينحۋا اگەنتتىگىنىڭ 7 - ايدىڭ 28 - كۇنى چىڭدۋدان بەرگەن حابارى (تىلشىلەر چىن دۇڭشۋ، چىن دي). 7 - ايدىڭ 28 - كۇنى تۇستەن بۇرىن مەملەكەت ءتوراعاسى شي جينپيڭ چىڭدۋدا 31 - كەزەكتى دۇنيە ءجۇزى جوعارى مەكتەپ وقۋشىلارى جازعى سپورت جارىسىنىڭ باستالۋ سالتىنا قاتىناسۋ ءۇشىن جۇڭگوعا كەلگەن ءارى جۇڭگودا ساپاردا بولاتىن گرۋزيانىڭ زۇڭليى گاريباشۆيليمەن كەزدەستى.
شي جينپيڭ بىلاي دەپ اتاپ كورسەتتى: زۇڭلي مىرزا جۇڭگو − گرۋزيا قارىم - قاتىناسىنا ءمان بەرىپ، جۇڭگومەن سەلبەستىكتى بەلسەنە ىلگەرىلەتتى، مەن مۇنى ايرىقشا القايمىن. جۇڭگو مەن گرۋزيا ديپلوماتيالىق قارىم - قاتىناس ورناتقان 31 جىلدان بەرى ەكى جاقتىڭ ساياسي جاقتاعى ءوزارا سەنىمدىلىگى ۇزدىكسىز بەكەمدەلىپ، ءار سالاداعى سەلبەستىك ناتيجەسى كورنەكتى بولدى. جۇڭگو جۇڭگو ۇلگىسىندەگى وسىزامانداندىرۋ ارقىلى جۇڭحۋا ۇلتىنىڭ ۇلى گۇلدەنۋىن جاپپاي ىلگەرىلەتۋدە. وسى رەت جۇڭگوعا ساپارلاي كەلگەنىڭىزدە ەكى جاق بىرلەسكەن مالىمدەمە جاريالاپ، جۇڭگو مەن گرۋزيانىڭ ستراتەگيالىق سەرىكتەستىك قارىم - قاتىناس ورناتقاندىعىن بىرگە جاريالايدى. ەكى جاق وسىنى تىڭ باستالۋ ءتۇيىنى ەتىپ، ەكى ەل قارىم - قاتىناسىن ستراتەگيالىق جانە ۇزاق بولاشاقتىق تۇرعىدان جوبالاۋعا تاباندى بولىپ، جۇڭگو مەن گرۋزيانىڭ ستراتەگيالىق سەرىكتەستىك قارىم - قاتىناسىنىڭ اقاۋسىز، ورنىقتى دامۋىن ىلگەرىلەتىپ، ەكى ەلدىڭ ءوز - ءوزىنىڭ دامۋى مەن گۇلدەنۋىنە دەم بەرۋى كەرەك.
شي جينپيڭ بىلاي دەپ باسا دارىپتەدى: جۇڭگو مەن گرۋزيا ەكى جاق ۇكىمەتتىك، ساياسي پارتيالار بارىس - كەلىسىن جيىلەتىپ، ەل باسقارۋ جاعىندا تاجىريبە اۋىستىرۋدى كۇشەيتىپ، ءبىر - ءبىرىنىڭ وزەكتى مۇددەسىنە ساياتىن ماسەلەلەردە ءوزارا ءتۇسىنىپ، ءوزارا قولداۋ كورسەتىپ، ءوزارا قۇرمەتتەيتىن، ءوزارا سەنەتىن، تەڭ تۇرعىدا مامىلە جاسايتىن جاقسى دوس، جاقسى سەرىك بولۋى كەرەك. ەكى جاق ءداستۇرلى دوستىقتى ساۋلەلەندىرىپ، ءار سالاداعى اۋىس - كۇيىستى، سەلبەستىكتى كۇشەيتىپ، حالىق تىلەگىنىڭ توعىسۋىن جەبەۋى كەرەك. جۇڭگو جاق گرۋزيا جاقپەن ەكى ەلدىڭ ۇكىمەتتەرى ارا ەكونوميكا - ساۋدا سەلبەستىك كوميتەتى، ەركىن ساۋدا كەلىسىمى بىرلەسكەن كوميتەتى سياقتى مەحانيزمدەردىڭ رولىن ساۋلەلەندىرىپ، ”ءبىر بەلدەۋ، ءبىر جولدى“ جوعارى ساپالى بىرگە قۇرۋ سەلبەستىگىن ىلگەرىلەتۋدى قالايدى. جۇڭگو جاق گرۋزيانىڭ ساپالى ونىمدەردى جۇڭگوعا ەكسپورت ەتۋدى كەڭەيتۋىن قارسى الادى، جۇڭگو كاسىپورىندارىن گرۋزياعا بارىپ قارجى قوسىپ، شارۋاشىلىعىن گۇلدەندىرۋگە شابىتتاندىرادى.
شي جينپيڭ بىلاي دەپ باسا دارىپتەدى: جۇڭگو كوممۋنيستىك پارتياسى ادامزاتتىڭ بولاشاق تاعدىرىنا باستان - اياق نازار اۋدارىپ كەلەدى. دۇنيە جۇزىندە 100 جىلدا بولماعان زور وزگەرىس الدىندا، مەن الەمدىك دامۋ باستاماسىن، الەمدىك حاۋىپسىزدىك باستاماسىن، الەمدىك وركەنيەت باستاماسىن العا قويدىم، مۇنداعى ماقسات بىرلەسكەن مەملەكەتتەر ۇيىمىن وزەك ەتكەن حالىقارالىق جۇيەنى، حالىقارالىق زاڭدى نەگىز ەتكەن حالىقارالىق ءتارتىپتى قورعاپ، ادامزات ءدوپ كەلىپ وتىرعان بەيبىتشىلىك پەن دامۋ ماسەلەسىن شەشۋدى ىلگەرىلەتۋ. جۇڭگو جاق گرۋزيا جاقپەن جانە حالىقارالىق قوعاممەن بىرگە قۇلشىنىپ، الەمدىك سىن - سايىستارعا بىرگە توتەپ بەرىپ، ادامزاتتىڭ تاعدىرلاس ورتاق تۇلعاسىن قول ۇستاسا قۇرۋدى قالايدى.
گاريباشۆيلي مىنالاردى ءبىلدىردى: مەن جۇڭگوعا كەلىپ چىڭدۋ جوعارى مەكتەپ وقۋشىلارى جازعى سپورت جارىسىنىڭ باستالۋ سالتىنا قاتىناساتىنىما ءارى جۇڭگودا ساپاردا بولاتىنىما وتە قۋانىشتىمىن، بۇل ءبىر رەتكى تاريحي سيپاتتى ساپار بولدى. جۇڭگو جاقتىڭ ۇزاق ۋاقىتتان بەرى گرۋزيا جاققا كورسەتكەن قىمباتتى قولداۋىنا، گرۋزيانىڭ يەلىك ۇقىعى مەن تاۋەلسىزدىگىنە قۇرمەت ەتكەندىگىنە العىس ايتامىن، گرۋزيا جاق ءبىر جۇڭگو ساياساتىن باتىل اتقارادى. گرۋزيا جاق جۇڭگومەن بولعان دوستىق پەن سەلبەستىكتى ايرىقشا قاستەرلەيدى، جۇڭگونىڭ حالىقارالىق ىستەردە اتقارعان ماڭىزدى رولىنا ءمان بەرەدى، ءتوراعا شي جينپيڭ العا قويعان ”ءبىر بەلدەۋ، ءبىر جولدى“ بىرگە قۇرۋ باستاماسىن، الەمدىك دامۋ باستاماسىن، الەمدىك حاۋىپسىزدىك باستاماسىن، الەمدىك وركەنيەت باستاماسىن قولدايدى، تياناقتاندىرۋعا بەلسەنە ات سالىسادى. گرۋزيا مەن جۇڭگو قارىم - قاتىناسىنىڭ ستراتەگيالىق سەرىكتەستىك قارىم - قاتىناسى دەڭگەيىنە كوتەرىلۋى گرۋزياعا اناعۇرلىم كوپ وراي اكەلەدى، ماڭىزدى مانگە يە. گرۋزيا جاق جۇڭگو جاقپەن ەكونوميكا - ساۋدا سياقتى سالالارداعى سەلبەستىكتى كەڭەيتىپ، تەرەڭدەتىپ، ەكى ەل حالقىنا اناعۇرلىم مول ىرىس - قۇت اكەلۋدى ءۇمىت ەتەدى.
ساي چي، ديڭ شۋەشياڭ، ۋاڭ ي، شىن يچين قاتارلىلار كەزدەسۋگە قاتىناستى.
جاۋاپتى رەداكتورى : نۇرعيسا قۇرمانجان ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
