سايرام – كەڭساي تاس جولىنىڭ ءىشىنارا بولەكتەرى تاسقىن سەبەبىنەن وپىرىلدى

كەڭساي بولەگى بۇكىلدەي جابىلدى

2016.05.11 13:39   كەلۋ قاينارى : حالىق تورابى

　　حالىق تورابى، 11 – مامىر، بەيجيڭ. تولاسسىز جاۋعان نوسەردىڭ سەبەبىنەن تاسقىن ءجۇرىپ، 10 – مامىر كۇنى تاڭ ءسارى ساعات 6دا سايرام – كەڭساي جوعارى قارقىندى تاس جولىنىڭ ءىشىنارا بولەكتەرى وپىرىلدى، G30 جەلىسىنىڭ 4182+300 ورنىندا ءۇرىمجى باعىتىنداعى جولدىڭ وپىرىلۋ جاعدايى اۋىر بولىپ، قاتىناۋعا مۇلدە مۇمكىن بولمادى. قازىر ساقشى تاراۋلارى سايرام – قورعاس جوعارى قارقىندى تاس جولىنىڭ كەڭساي بولەگىندەگى 42 كيلومەترلىك جولدى بۇكىلدەي جاپتى.

　　ىلە وبلىستىق قوعام حاۋىپسىزدىگى مەكەمەسى قاتىناس ساقشى بولىمشەسى جوعارى قارقىندى تاس جول كەڭساي ساقشى بولىمشەسى قىزمەتكەرلەرىنىڭ ايتۋىنشا، سول كۇنى ساعات 15تەن 18گە دەيىن كىدىرىپ قالعان 200گە جۋىق اۆتوموبيلدى جولعا سالعان، قازىر (حابار جولدانعان كەزدە) كەڭسايدىڭ ارتاي بولەگىندە ءالى دە كىدىرىپ قالعان اۆتوموبيلدەر بار، ولاردى جولعا سالۋ جۇمىسى ىستەلۋ ۇستىندە.

　　ۇعىسۋعا قاراعاندا، جول وتىرىپ كەتكەننەن كەيىن، كەڭساي، چيڭشۇيحى، بايانداي قاتارلى ءۇش ورىنداعى قاتىناس ساقشىلارى مەن جول تاراۋلارى بىرلەسە وتىرىپ، كەڭسايدان وتەتىن اۆتوموبيلدەرگە قاتىناستى شاۋجايلاۋ شارالارىن اتقاردى ءارى بۇراتالا وبلىسى ۋتاي قاتىناس ساقشى اترەتىنىڭ ۋتاي مەن كەڭساي اراسىنداعى قوس باعىتتاعى قاتىناستى شاۋجايلاۋىنا سايكەستى، ىلەگە قاراي جولعا شىققان اۆتوموبيلدەرگە قاتىناستى شاۋجايلاۋ شارالارىن اتقاردى ءارى ولاردى ارتقا قايتۋعا ءناسيحاتتادى. قاتىناستى شاۋجايلاۋ مەزگىلىندە بارلىق اۆتوموبيلدەردىڭ بۇلىنگەن جول بولەگىنە كىرۋىنە تيىم سالىندى.

　　قاتىناس تاراۋلارى شوفەرلەردىڭ قاتىناستى شاۋجايلاۋ بەلگىلەمەسىنە بويسۇنىپ، دەر كەزىندە كەيىن قايتۋىن نەمەسە سول ماڭداعى قوناق ۇيلەردى تاۋىپ تۇنەۋىن ەسكەرتتى، قاتىناستىڭ ناقتى قالپىنا كەلۋ ۋاقىتى قايتالاي ۇقتىرىلادى.

　　كەلۋ قاينارى: حالىق تورابى