ەكۆادوردا تۋىلعان جەر سىلكىنىسىندە قازا بولعاندار سانى 233 ادامعا جەتتى

2016.04.18 14:43   كەلۋ قاينارى : حالىق تورابى

　　حالىق تورابى، 18 – ءساۋىر، بەيجيڭ. شينحۋا اگەنتتىگىنىڭ حابارىنا قاراعاندا، ەكۋادور پرەزيدەنتى كورەانىڭ 17 – ساۋىردە تۋيتتەردە جاريالاۋىنشا، اتالعان ەلدىڭ باتىس سولتۇستىگىندەگى تەڭىز جاعالاۋىندا 7.8 بال جەر سىلكىنىپ، قازا بولعان ادام سانى 223 ادامعا جەتكەن.

　　كورەانىڭ ايتۋىنشا، ماناۆي ولكەسىندە اپات اۋىر بولعان، سىلكىنىس ورتالىعى ەسەپتەلەتىن پەدەرنالس ايماعى اۋىر ويراندالعان. كورەا كوز الداعى ەڭ شۇعىل مىندەت ــ امان – ەسەن قالعانداردى قيراندىنىڭ اراسىنان تەزىرەك قۇتقارىپ الاۋ ەكەنىن ايتتى.

　　ەكۆادور پرەزيدەنتىنىڭ ورىنباسارى گراس سول كۇنى اپات تۋىلعان جەرگە بارىپ، اپاتتان قۇتقارۋعا جەتەكشىلىك ەتىپ، بۇكىل ەل حالقىن وسىنداي «ماشاقاتتى كەزەڭدە» ىنتىماقتى ساقتاۋعا ۇندەدى. گراس: پرەزيدەنت كورەانىڭ قول قويعان بۇيرىعىنا ساي، ەكۆادور ەكى اي ۋاقىت شۇعىل جاعدايعا وتكەندىگىن جاريالادى.

　　قازىر ەكۆادور ۇكىمەتى قارۋلى قوسىنان 10 مىڭ اسكەردى، حالىق ساقشىلارى مەن ءورت ءوشىرۋشى قىزمەتكەرلەردەن 4600 ادامدى اپات ەڭ اۋىر بولعان تەڭىز جاعالاۋىنداعى ولكەلەرگە جىبەردى. قاتىناس – تاسىمال مينيسترلىگى مەن دەنساۋلىق ساقتاۋ مينيسترلىگى دە شۇعىل مەحانيزمدەردى ىسكە قوسىپ، اپات تۋىلعان جەرگە اپاتتان قۇتقارۋعا ارنالعان زاتتاردى جەتكىزدى. قازىرگە دەيىن ۇكىمەت اپات تۋىلعان جەردە ەكى جىلجىمالى ەمحانا قۇردى.

　　كەلۋ قاينارى: حالىق تورابى