شي جينپيڭ ترينيداد جانە توباگونىڭ زۇڭتۇڭى كانگالۋمەن جۇڭگو مەن ترينيداد جانە توباگونىڭ ديپلوماتيالىق قارىم - قاتىناس ورناتقانىنىڭ 50 جىلدىعى بايلانىسىمەن ءوزارا قۇتتىقتاۋ تەلەگرامماسىن جولدادى

شينحۋا اگەنتتىگى، 6 - ايدىڭ 20 – كۇنى، بەيجيڭ. 6 - ايدىڭ 20 - كۇنى مەملەكەت ءتوراعاسى شي جينپيڭ ترينيداد جانە توباگونىڭ زۇڭتۇڭى كانگالۋمەن ءوزارا قۇتتىقتاۋ تەلەگرامماسىن جولداپ، ەكى ەلدىڭ ديپلوماتيالىق قارىم - قاتىناس ورناتقانىنىڭ 50 جىلدىعىن قۇتتىقتادى.

شي جينپيڭ بىلاي دەپ اتاپ كورسەتتى: ترينيداد جانە توباگو − كارايب وڭىرىندەگى ماڭىزدى مەملەكەت ءارى جۇڭگونىڭ وسى وڭىردەگى جان - جاقتى سەلبەستىك سەرىگى. جۇڭگو مەن ترينيداد جانە توباگو ديپلوماتيالىق قارىم - قاتىناس ورناتقان 50 جىلدان بەرى ەكى ەلدىڭ قارىم - قاتىناسى تاماشا دامۋ ارىنىن ساقتادى، ەكى جاقتىڭ ساياسي ءوزارا سەنىمدىلىگى ۇزدىكسىز تەرەڭدەپ، ءار سالاداعى سەلبەستىگى سۇبەلى تابىستارعا قول جەتكىزىپ، ەكى ەل حالىقتارىن باقىتقا كەنەلتتى. مەن جۇڭگو - ترينيداد جانە توباگو قارىم - قاتىناسىنىڭ دامۋىنا ايرىقشا ءمان بەرەمىن، زۇڭتۇڭ حانىممەن بىرگە قۇلشىنىپ، ەكى ەلدىڭ ديپلوماتيالىق قارىم - قاتىناس ورناتقانىنىڭ 50 جىلدىعىن وراي ەتىپ، ”ءبىر بەلدەۋ، ءبىر جولدى“ جوعارى ساپامەن بىرگە قۇرۋدى ۇزدىكسىز ىلگەرىلەتىپ، ەكى جاقتىڭ ءار سالاداعى اۋىس - كۇيىسى مەن سەلبەستىگىن تەرەڭدەتىپ، جۇڭگو مەن ترينيداد جانە توباگونىڭ جان - جاقتى سەلبەستىك سەرىكتەستىك قارىم - قاتىناسىنىڭ تاعى ءبىر بەلەسكە كوتەرىلۋىن ىلگەرىلەتۋدى قالايمىن.

كانگالۋ مىنالاردى ءبىلدىردى: ترينيداد جانە توباگو مەن جۇڭگونىڭ ديپلوماتيالىق قارىم - قاتىناس ورناتۋى ەكى جاقتىڭ ەكى مەملەكەتتىڭ دوستىق بايلانىسى جانە سەلبەستىگىن دامىتۋ ورتاق تىلەگىن نەگىز ەتكەن. ۇزاق ۋاقىتتان بەرى ترينيداد جانە توباگو مەن جۇڭگو ديپلوماتيالىق قارىم - قاتىناس ورناتۋداعى اۋەلگى ماقساتتى ەشقاشان ەستەن شىعارماي، ەكى ەل حالىقتارى اراسىنداعى دانەكەردى ۇزدىكسىز بەكەمدەدى. جاڭا داۋىردەگى ترينيداد جانە توباگو مەن جۇڭگو قارىم - قاتىناسىنىڭ ەكى ەلگە ۇزدىكسىز قۇت - ىرىس اكەلەتىنىنە سەنەمىن.

وسى كۇنى مەملەكەتتىك كەڭەستىڭ زۇڭليى لي چياڭ ترينيداد جانە توباگونىڭ زۇڭليى روريمەن ءوزارا قۇتتىقتاۋ تەلەگرامماسىن جولدادى. لي چياڭ مىنانى ءبىلدىردى: ترينيداد جانە توباگو − جۇڭگونىڭ كارايب رايونىنداعى جاقسى دوسى، جاقسى سەرىگى، ديپلوماتيالىق قارىم - قاتىناس ورناتقان 50 جىلدان بەرى ەكى ەلدىڭ سەلبەستىگى سۇبەلى تابىستارعا قول جەتكىزدى. جۇڭگو جاق جۇڭگو - ترينيداد جانە توباگو قارىم - قاتىناسىنا ءمان بەرەدى، ترينيداد جانە توباگومەن ەكى جاقتىڭ ءوزارا ءتيىمدى سەلبەستىگىن ۇزدىكسىز كەڭەيتۋدى جانە تەرەڭدەتۋدى قالايدى.

روري مىنانى ءبىلدىردى: ترينيداد جانە توباگو مەن جۇڭگونىڭ قارىم - قاتىناسى ءوزارا قۇرمەت ەتۋ، ءوزارا سەنىم ارتۋ، ءبىر - ءبىرىنىڭ ىشكى ىسىنە كيلىكپەۋ نەگىزىندە قۇرىلعان، ەكى جاقتىڭ مۇددەسىنە ۇيلەسەدى. ترينيداد جانە توباگو ءبىر جۇڭگو ساياساتىن تاباندىلىقپەن اتقارىپ، جۇڭگومەن بىرگە ەكى ەل حالىقتارىنىڭ تىنىشتىعىن، باقىتىن جەبەۋگە كۇش سالادى.

كەلۋ قاينارى: حالىق تورابى