جوعارى مەكتەپ ەمتيحانى اياقتاعان سوڭ، مىناداي الدامكوستىك تۇزاعىنان ساقتانىڭىزدار 

بۇكىل ەلىمىز بويىنشا جوعارى مەكتەپ ەمتيحانى اياقتادى، ەمتيحان بەرگەن وقۋشىلار قازىر كوڭىل كۇي جاقتان سەرگىپ، دەمالۋدا، وسىنداي كەزدە زاڭسىز ەلەمەنتتەردىڭ جوعارى مەكتەپكە ەمتيحان بويىنشا وقۋشى قابىلداۋ قىزمەتى ورايىنان پايدالانىپ قۇرعان تۇزاعىنا ءتۇسىپ قالۋدان ساقتانعان ابزال.

زاڭسىز ەلەمەنتتەر ەمتيحان بەرگەن وقۋشىلار مەن اتا – انالاردىڭ اسىققان كوڭىل – كۇيىنەن پايدالانىپ، اتا – انالار ۋيشين توبى، قولفونداعى كەلتە حات قاتارلى ارنالار ارقىلى ”ءنومىر شەگىن الدىن الا سۇراستىرۋ“ قاتارلى جالعان جارنامالىق جالعانىمداردى جولداپ، وسى ارقىلى الدامكوستىك ىستەيدى، الدا – جالدا جالعانىمدى باسساڭىز، ترويان ۆيرۋسى قولفونعا كىرىپ، ەمتيحان بەرگەن وقۋشىلاردىڭ نەمەسە ولاردىڭ اتا – انالارىنىڭ قولفونىنا تىركەلگەن بانكە كارتوچكاسىنىڭ ينفورماتسيالارىن ۇرلايدى.

مۇنان سىرت، زاڭسىز ەلەمەنتتەر ”جەرگىلىكتى ورىنعا تاربيەلەپ بەرەتىن ستۋدەنت“، ”ءوز قاراجاتىمەن وقيتىن ستۋدەنت“ دەگەن جەلەۋلەردەن پايدالانىپ، قۇرىلىمدار مەن وقۋشى قابىلداۋ تاراۋلارىنىڭ قىزمەتكەرى دەگەن اتتى جامىلىپ، ”وقۋ – اعارتۋ تاراۋلارى وقۋ ماعلۇماتىن مويىندايدى، وقۋ بىتىرگەن سوڭ ءبىرتۇتاس قىزمەتكە ورنالاستىرۋعا بولادى“ دەگەن سياقتى جالعان سوزدەردەن پايدالانىپ الدامكوستىك ىستەيدى. تاعى بىرەۋلەر ”تانىسى بار“ ەكەنىن العا تارتىپ، ”ەمتيحان بەرگەن وقۋشىنىڭ ءنومىرى تولماسا دا، تەك اقشا جۇمساسا بولعانى، مەكتەپكە قابىلداۋعا كەپىلدىك ەتىلەدى“ دەپ ۋادە بەرىپ، وسى ارقىلى مال – مۇلىكتى الداپ الادى.

ەمتيحان بەرگەن وقۋشىلار مەن اتا – انالار قىراعىلىقتى ارتتىرۋى، كەلۋ قاينارى انىق بولماعان تور جالعانىمدارىن، استە، اشپاعانى ءجون. ەمتيحان بەرگەن وقۋشىلار ەمتيحان ناتيجەسىن سۇراستىرعان، تالاپ كەستەسىن تولتىرعان جانە وقۋعا قابىلداۋ ينفورماتسياسىن ۇعىسپاقشى بولعان كەزدە، ءسوزسىز، جەرگىلىكتى وقۋ – اعارتۋ تاراۋلارى جاريالاعان ادىستەر بويىنشا سۇراستىرۋى جانە تولتىرۋى كەرەك.

كەلۋ قاينارى: حالىق تورابى