حۋاڭحى وزەنى الابىنىڭ ەكولوگياسىن قورعاۋ جانە جوعارى ساپالى دامۋدى الدىمەن اتقارۋ ءوڭىرىن قۇرىپ، جۇڭگو ۇلگىسىندەگى وسىزامانداندىرۋ قۇرىلىسىندا نيڭشيا تاراۋىن ويداعىداي جازۋ كەرەك 

6 ـ ايدىڭ 19 ـ كۇنىنەن 20 ـ كۇنىنە دەيىن، جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ نيڭشيادا قىزمەت تەكسەردى. سۋرەتتە: 6 ـ ايدىڭ 19 ـ كۇنى تۇستەن كەيىن شي جينپيڭ يىنچۋان قالاسى جينفىڭ رايونى چاڭچىڭ حۋايۋان الەۋمەتتىك اۋماعى پارتيا مۇشەلەرى مەن بۇقاراعا قىزمەت وتەۋ ورتالىعىنىڭ الەۋمەتتىك اۋماق دەنساۋلىق ساقتاۋ پۋنكتىندە ەمدەۋ قىزمەتكەرلەرىمەن ىقىلاسپەن اڭگىمەلەسۋدە.

□ سۋرەتتى شينحۋا اگەنتتىگىنىڭ ءتىلشىسى شيە حۋانچى تۇسىرگەن

6 ـ ايدىڭ 19 ـ كۇنىنەن 20 ـ كۇنىنە دەيىن، جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ نيڭشيادا قىزمەت تەكسەردى. سۋرەتتە: 6 ـ ايدىڭ 19 ـ كۇنى تۇستەن كەيىن شي جينپيڭ يىنچۋان قالاسى جينفىڭ رايونى چاڭچىڭ حۋايۋان الەۋمەتتىك اۋماعىندا قىزمەت تەكسەرگەندە، الەۋمەتتىك اۋماق تۇرعىندارىمەن ىقىلاسپەن اڭگىمەلەسۋدە.

□ سۋرەتتى شينحۋا اگەنتتىگىنىڭ ءتىلشىسى شيە حۋانچى تۇسىرگەن

شينحۋا اگەنتتىگىنىڭ 6 ـ ايدىڭ 21 ـ كۇنى يىنچۋاننان بەرگەن حابارى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ جۋىقتا نيڭشيادا قىزمەت تەكسەرگەندە بىلاي دەپ باسا دارىپتەدى: نيڭشيا جاڭا دامۋ ۇستانىمىن ىشكەرىلەي دايەكتىلەندىرىپ، ورنىقتىلىق بارىسىندا ىلگەرىلەۋ قىزمەت جالپى ارناسىنان جازباي، جۇڭحۋا ۇلتى ورتاق تۇلعا تانىمىن بەكەمدەۋدى نەگىزگى جەلى، حۋاڭحى وزەنى الابىنىڭ ەكولوگياسىن قورعاۋ جانە جوعارى ساپالى دامۋدى الدىمەن اتقارۋ ءوڭىرى قۇرىلىسىن جەتەكشى ەتىپ، جوعارى ساپالى دامۋ مەن جوعارى دەڭگەيدە قورعاۋ، رەفورمانى جاپپاي تەرەڭدەتۋ مەن ەسىك اشۋدى كەڭەيتۋ، جاڭاشا قالا ـ قالاشىقتاندىرۋ مەن اۋىل ـ قىستاقتى گۇلدەندىرۋ، ۇلتتار ىنتىماعى مەن بىرگە بايۋ سياقتى قىزمەتتەردى ءبىر تۇتاس جوسپارلاپ ىلگەرىلەتىپ، ەكونوميكاسى گۇلدەنىپ ـ كوركەيگەن، ۇلتتارى ىنتىماقتى، قورشاعان ورتاسى كوركەم، حالقى باي كورىكتى جاڭا نيڭشيانى جەدەل قۇرىپ، جۇڭگو ۇلگىسىندەگى وسىزامانداندىرۋدىڭ نيڭشيا تاراۋىن قۇلشىنا جازۋ كەرەك.

6 ـ ايدىڭ 19 ـ كۇنى شي جينپيڭ چيڭحايداعى قىزمەت تەكسەرۋىن اياقتاتقاننان كەيىن نيڭشياعا كەلدى. سول كۇنى تۇستەن كەيىن، ول نيڭشيا حۇيزۋ اۆتونوميالى رايوندىق پارتكومنىڭ شۋجيى لياڭ يانشۇننىڭ جانە اۆتونوميالى رايوندىق ۇكىمەتتىڭ ءتوراعاسى جاڭ يۇيپۋدىڭ سەرىك بولۋىندا يىنچۋان قالاسىندا تەكسەرۋ ـ زەرتتەۋ جۇرگىزدى.

يىنچۋان قالاسىنىڭ جينفىڭ رايونى چاڭچىڭ حۋايۋان الەۋمەتتىك اۋماعى _ كوپ ۇلت شوعىرلى قونىستانعان كولەمدى الەۋمەتتىك اۋماق. شي جينپيڭ الدىمەن الەۋمەتتىك اۋماقتىڭ پارتيا مۇشەلەرى مەن بۇقاراعا قىزمەت وتەۋ ورتالىعىنا بارىپ، حالىققا قولايلى قىزمەت وتەۋ زالىنا، الەۋمەتتىك اۋماق دەنساۋلىق ساقتاۋ پۋنكتىنە، مەيىر جەتكىزۋ ەرەن بازارىنا كىرىپ، الەۋمەتتىك اۋماق قىزمەتى جونىندەگى تانىستىرۋدى تىڭدادى، الەۋمەتتىك اۋماقتىڭ نەگىزگى ساتى پارتيا ۇيىمىنىڭ رولىن ساۋلەلەندىرۋ، كورشىلەستەر قيمىلىن ورىستەتۋ جانە حالىققا قولايلى، حالىققا ءتيىمدى قىزمەت وتەۋ سياقتى جاعدايلارىن تاپتەشتەي ۇعىستى. وسىدان سوڭ، ول الەۋمەتتىك اۋماق قيمىل ۇيىنە كەلىپ، تۇرعىنداردىڭ قيما سۋرەت جاسامپازدىعىن، ءبي جاتتىعۋىن قىزىعا كورىپ، كوپشىلىكپەن ىقىلاسپەن اڭگىمەلەسىپ، زەينەتكە شىققان تۇرعىنداردى قارتايعاندا كۇتىمدەلۋگە، قارتايعاندا كوڭىلدى جۇرۋگە ءارى قارتايعاندا دا رولىن ساۋلەلەندىرۋگە شابىتتاندىردى. شي جينپيڭ بىلاي دەپ اتاپ كورسەتتى: الەۋمەتتىك اۋماق پارتيا ۇيىمى _ پارتيانىڭ نەگىزگى ساتى بۇقاراسىمەن بايلانىس جاساۋداعى جۇيكە ۇشى، الەۋمەتتىك اۋماقتا باسشىلىق رولىن ساۋلەلەندىرۋى كەرەك. الەۋمەتتىك اۋماق پارتيا ۇيىمىن ويداعىداي قۇرعاندا، كۇشەيتىپ قۇرعاندا، الەۋمەتتىك اۋماق قىزمەتىندە تىرەك بولادى. پارتيا قۇرىلىسى ارقىلى جەتەكشىلىك ەتۋگە تاباندى بولىپ، تۇرعىنداردىڭ شۇعىل، قيىن، ۋايىمداعان، ءزارۋ ماسەلەلەرىن شەشۋدى مىقتاپ ارقاۋ ەتىپ، بۇقاراعا قىزمەت وتەۋدىڭ ءتۇرلى قىزمەتتەرىن ىشكەرىلەي، ەگجەي ـ تەگجەيلى، تىڭعىلىقتى ىستەۋ كەرەك.

شي جينپيڭ الەۋمەتتىك اۋماق تۇرعىنى جاۋ شوۋچىڭنىڭ ۇيىنە بارىپ، وتباسىنداعىلارىمەن قورالانا وتىرىپ اڭگىمە دۇكەنىن قۇرىپ، ولاردىڭ جۇمىستانۋ، كىرىس، ەمدەۋ قامسىزداندىرۋىن ەسەپتەن كوتەرۋ، بالالارىنىڭ وقۋعا ءتۇسۋى سياقتى جاعدايلارىن ۇعىسىپ، ولاردىڭ باقىتتى تۇرمىسىن القادى، بالالاردى احىلاق، اقىل ـ وي، دەنە، ەستەتيكا، ەڭبەك جاعىنان جان ـ جاقتى جەتىلۋگە شابىتتاندىردى. جاۋ شوۋچىڭ باس شۋجيگە جەرگىلىكتى پارتكوم مەن ۇكىمەتتىڭ الەۋمەتتىك اۋماق قۇرىلىسىنا ەرەكشە كوڭىل بولەتىندىگىن، اسىرەسە، كونە، ەسكى شاعىن اۋماقتاردى جاڭالاۋ، تۇرعىنداردىڭ مادەنيەت، دەنە تاربيە تۇرمىسىن بايىتۋ سياقتى جاقتاردا وتە كوپ ناقتى ىستەر ىستەگەندىگىن، ءار ۇلت بۇقاراسىنىڭ الەۋمەتتىك اۋماقتا تاتۋ ـ ءتاتتى وتەتىندىگىن، تۇرمىستارىنىڭ وتە ءجايلى ەكەندىگىن ايتتى. شي جينپيڭ بىلاي دەپ باسا دارىپتەدى: پارتيامىز بۇكىل ىنتا ـ پەيىلىمەن حالىق ءۇشىن قىزمەت ىستەيتىن پارتيا، مەن ءار ۇلت بۇقاراسىن، بارلىق وتباسىن ەستەن شىعارعان ەمەسپىن. سىزدەردىڭ وتباسىلارىڭىزدى اناعۇرلىم جاقسى كوركەيتىپ، تۇرمىستارىڭىزدى بارعان سايىن شالقىتا تۇسۋلەرىڭىزدى ءۇمىت ەتەمىن.

كەشقۇرىم شاق، الەۋمەتتىك اۋماق الاڭى ەرەكشە دۋمانعا بولەندى، تۇرعىندار باس شۋجيدىڭ كەلگەندىگىن كورىپ تۇس ـ تۇستان قاۋمالاپ كەلىپ، قىزۋ شاپالاق سوعىپ قارسى الدى. شي جينپيڭ كوپشىلىككە ىقىلاسپەن بىلاي دەدى: اراعا 4 جىل سالىپ، ءار ۇلت كادر ـ بۇقاراسىنا امانداسۋ ءۇشىن، نيڭشياعا تاعى دا كەلدىم، كوپشىلىكتى كورگەنىمە ەرەكشە قۋانىشتىمىن! جۇڭحۋا ۇلتى _ ۇلكەن شاڭىراق، ءار ۇلت حالقى اناردىڭ دانىندەي تىعىز ۇيىسۋى كەرەك. جۇڭحۋا ۇلتى ورتاق تۇلعا تانىمىن ۇزدىكسىز بەكەمدەپ، ءار ۇلتتىڭ تىلەگىن تىعىز بايلانىستىرىپ، ءار جاقتىڭ كۇشىن كەڭ كولەمدە ۇيىستىرىپ، جۇڭگو ۇلگىسىندەگى وسىزامانداندىرۋدى بىرگە ىلگەرىلەتۋ، جۇڭحۋا ۇلتىنىڭ ۇلى گۇلدەنۋى سىندى كەلەلى ءىستى بىرگە ورىنداۋ كەرەك.

6 ـ ايدىڭ 20 ـ كۇنى تۇستەن بۇرىن، شي جينپيڭ نيڭشيا حۇيزۋ اۆتونوميالى رايوندىق پارتكوم مەن ۇكىمەتتىڭ قىزمەت مالىمەتىن تىڭداپ، نيڭشيانىڭ قىزمەتتە قول جەتكىزگەن ناتيجەلەرىن تۇراقتاندىردى.

شي جينپيڭ بىلاي دەپ اتاپ كورسەتتى: نيڭشيانىڭ جاعراپيالىق ورتاسى مەن بايلىق ارتىقشىلىعى وزگەشە، ەرەكشەلەندىرىلگەن، پارىقتاندىرىلعان كاسىپ سالاسىن دامىتۋ جولىمەن ءجۇرىپ، نيڭشيانىڭ باسىمدىعىن ايگىلەيتىن، ءبىرشاما كۇشتى باسەكەلىك قۋاتقا يە وسىزاماندانعان كاسىپ سالاسى جۇيەسىن ورناتۋ كەرەك. نيڭشيانىڭ وسى زامانعى كومىر حيميا ونەركاسىبى مەن جاڭا ماتەريال كاسىپ سالاسىن، جەل ەلەكترى، فوتوۆولت، سۋتەگى ەنەرگياسى سياقتى تازا ەنەرگيا كاسىپ سالاسىن، ءجۇزىم شارابى، الاقات سياقتى ەرەكشە كاسىپ سالالارىن قۇنتتاي ىستەپ، ءۇرتىس دامىتۋ كەرەك. مادەنيەت پەن ساياحاتتىڭ تەرەڭدەي توعىسۋىن كۇشەيتىپ، ەرەكشە ساياحاتتى، جالپى وڭىرلىك ساياحاتتى بەلسەنە دامىتۋ كەرەك. عىلىم ـ تەحنيكادا جاڭالىق اشۋ مەن كاسىپ سالاسىندا جاڭالىق اشۋدىڭ توعىسۋىن كۇشەيتىپ، عىلىم ـ تەحنيكا جەتىستىكتەرىن كادەگە جاراتۋ، پايدالانۋ تەبىنىن ارتتىرىپ، ءداستۇرلى كاسىپ سالالارىنىڭ تيپ جاڭالاپ، دارەجەسىن ءوسىرۋدى جەبەپ، ستراتەگيالىق سيپاتتى جاڭادان گۇلدەنگەن كاسىپ سالالارىن جەتىلدىرىپ، جەرگىلىكتى جاعدايعا قاراي جاڭاشا وندىرگىش كۇشتەردى دامىتۋ كەرەك. نيڭشيانىڭ سولتۇستىك بولىگىندەگى حۋاڭحى وزەنىنىڭ سۋىن باستاپ سۋارىلاتىن ءوڭىردىڭ، ورتا بولىگىندەگى قۋاڭ بەلدەۋلەردىڭ، وڭتۇستىك بولىگىندەگى تاۋلى وڭىرلەردىڭ وزىندىك ەرەكشەلىكتەرى بار، جەر ـ جەردىڭ كاسىپ سالالارىن دامىتۋ نەگىزىن، بايلىق ورتاسى سيىمدىلىعىن، اشۋ، وركەندەتۋ كومەسكى كۇشىن ءدال يگەرىپ، ءبىر تۇتاس جوسپارلاپ جوبالاۋ مەن كاسىپ سالاسى سەلبەستىگىن كۇشەيتىپ، تاۋ مەن وزەنگە بىردەي پايدا جەتكىزەتىن، قالا مەن اۋىلداردى توعىستىراتىن، وڭىرلەر بىرلەسىپ ارەكەتتەنەتىن دامۋ ارناسىن قالىپتاستىرۋدى ىلگەرىلەتۋ كەرەك.

شي جينپيڭ بىلاي دەپ باسا دارىپتەدى: نيڭشيا ءتۇيىندى سالالار رەفورماسىن تەرەڭدەتۋگە كۇش سالىپ، جەرگىلىكتى ەرەكشەلىككە يە رەفورما جونىندە ىزدەنىس جاساۋى كەرەك. بازار شارۋاشىلىعى نەگىزگى ءتۇزىمىن كەمەلدەندىرىپ، بۇكىل ەلدىڭ ءبىر تۇتاس ۇلكەن بازارى قۇرىلىسىنا بەلسەنە توعىسىپ، مەملەكەت مەنشىگىندەگى مال ـ مۇلىك، مەملەكەت مەنشىگىندەگى كاسىپورىندار رەفورماسىن ۇزدىكسىز ىلگەرىلەتىپ، حالىقتىق شارۋاشىلىقتىڭ دامۋىن جەبەۋ ساياساتىن مۇقيات تياناقتاندىرىپ، شارۋاشىلىق ـ ساۋدا ورتاسىن ساپالىلاندىرىپ، قوعامدىق قارجى قوسۋدىڭ ومىرشەڭدىك كۇشىن مازداتۋ كەرەك. ىشكە، سىرتقا ەسىك اشۋدى ۇشتاستىرۋعا تاباندى بولىپ، ”ءبىر بەلدەۋ، ءبىر جولدى“ بىرگە قۇرۋ جانە باتىس بولىك قۇرلىق، تەڭىز جاڭا ارناسى قۇرىلىسىنا بەلسەنە ات سالىسىپ، اراب ەلدەرىمەن ەكونوميكا ـ ساۋدا سەلبەستىگىن تەرەڭدەتىپ، ىشكى قۇرلىقتىق ەسىك اشۋ دەڭگەيىن جوعارىلاتۋ كەرەك. حۋاڭحى وزەنى مەن حىلانشان تاۋىنىڭ، ليۋپانشان تاۋىنىڭ، لوشان تاۋىنىڭ ەكولوگيالىق ورتاسىن جاقسى قورعاۋ _ نيڭشيانىڭ رەفورمانى، دامۋدى جوسپارلاۋداعى ولشەم سىزىعى، بايلىق ورتاسى فاكتورلارىن بازارلاندىرا ورنالاستىرۋ رەفورماسىن تەرەڭدەتىپ، ەكولوگيالىق ونىمدەردىڭ قۇنىن ىسكە اسىرۋ مەحانيزمى مەن ەكولوگيانى قورعاۋ تولەمى مەحانيزمىن كەمەلدەندىرىپ، سۋ بايلىعىن باسقارۋدىڭ ەڭ قاتاڭ ءتۇزىمىن اتقارۋ كەرەك. حۋاڭحى وزەنىنىڭ ”تاعا فورمالى يىنىنەن“ قامال الۋ شايقاسىن ويداعىداي جۇرگىزىپ، ورمان، جايلىم، سازدىق، شولەيت ەكولوگياسىن قورعاۋدى، قالپىنا كەلتىرۋدى جانە سورتاڭ جەرلەردى جالپىلىق وڭاۋدى ءبىر تۇتاس جوسپارلاپ ىلگەرىلەتىپ، ”سولتۇستىكتەگى جياڭنان القابىنىڭ“ بارعان سايىن كورىكتەنە تۇسۋىنە مۇمكىندىك جاساۋ كەرەك.

شي جينپيڭ بىلاي دەپ اتاپ كورسەتتى: جالپىعا ءتيىمدى، نەگىزدىك سيپاتتى، ەڭ تومەنگى شەكتەن تۇسىرمەيتىن حالىق تۇرمىسى ىستەرى قۇرىلىسىن كۇشەيتىپ، حالىق بۇقاراسىنىڭ شۇعىل، قيىن، ۋايىمداعان، ءزارۋ ماسەلەلەرىن كۇش سالا شەشىپ، ءار ۇلت حالقىنىڭ بىرگە بايۋىن تىڭعىلىقتى ىلگەرىلەتۋ كەرەك. جۇمىستاندىرۋدى كورنەكتى ورىنعا قويىپ، جوعارى مەكتەپتەن وقۋ بىتىرگەن وقۋشىلار، شارۋا جۇمىسكەرلەر، قوسىننان بوساعان اسكەريلەر سياقتى ءتۇيىندى قاۋىمدى جۇمىستاندىرۋ قىزمەتىن تىڭعىلىقتى ويداعىداي ىستەۋ كەرەك. قالالاردى جاڭالاۋدى بەلسەنە ىلگەرىلەتىپ، كونە، ەسكى شاعىن اۋماقتاردى جاڭالاپ سالۋدى كۇشەيتۋ كەرەك. جان سانىنىڭ جىلجۋ اۋقىمىنا سايكەسىپ، قالا مەن اۋىلدىڭ توعىسا دامۋىن ىلگەرىلەتىپ، قالا مەن اۋىلداردىڭ كاسىپ سالاسىنىڭ دامۋىن، نەگىزدىك قۇرىلعىلارىنىڭ، الەۋمەتتىك قىزمەت وتەۋىنىڭ ءبىر تۇلعالانۋىن جەبەۋ كەرەك. اۋىل ـ قىستاقتى گۇلدەندىرۋدى جاپپاي ىلگەرىلەتىپ، ءبىر ميلليون كوشپەندى حالىقتىڭ بايۋ دەڭگەيىن كوتەرۋ ارەكەتىن ويداعىداي اتقارىپ، كورىكتى اۋىل ـ قىستاق قۇرىپ، اۋىل ـ قىستاقتاردىڭ ەسكىلىكتى سالتتى تاستاۋىن جەبەۋ كەرەك. كەدەيلىكتەن ارىلتۋدان قامال الۋ جەتىستىكتەرىن بەكەمدەپ، كەڭەيتىپ، تۇيىندە كومەكتەسۋ ـ سۇيەمەلدەۋدى، قوعامدىق كومەكتەسۋ ـ سۇيەمەلدەۋدى تەرەڭدەتىپ، كولەمدى قايتا كەدەيلەسۋدىڭ تۋىلۋىنان باتىل ساقتانۋ كەرەك. ءوندىرىس حاۋىپسىزدىگىن ويداعىداي يگەرىپ، حاۋىپ ـ قاتەرلەردى، كومەسكى كىناراتتاردى ءبىر ـ بىردەن تەكسەرۋدى جانە ساقتانۋ ـ تىزگىندەۋدى كۇشەيتىپ، حالىق بۇقاراسىنىڭ ءومىرى مەن مال ـ مۇلىك حاۋىپسىزدىگىن شىنايى قورعاۋ كەرەك.

شي جينپيڭ بىلاي دەپ باسا دارىپتەدى: جاڭا داۋىردەگى پارتيانىڭ ۇلت قىزمەتى جونىندەگى كەلەلى باعىت ـ ساياساتتارىن جاپپاي دايەكتىلەندىرىپ، جۇڭحۋا ۇلتى ورتاق تۇلعا تانىمىن بەكەمدەۋ جاعىندا ۇلگى كورسەتۋ رايونىن قۇلشىنا قۇرۋ كەرەك. ۇلت ىستەرىن زاڭ بويىنشا باسقارىپ، ءوزارا كىرىكپەلى قوعامدىق قۇرىلىم مەن الەۋمەتتىك اۋماق ورتاسىن كۇش سالا قۇرىپ، ۇلتتاردىڭ جان ـ جاقتى كىرىگۋىنىڭ امالياتتىق جولىن ۇزدىكسىز كەڭەيتۋ كەرەك. جاڭا داۋىردەگى پارتيانىڭ ءدىن قىزمەتى نازارياسى مەن باعىت ـ ساياساتىن جاپپاي دايەكتىلەندىرىپ، ءدىن سالاسىنا باعىتتالعان يدەيالىق ـ ساياسي جەتەكشىلىكتى كۇشەيتۋ كەرەك.

شي جينپيڭ بىلاي دەپ اتاپ كورسەتتى: بۇكىل پارتيادا ورىستەتىلىپ جاتقان پارتيا ءتارتىبىن ۇيرەنۋ تاربيەسىن مىقتى، ناقتى يگەرىپ، ناتيجە شىعارىپ، پارتيا مۇشەلەرىنىڭ، كادرلاردىڭ پارتيا ءتارتىبىن، پارتيا قاعيداسىن مۇقيات ۇيرەنۋىن ىلگەرىلەتىپ، قاعيداعا قۇرمەت ەتىپ، تارتىپكە بويسۇنۋ العى شارتىندا الاڭسىز قىزمەت ىستەپ، ەمىن ـ ەركىن ءىس تىندىرىپ، قايراتتانا العا ىلگەرىلەۋ، بەلسەنە ىسكەرلىك كورسەتۋ كەرەك. پارتيالىلىقتى، پارتيا ستيلىن، پارتيا ءتارتىبىن تەڭ يگەرۋگە تاباندى بولىپ، ستيل قۇرىلىسىنىڭ ۇدايىلانعان، ۇزاق ۋاقىت ءونىمدى ءتۇزىم ـ مەحانيزمىن كەمەلدەندىرىپ، فورماشىلدىقتى وڭاپ، نەگىزگى ساتىنىڭ اۋىرتپالىعىن جەڭىلدەتۋدى ۇزدىكسىز تەرەڭدەتىپ، شىرىكتەسۋگە باتىلدىق ەتكىزبەۋدى، شىرىكتەسۋگە مۇمكىندىك بەرمەۋدى، شىرىكتەسۋدى ويىنا الدىرماۋدى ءبىر تۇلعالى ىلگەرىلەتىپ، تاڭداۋلى پارتيا ستيلى ارقىلى جۇرت تىلەگىن توعىستىرۋ، قوعامدىق سالتقا جەتەكشىلىك ەتۋ كەرەك.

لي گانجيە، حى ليفىڭ جانە ورتالىق پەن مەملەكەت ورگاندارىنىڭ قاتىستى تاراۋلارىنداعى جاۋاپتى جولداستار قىزمەت تەكسەرۋدە بىرگە بولدى.