شي جينپيڭ انگليانىڭ باس ءۋازىرى ستارمەرمەن كەزدەستى

سول جەر ۋاقىتى 11 - ايدىڭ 18 - كۇنى تۇستەن بۇرىن مەملەكەت ءتوراعاسى شي جينپيڭ ريو - دە - جانەيرودا 20 ەل توبى باسشىلارىنىڭ باسشىلار ماجىلىسىنە قاتىناسۋ كەزىندە انگليانىڭ باس ءۋازىرى ستارمەرمەن كەزدەستى.

سۋرەتتى شينحۋا اگەنتتىگىنىڭ ءتىلشىسى شىن حۇڭ تۇسىرگەن

«حالىق گازەتى»، 11 - ايدىڭ 18 - كۇنى، ريو - دە - جانەيرو (تىلشىلەر حۋ زىشي، جوۋ جوۋ). سول جەر ۋاقىتى 11 - ايدىڭ 18 - كۇنى تۇستەن بۇرىن مەملەكەت ءتوراعاسى شي جينپيڭ ريو - دە - جانەيرودا 20 ەل توبى باسشىلارىنىڭ باسشىلار ماجىلىسىنە قاتىناسۋ كەزىندە انگليانىڭ باس ءۋازىرى ستارمەرمەن كەزدەستى.

شي جينپيڭ بىلاي دەپ اتاپ كورسەتتى: قازىر دۇنيە ءجۇزى جاڭا اۋمالى - توكپەلى وزگەرىس كەزەڭىنە ءوتتى. جۇڭگو مەن انگليا بىرلەسكەن مەملەكەتتەر ۇيىمى حاۋىپسىزدىك القالار كەڭەسىنىڭ تۇراقتى القا ەلى جانە دۇنيە جۇزىندەگى نەگىزگى ەكونوميكالىق تۇلعا رەتىندە، ءوز ەلدەرىنىڭ دامۋىن ىلگەرىلەتۋ اۋىر مىندەتىن ارقالاۋمەن بىرگە، دۇنيە جۇزىلىك سايىستارعا توتەپ بەرۋ جاۋاپكەرشىلىگىن دە ارقالاپ وتىر. ەكى جاق ستراتەگيالىق سەرىكتەستىك ورنىن ۇستانىپ، ءوزارا قۇرمەت ەتۋگە، اشىق سەلبەسۋگە، اۋىس - كۇيىس جاساپ، ءوزارا ۇلگى الۋعا تاباندى بولىپ، ءوزارا پايدا جەتكىزىپ، تەڭ يگىلىككە كەنەلۋدى جۇزەگە اسىرىپ، جۇڭگو – انگليا قارىم - قاتىناسىنىڭ اقاۋسىز، ورنىقتى دامۋىنىڭ كەلەسى تاراۋىن بىرگە جازۋى كەرەك.

شي جينپيڭ بىلاي دەپ باسا دارىپتەدى: جۇڭگو مەن انگليانىڭ تاريحي مادەنيەتى، قۇن ۇستانىمى، قوعامدىق ءتۇزىمى پارىقتى بولعانىمەن، ورتاق مۇددەسى كەڭ، ەكى جاق قارسى جاقتىڭ دامۋىنا اقىلعا سيىمدى، وبيەكتيۆ مامىلە جاساپ، ستراتەگيالىق تىلدەسۋدى كۇشەيتىپ، ساياسي سەنىمدىلىكتى ارتتىرىپ، جۇڭگو - انگليا قارىم - قاتىناسىنىڭ ورنىقتى، شىنايى، باياندى جالعاسۋىنا كەپىلدىك ەتۋى كەرەك. ەكى ەل ساۋدا، قارجى قوسۋ، تازا ەنەرگيا، فينانستىق قىزمەت وتەۋ، ەمدەۋ، حالىق تۇرمىسى سياقتى سالالاردا كەڭ سەلبەستىك كەڭىستىگىنە يە، ۇزدىكسىز كەڭەيتىپ، ەكى ەل حالقىن اناعۇرلىم ويداعىداي يگىلىككە كەنەلتۋ كەرەك. ەكى جاق قولامتالى ماسەلەلەردى ساياسي جولمەن شەشۋدى ىلگەرىلەتىپ، جاساندى زەردەنى دۇنيە جۇزىلىك جونگە سالۋدى كۇشەيتىپ، دۇنيە ءجۇزى ەكونوميكاسىنىڭ ارتۋىن جەبەۋگە، ءار ەلدىڭ بىرگە دامۋىن جۇزەگە اسىرۋعا ۇلەس قوسۋى كەرەك.

ستارمەر مىنالاردى ءبىلدىردى: انگليا مەن جۇڭگو اراسىندا كەڭ كولەمدى ورتاق مۇددە بار، دۇنيە جۇزىلىك سايىستاردى شەشۋدە، دۇنيە ءجۇزىنىڭ بەيبىتشىلىگى مەن دامۋىن قورعاۋدا ماڭىزدى جاۋاپكەرشىلىك ارقالايدى. انگليا مەن جۇڭگونىڭ باياندى، پارمەندى قارىم - قاتىناسى ەكى ەل جانە دۇنيە ءجۇزى جونىنەن توتەنشە ماڭىزدى. انگليا ءوزارا قۇرمەت ەتۋ جانە تەڭدىك، بۇكپەسىز بولۋ رۋحىن ۇستانىپ، جۇڭگومەن تىلدەسۋدى كۇشەيتىپ، ءوزارا ءتۇسىنىسۋدى كۇشەيتىپ، ەكونوميكا - ساۋدا، عىلىم - تەحنيكا، قازىنا - فينانس، دەنساۋلىق ساقتاۋ، ەمدەۋ، وقۋ - اعارتۋ، كليمات وزگەرىسىنە توتەپ بەرۋ سياقتى كەڭ سالالاردا اۋىس - كۇيىس، سەلبەستىك ورىستەتۋدى ءۇمىت ەتەدى. انگليا مەن جۇڭگو كوپ جاقتىلىققا تاباندى بولادى، انگليا جۇڭگومەن كوپ جاقتى قارىم - قاتىناستى، سايكەسۋدى كۇشەيتىپ، وڭىرلىك قولامتالى ماسەلەلەردى ساياسي جولمەن شەشۋدى ىلگەرىلەتۋدى قالايدى.

ساي چي، ۋاڭ ي قاتارلىلار كەزدەسۋدە بىرگە بولدى.

كەلۋ قاينارى: حالىق تورابى