شىعارىپ شىن جۇيرىكتەي ونەردى ورگە، كۇلكىدەن كوكتەم سيلاپ كورەرمەنگە

2016.04.19 13:42   كەلۋ قاينارى : حالىق تورابى

　　گۇلميرا داۋلەتبەك قىزى حابارلايدى. 15 – ساۋىردە، كوكتوعاي اۋدانى تۇڭعىش كەزەكتى ەگىنشى ـ مالشىلاردىڭ كومەديا جانە تەرمە جارىسى وتكىزىلدى.

　　پارتيامىز جولعا قويىپ وتىرعان جاراسىمدى قوعام قۇرىپ، ۇلتتار ىنتىماعىن جەبەۋ، حالىق تۇرمىسىن جانداندىرۋ ۇندەۋىنە ساي ەگىنشى ـ مالشى ۇرپاقتارىنىڭ رۋحاني جاڭالىقتارىن ساۋلەلەندىرۋدى ماقسات ەتكەن بۇل قيمىل كوكتوعاي اۋداندىق پارتكوم مەن حالىق ۇكىمەتىنىڭ باس بولۋىندا وتكىزىلدى.

　　كوكتوعاي اۋدانىنداعى ءارقايسى اۋىل ـ قالاشىقتان كەلگەن، ساحنا كورمەگەن ەگىنشى ـ مالشى ۋاكىلى ماڭايىنداعى كىشكەنتاي ىستەردى، قوعامداعى كەلەڭسىزدىكتەردى تىلگە تيەك ەتە وتىرىپ، ۇلتتار ىنتىماعىن، باياشاتتى زاماندى، پارتيانىڭ ابزال ساياساتىن جىرلادى.

　　كوكتوعاي اۋداندىق ادەبيەت ـ كوركەمونەرشىلەر بىرلەستىگىنىڭ ءتوراعاسى، قوعامدىق عىلىمدار بىرلەستىگىنىڭ ءتوراعاسى ەركىنبەك قايسا ۇلى بىلاي دەدى: «وسى رەتكى كوكتوعاي اۋدانىنىڭ تۇڭعىش كەزەكتى كومەديا جانە تەرمە جارىسىن وتكىزۋ ارقىلى، اۋدانىمىزداعى ەگىنشى ـ مالشىلارعا ارناۋلى ساحنا ازىرلەپ، پارتيانىڭ ءتيىمدى ساياساتىنىڭ نەگىزگى ساتىداعى تياناقتانۋى، ۇلتتار ىنتىماعىن جىرلاۋ، ورتانى قورعاۋ سىندى مازمۇندارمەن ەگىنشى ـ مالشىلاردىڭ وزدەرىنىڭ اينالاسىنداعى ناقتىلى ىستەر ارقىلى حالىققا ۇگىت جاسادىق. ءبىز الداعى جەردە بۇقارا ءوزى قاتىناساتىن وسىنداي قيمىلدى كوپتەپ وتكىزۋ ارقىلى، ۇلتتار ىنتىماعىن قورعاپ، قوعامنىڭ جاراسىمدىلىعىن ساقتاپ، تىنىش تا كورىكتى كوكتوعاي قۇرۋعا كۇش سالامىز».

　　مامانداردىڭ سوڭعى باعالاۋىنىڭ ناتيجەسىندە، كوكتوعاي قالاشىعىنداعى پەنسياعا شىققان قارتتاردىڭ، نەگىزگى ساتىعا قىزمەت وتەۋگە تۇسكەن قىزمەت گرۋپپاسىنداعى قىزمەتكەرلەردىڭ بىرلىكتە دايىنداعان«تازالىقشى» اتتى كومەدياسى، قاراتۇڭكە قالاشىعىنان كەلگەن تەرمەشى كۇلنيزا مادەن قىزىنىڭ ورىنداۋىندا «كەڭەس» اتتى تەرمەسى ءبىرىنشى دارەجەلى سيلىقتى ەنشىلەسە، قۋ ەرتىس قالاشىعىنىڭ دايىنداعان «العىس ايتۋ» اتتى كومەدياسى مەن تۇرعىن اۋىلىنىڭ تەرمەشىسى ءازيما جۇماقان قىزىنىڭ ورىنداۋىندا «بەلگىلى» اتتى تەرمەسى ەكىنشى دارەجەلى سيلىقتى، قارا بۇلعىن اۋىلىنىڭ دايىنداعان «تاعدىر سولاي» اتتى كومەدياسى مەن كوكتوعاي قالاشىعىنىڭ تەرمەشىسى ساعدات ساتتار ۇلى مەن سەيىلبەك مەدەن ۇلىنىڭ تەرمەسى ءۇشىنشى دارەجەلى سيلىقتى ەنشىلەدى.

　　كوكتوعاي اۋدانىنىڭ تۇرعىنى ءادينا نيازباي قىزى بىلاي دەدى: «اۋدانىمىزداعى وتكىزىلگەن تۇڭعىش رەتكى اۋىل ونەرپازىنىڭ دايىنداعان كومەديا مەن تەرمە جارىسىن تاماشالادىق، جارىس وتە جاقسى بولدى. اسىرەسە ءوزىمىزدىڭ تۇرمىس امالياتىمىزداعى ناقتىلى ءىس ـ ارەكەتتەرىمىزدى كومەديا تىلىنە تيەك ەتىپ، كورەرمەن قاۋىمعا تارتۋ ەتتى. وسىنداي كوڭىلىمىزگە كۇلكى سيلايتىن ويىن نومىرلەرى كوپتەپ قويىلىسا دەگەن ويدامىن».

　　باعالاۋشى، كومەديك نۇربەك شايدول ۇلى بىلاي دەدى: «وسى رەتكى كومەديا جارىسىنا باستان ـ اياق جاۋاپتى بولىپ، ءارقايسى اۋىل ـ قالاشىقتاعى ونەرپازداردىڭ قاربالاستىق ءوندىرىس ۋاقىتىنان پايدالانىپ دايارلىق كورگەن كومەدياسىنا جەتەكشىلىك ەتتىم، ولاردىڭ ءبارى دە ساحنا كورمەگەن اۋىل ادامدارى، ولاردىڭ كومەدياعا كوتەرگەن مازمۇندارىن نەگىزگى مازمۇن بويىنشا، شامامنىڭ كەلگەنىنشە وزگەرتىپ، ساحناعا الىپ شىقتىق. تۇڭعىش كەزەكتى ەگىنشى ـمالشىلاردىڭ كومەديا جارىسى بولعان سوڭ، كەمشىلىكتەر بولمادى دەپ ايتا المايمىز، جالپى ارتيستەردىڭ كوتەرگەن تاقىرىبى جاقسى، بۇدان كەيىن دە كەنجە ونەرىمىزدى ۇلىقتاپ، ارتيستەردى كوپتەپ تاربيەلەۋگە كۇش سالامىز».

　　كەلۋ قاينارى: حالىق تورابى