شينجياڭ ءوندىرىس – قۇرىلىس بيڭتۋانى ەڭ تومەنگى ەڭبەكاقى ولشەمىن رەتتەدى 

ءتىلشىنىڭ 1 – ايدىڭ 9 – كۇنى شينجياڭ ءوندىرىس – قۇرىلىس بيڭتۋانى ادام كۇشى بايلىعى جانە قوعامدىق قامتاماسىزداندىرۋ مەكەمەسىنەن ۇعىسۋىنشا، شينجياڭ ءوندىرىس – قۇرىلىس بيڭتۋانى 2025 – جىلى 1 – ايدىڭ 1 – كۇنىنەن باستاپ ەڭ تومەنگى ەڭبەكاقى ولشەمىن رەتتەدى.

بيڭتۋان باسقاراتىن قالالاردا ەڭ تومەنگى ەڭبەكاقى ولشەمى اۆتونوميالى رايون جاريالاعان كولەمگە ەنگىزىلەدى، ارال، تيەمىنگۋان، كوكدالا، ۋجياچۇي، حۋياڭحى، شىحىزى، شينشيڭ قالالارىندا ەڭ تومەنگى ەڭبەكاقى ولشەمى ايىنا 1890 يۋانعا رەتتەلەدى، تۇمسىق، شۋاڭحى، بايياڭ، بەيتۇن، كۇنيۇي قالالارىندا ايىنا 1750 يۋانعا رەتتەلەدى. ساعاتتىق ەڭ تومەنگى ەڭبەكاقى ولشەمى جەكە – جەكە ساعاتىنا 18.9 يۋانعا، ساعاتىنا 17.5 يۋانعا رەتتەلەدى.

ەڭ تومەنگى ەڭبەكاقى ولشەمى تولىق كۇندىك ءتۇزىم بويىنشا جۇمىستانعان ەڭبەكشىلەرگە قولدانىلادى، ساعاتتىق ەڭ تومەنگى ەڭبەكاقى ولشەمى تولىق كۇندىك ەمەس ءتۇزىم بويىنشا جۇمىستانعان ەڭبەكشىلەرگە قولدانىلادى.

ەڭ تومەنگى ەڭبەكاقى ولشەمىندە ەڭبەكشىنىڭ جەكە ءوزى تاپسىراتىن زەينەتكەرلىك قامسىزداندىرۋى، جۇمىسسىزدىقتان قامسىزداندىرۋ، ەمدەۋدى قامسىزداندىرۋ جانە تۇرعىن ءۇي الەۋمەتتىك جيناق قورى قاتارلى قاراجاتتار قامتىلادى؛ جۇمىس ىستەگەن ۋاقىتىنىڭ ۇزارۋىنا بايلانىستى تۋىنداعان ەڭبەكاقىلاردى، ورتاڭعى كەزەكتەگى ۋاقىتتا جۇمىس ىستەۋ، تۇنگى كەزەكتەگى ۋاقىتتا جۇمىس ىستەۋ، جوعارى تەمپەراتۋرادا جۇمىس ىستەۋ، تومەن تەمپەراتۋرادا جۇمىس ىستەۋ، قۇدىق استىندا جۇمىس ىستەۋ، ۋلى جانە زياندى زاتتار اراسىندا جۇمىس ىستەۋ قاتارلى ەرەكشە ورتادا، شارت – جاعدايدا جۇمىس ىستەگەندە بەرىلەتىن قامقورلىق قاراجاتتاردى، زاڭ – تۇزىمدەر مەن مەملەكەتتىڭ بەلگىلەمەلەرىندەگى ەڭبەكشىلەرگە بەرىلەتىن يگىلىك تۇرلەرىن قامتىمايدى.

كەلۋ قاينارى: حالىق تورابى