لياڭ گۋاڭليە جولداستىڭ سۇيەگى بەيجيڭدە ورتەلدى

شينحۋا اگەنتتىگى، 11 - ايدىڭ 18 – كۇنى، بەيجيڭ. جۇڭگو كوممۋنيستىك پارتياسىنىڭ تاڭداۋلى مۇشەسى، ۇزاق سىننان وتكەن ادال كوممۋنيزم جاۋىنگەرى، ەلىمىزدىڭ مەملەكەت قورعانىسى قۇرىلىسى مەن ارميانىڭ اسكەري ىستەر قىزمەتىنىڭ كورنەكتى باسشىسى، ورتالىق اسكەري ىستەر كوميتەتىنىڭ بۇرىنعى مۇشەسى، بۇرىنعى مەملەكەتتىك كەڭەستىڭ مۇشەسى، قوسىمشا قورعانىس مينيسترلىگىنىڭ مينيسترى لياڭ گۋاڭليە جولداستىڭ سۇيەگى 11 - ايدىڭ 18 - كۇنى بەيجيڭدەگى باباۋشان توڭكەرىستىك قۇرباندار قابىرستانىندا ورتەلدى.

لياڭ گۋاڭليە جولداس 2024 – جىلى 11 - ايدىڭ 12 - كۇنى ساعات 2 دەن 43 مينۋت وتكەندە بەيجيڭدە 84 جاسىندا ناۋقاستان قايتىس بولدى.

لياڭ گۋاڭليە جولداستىڭ ناۋقاسى اۋىرلاعان كەزدە جانە قايتىس بولعاننان كەيىن شي جينپيڭ، لي چياڭ، جاۋ لىجي، ۋاڭ حۋنيڭ، ساي چي، ديڭ شۋەشياڭ، لي شي، حان جىڭ، حۋ جينتاۋ قاتارلى جولداستار شيپاحاناعا بارىپ كوڭىلىن سۇرادى نەمەسە ءتۇرلى فورمالمەن لياڭ گۋاڭليە جولداستىڭ قايتىس بولعاندىعىنا قايعىلى ازا ءبىلدىردى ءارى ونىڭ تۋىس - تۋعاندارىنان شىنايى حال سۇرادى.

جۇڭگو كوممۋنيستىك پارتياسى ورتالىق كوميتەتىنىڭ تاپسىرۋىمەن لي چياڭ، ديڭ شۋەشياڭ، حان جىڭ قاتارلىلار 11 - ايدىڭ 18 - كۇنى باباۋشان توڭكەرىستىك قۇرباندار قابىرستانىنا بارىپ، لياڭ گۋاڭليە جولداستىڭ سۇيەگىمەن قوشتاستى ءارى تۋىس - تۋعاندارىنان حال سۇرادى.

11 - ايدىڭ 18 - كۇنى تۇستەن بۇرىن باباۋشان توڭكەرىستىك قۇرباندار قابىرستانىنىڭ زالى قايعىلى جىم - جىرت كۇيگە ەندى، ازالى مۋزىكا باياۋ تولقىپ تۇردى. زالدىڭ تورىنە ”لياڭ گۋاڭليە جولداسقا قايعىلى ازا بىلدىرەمىز“ دەگەن اق ءتۇستى جازۋ جازىلعان قارا كەرمە تۋ ىلىنگەن، كەرمە تۋدىڭ استىنا لياڭ گۋاڭليە جولداستىڭ سۋرەتى ىلىنگەن. لياڭ گۋاڭليە جولداستىڭ سۇيەگىنىڭ اينالاسىنا الۋان گۇلدەر مەن ارشالار قويىلىپ، سۇيەگىنە نارت قىزىل جۇڭگو كوممۋنيستىك پارتياسىنىڭ تۋى جابىلعان.

تۇستەن بۇرىن ساعات 9 مولشەرىندە لي چياڭ، ديڭ شۋەشياڭ، حان جىڭ قاتارلىلار ازالى مۋزىكا ءۇنى ىشىندە لياڭ گۋاڭليە جولداستىڭ سۇيەگىنىڭ الدىنا باياۋ كەلىپ، ءۇنسىز ازا ءبىلدىرىپ، لياڭ گۋاڭليە جولداستىڭ سۇيەگىنە 3 رەت تاعزىم ەتتى ءارى لياڭ گۋاڭليە جولداستىڭ تۋىس - تۋعاندارىمەن ءبىر - بىرلەپ قول الىسىپ، باس شۋجي شي جينپيڭ قاتارلى ورتالىقتاعى باسشى جولداستاردىڭ شىنايى حال سۇراۋىن جەتكىزدى.

پارتيانىڭ، مەملەكەتتىڭ، ارميانىڭ قاتىستى باسشى جولداستارى سۇيەكپەن قوشتاستى نەمەسە ءتۇرلى تاسىلدەرمەن ازا ءبىلدىردى. ورتالىق پەن مەملەكەت ورگاندارىنىڭ قاتىستى تاراۋلارىنداعى جاۋاپتى جولداستار، لياڭ گۋاڭليە جولداستىڭ كوزى تىرىسىندەگى دوستارى مەن اۋىلداستارىنىڭ ۋاكىلدەرى دە سۇيەكپەن قوشتاستى.

كەلۋ قاينارى: حالىق تورابى