شينجياڭ ۇيعۇر اۆتونوميالى رايوندىق پارتكومنىڭ بۇرىنعى ورىنباسار شۋجيى لي پىڭشيننىڭ پارا الۋ دەلوسىن ءبىرىنشى سوتتا قارادى

شينحۋا اگەنتتىگىنىڭ 1 – ايدىڭ 9 - كۇنى شي ـ اننان بەرگەن حابارى. 1 – ايدىڭ 9 – كۇنى، شانشي ولكەسى باۋجي قالالىق ورتا دارەجەلى حالىق سوت مەكەمەسى شينجياڭ ۇيعۇر اۆتونوميالى رايوندىق پارتكومنىڭ بۇرىنعى ورىنباسار شۋجيى لي پىڭشيننىڭ پارا الۋ دەلوسىنا ءبىرىنشى سوتتا اشىق سوت اشتى.

باۋجي قالالىق حالىق پروكۋراتۋراسى ارىز - شاعىم بەرىپ بىلاي دەپ ايىپتادى: 1999 - جىلدان 2023 - جىلعا دەيىن ايىپكەر لي پىڭشين چيڭحاي ولكەسى حايشي موڭعۇل - زاڭزۋ اۆتونوميالى وبلىستىق پارتكومنىڭ ورىنباسار شۋجيى، گولمۇت قالالىق پارتكومنىڭ شۋجيى، حايشي موڭعۇل - زاڭزۋ اۆتونوميالى وبلىستىق پارتكومنىڭ شۋجيى، چيڭحاي ولكەلىك پارتكومنىڭ تۇراقتى مۇشەسى، ساياسي - زاڭ كوميتەتىنىڭ شۋجيى، ىشكى موڭعۇل اۆتونوميالى رايوندىق پارتكومنىڭ تۇراقتى مۇشەسى، ۇيىمداستىرۋ ءبولىمىنىڭ باستىعى، شينجياڭ ۇيعۇر اۆتونوميالى رايوندىق پارتكومنىڭ ورىنباسار شۋجيى، چيڭحاي ولكەسىنىڭ ورىنباسار ولكە دارەجەلى كادرى قاتارلى مىندەتىندەگى قولايلىلىقتاردان جانە قىزمەت ۇقىعى نەمەسە ورنى قالىپتاستىرعان قولايلى جاعدايدان پايدالانىپ قاتىستى ورىندار مەن جەكەلەردىڭ كەن بايلىقتارىن اشۋ، كاسىپورىن ساۋداسىن جۇرگىزۋ، كادرلاردى مىندەتكە تاعايىنداۋ قاتارلى ىستەرىنە كومەكتەسىپ، جوعارىدا ايتىلعان ورىندار مەن جەكەلەردىڭ بەرگەن مال - مۇلكىن تىكەلەي نەمەسە باسقالار ارقىلى زاڭسىز قابىلداعان، جالپى سوماسى حالىق اقشاسىنا سىندىرعاندا 822 ميلليون يۋاننان اسقان. پروكۋراتۋرا ورگاندارى پارا الۋ قىلمىسى بويىنشا لي پىڭشيننىڭ قىلمىستىق ىستەر جاۋاپكەرشىلىگىن قۋزاستىرۋدى ۇسىنىس ەتتى.

سوتتا قاراۋ بارىسىندا پروكۋراتۋرا ورگاندارى قاتىستى دالەل - سىپاتتاردى كورسەتتى، ايىپكەر لي پىڭشين مەن ونىڭ اقتاۋشىسى فاكت كورسەتتى، شاعىم ايتۋشى مەن اقتاۋشى ەكى جاق سوتتىڭ باسقارۋىندا تولىق پىكىر ايتتى، لي پىڭشين سوڭعى ءسوزىن ايتتى ءارى سوتتا قىلمىسىن تانىپ، وكىنەتىندىگىن ءبىلدىردى.

ەڭ سوڭىندا سوت ءۇزىلىس جاساعاندىعىن، سوت ۇكىمىن ارتىنان جاريالايتىندىعىن ايتتى. حالىق قۇرىلتايى ۋاكىلدەرىنەن، ساياسي كەڭەس مۇشەلەرىنەن جانە ءار سالاداعى بۇقارادان 30 نەشە ادام سوت تەرگەۋىن سىرتتاي تىڭدادى.

كەلۋ قاينارى: حالىق تورابى