سۇيەكتەن ءتۇيىن تۇيگەن ازامات

 باعداۋلەت باتىربەك ۇلى

2016.04.12 16:39   كەلۋ قاينارى : حالىق تورابى

　　سۋرەتتە: تەمىر قالدىقتارىنان قۇراستىرعان «باتىر رۋحى» اتتى تۋىندىسى

　　ءوزىنىڭ تول ونەرى ارقىلى قيان – كەسكى بازاردان جول تاۋىپ، باعىن بازاردان سىناپ جۇرگەن ازاماتتارىمىزدىڭ قاتارى مولايىپ، قاراسى كوبەيگەنى ۇلتىمىزدىڭ ماقتانىشى. انە سولاردىڭ ءبىرى، ءبىرى بولعاندا بىرەگەيى، ون ساۋساعىنان ونەر تامعان شەبەر، جاسامپازدىق ونەرگە باي جاستارىمىزدىڭ ۇلگىسى، نىلقى اۋدانى كىلەڭ اۋىلى قىزىلتۇمسىق قىستاعىنىڭ تۇرعىنى ءومىرشات كامال ۇلىمەن جۋىردا قۇلجا اۋداندا وتەتىن 7 – كەزەكتى شىنجياڭ ىلە ورىك گۇلى ساياحات مەرەكەسى قولونەر جايما بازارىندا كەزدەسىپ اعاشتى قويىپ، سۇيەكتەن ءتۇيىن تۇيگەن ونەرىنە قايران قالىپ، بارەكەلدى ايتقانىم بار ەدى.

　　جاستايىنان ونەرگە قۇشتار ءومىرشات كامال ۇلى ورتا مەكتەپتى تامامداعانان كەيىن قوعامدا سەندەلىپ بوس جۇرۋدى نامىس دەپ ءبىلىپ، 2012 - جىلى نىلقى اۋدانى ورتالىعىنان قولونەر، كەستەشىلىك بۇيىمدارىن رامكالاۋ شەبەرلىك ورتالىعىن قۇرىپ جۇمىس باستايدى. ەندى ءبىر جاعىنان، بوس ۋاقىتتارىنان ۇتىمدى پايدالانىپ، كەرەكسىز سۇيەك، تەمىر قالدىقتارىنان ەستەلىك جاسامپازدىق بۇيىمدارىن دا جاساي جۇرەدى. وسىلايشا كاسىپ كوزىن اشقان ءومىرشاتتىڭ ساۋداسى كۇسەت بولىپ، شەبەرلىك دۇكەنىنەن جىلىنا 50 مىڭ يۋان كىرىس كىرگىزىپ وتىرسا، ال كوپتەگەن قولونەر جاسامپازدىق بۇيىمدارىن تاڭبالى ساياحات ورتالىعىنا، ءۇرىمجى، ىلەدەگى جارمەنكە، ونەر باسەكەلەرىنە قاتىناستىرىپ، باعالاۋشىلاردىڭ دا جوعارى باعالارىنا يە بولىپ كەلە جاتىپتى. قازىرگە دەيىن وسى سۇيەك قولونەر جاسامپازدىق بۇيىمدارىنان 30 مىڭ يۋانعا جۋىق كىرىس كىرگىزىپ، دوس – جاراندارىنىڭ ۇلگىسى، ەلىنىڭ ماقتانىشىنا اينالىپتى. ول قۇلجا اۋدانىندا وتەتىن 7 – كەزەكتى شينجياڭ ىلە ورىك گۇلى ساياحات مەرەكەسىنە تەمىر قالدىقتارىنان قۇراستىرعان «باتىر رۋحى»، سۇيەكتەن جاساعان «ايبارلى ايداھار»، «اعاشقا ورالعان ۋىتتى جىلان»، «گيتتار جۇلدىزى»، «باتىردىڭ وگىزى»، «گۇلگە قۇمار كوبەلەك» قاتارلى ءبىر توپ تۋىندىسىن قويىپ، مۇنداعى ساياحاتشىلار مەن تۇرعىنداردىڭ تاڭدايىن قاقتىرىپ، جوعارى باعاسىنا يە بولىپ جاتتى.

　　كەرەكسىز زاتتى كەرەكتى تاۋارعا اينالدىرىپ، ساياحاتتىڭ قولايلىلىعىنان پايدالانىپ ونەرىن ورگە دومالاتقان، سۇيەكتەن ءتۇيىن تۇيگەن شەبەر ءومىرشاتقا ەرشىمدى ەڭبەگىڭمەن، ونەرلى ساۋساقتارىڭمەن ءالى تالاي ەل بىلمەيتىن تۋىندىلاردى دۇنيەگە اكەلىپ، باعىڭدى بازاردان تابا ءبىل ازامات دەگەن تىلەگىمىزدى بىلدىرەمىز. سۋرەتتەرىن تۇسىرگەن باعداۋلەت باتىربەك ۇلى

　　كەلۋ قاينارى: حالىق تورابى