”جۇڭگو . تاڭ پاتشالىعى − كوپ نەگىزدى، اشىق پاتشالىق ءداۋىر (7 - عاسىردان 10 - عاسىرعا دەيىن)» كورمەسى اشىلدى

شينحۋا اگەنتتىگى، 11 - ايدىڭ 19 - كۇنى، بەيجيڭ. ”جۇڭگو . تاڭ پاتشالىعى − كوپ نەگىزدى، اشىق پاتشالىق ءداۋىر (7 - عاسىردان 10 - عاسىرعا دەيىن)» كورمەسى 11 - ايدىڭ 18 - كۇنى فرانسيانىڭ گيمەتا مەملەكەتتىك ازيا كوركەمونەرى مۇراجايىندا اشىلدى، جۇڭگونىڭ مەملەكەت ءتوراعاسى شي جينپيڭ مەن فرانسيانىڭ زۇڭتۇڭى ماكرون كورمەگە جەكە - جەكە العى ءسوز جازدى.

شي جينپيڭ بىلاي دەپ اتاپ كورسەتتى: بيىل − جۇڭگو مەن فرانسيانىڭ ديپلوماتيالىق قارىم - قاتىناس ورناتقاندىعىنىڭ 60 جىلدىعى. 5 - ايدا فرانسيادا ساپاردا بولعان كەزىمدە، جۇڭگو مەن فرانسيا فرانسيانىڭ گيمەتا مەملەكەتتىك ازيا كوركەمونەرى مۇراجايىندا تاڭ پاتشالىعى داۋىرىندەگى مادەني مۇرالار كورمەسىن وتكىزۋ كەلىسىمىنە كەلدى. مەن ەكى ەلدىڭ مادەني مۇرالار ماماندارىنىڭ بىرگە قۇلشىنۋىندا، ”جۇڭگو . تاڭ پاتشالىعى − كوپ نەگىزدى، اشىق پاتشالىق ءداۋىر (7 - عاسىردان 10 - عاسىرعا دەيىن)» كورمەسىنىڭ ۋاعىندا اشىلعاندىعىن كورىپ قاتتى قۋاندىم.

شي جينپيڭ بىلاي دەپ اتاپ كورسەتتى: تاڭ ءداۋىرى − جۇڭگو تاريحىنداعى ەڭ گۇلدەنگەن ءداۋىر، ەكونوميكاسى گۇلدەنگەن، مادەنيەتى گۇلدەنگەن، يدەياسى سيىسىمدى، كوركەمونەرى ايبىندى بولعان، ۇلتتارى توعىسقان. تاڭ پاتشالىعى داۋىرىندەگى مادەنيەت ازياعا ىقپال جاسادى ءارى جىبەك جولى ارقىلى ەۆروپاعا تارالدى. تاڭ پاتشالىعى داۋىرىندەگى ولەڭ، سۋرەت، التىن، كۇمىس بۇيىمدار سياقتى كوركەمونەرلىك تابىستار كۇنى بۇگىنگە دەيىن ادامدار جاعىنان ماداقتالىپ كەلەدى. وسى رەتكى كورمەنىڭ فرانسيا مەن ەۆروپاداعى كورەرمەندەرگە گۇلدەنگەن، شۇعىلالى، سەنىمدى، اشىق تاڭ ءداۋىرىنىڭ كوركەم بەينەسىن اناعۇرلىم وبرازدى تۇردە ۇعىندىرىپ، جۇڭحۋا وركەنيەتىنىڭ وزگەشە قۇدىرەتىن سەزىندىرەتىندىگىنە سەنەمىن.

شي جينپيڭ بىلاي دەپ اتاپ كورسەتتى: جۇڭحۋا ۇلتى مەن فرانسيا ۇلتىنىڭ ۇزاق تاريحى جانە شۇعىلالى مادەنيەتى بار. ەكى ەل حالقى ەجەلدەن ءبىر - بىرىنەن ونەگە الىپ، ءبىرىن - ءبىرى باۋراپ كەلەدى، دوستىق بارىس - كەلىسى ارىدان باستاۋ الادى. ءبىز تاريحي مادەنيەتتەن شابىت الىپ، گۋمانيتارلىق سالاداعى اۋىس - كۇيىستى، ءوزارا ۇلگى الۋدى جانە مادەنيەت مۇرالارىن قورعاۋ سەلبەستىگىن تەرەڭدەتىپ، اركىم ءوزى جاراتقان كوركەمدىكتەن ءلاززات الىپ، ءوز كوركەمدىگى مەن باسقالاردىڭ كوركەمدىگىن توعىستىرىپ، تاريحي سۇيىسپەنشىلىك پەن ءداۋىر رۋحىن جۇڭگو - فرانسيا دوستىعىمەن توعىستىرىپ، جۇڭگو مەن فرانسيانىڭ جالپى بەتتىك ستراتەگيالىق سەرىكتەستىك قارىم - قاتىناسىن اناعۇرلىم بەكەمدەۋىمىز جانە ومىرشەڭدىك كۇشكە باي ەتۋىمىز كەرەك.

ماكرون زۇڭتۇڭ مىنالاردى ءبىلدىردى: فرانسيا مەن جۇڭگونىڭ ديپلوماتيالىق قارىم - قاتىناس ورناتقاندىعىنىڭ 60 جىلدىعىن جانە مادەنيەت - ساياحات جىلىن قۇتتىقتاۋ ءۇشىن، گيمەتا مۇراجايى تاڭ ءداۋىرىنىڭ سالتاناتتى مادەني مۇرالارى كورمەسىن وتكىزەدى. تاڭ ءداۋىرىنىڭ جۇڭگونىڭ وركەنيەت تاريحىنداعى ورنى ەرەكشە، شۇعىلالى مادەنيەتكە جانە ادام سەنگىسىز جاسامپازدىق ومىرشەڭدىك كۇشكە يە، سونداي - اق جىبەك جولى ارقىلى سىرتپەن بەلسەنە اۋىس - كۇيىس جاساپ، ادامدى تاڭ قالدىراتىن كوركەمونەر بايلىعىن جاراتتى. تاريحي مانگە يە وسى كورمە فرانسيا مەن جۇڭگونىڭ مادەنيەت اۋىس - كۇيىسىنىڭ ومىرشەڭدىك كۇشكە تولى ەكەندىگىن، ەكى ەل قارىم - قاتىناسىنىڭ دامۋىندا ۇزدىكسىز ماڭىزدى رول اتقاراتىندىعىن تاعى ءبىر رەت ايگىلەدى.

بۇل رەتكى كورمەگە جۇڭگو مەملەكەتتىك مادەني مۇرالار مەكەمەسى مەن فرانسيا مادەنيەت مينيسترلىگى جەتەكشىلىك ەتىپ، جۇڭگونىڭ 10 ولكە، اۆتونوميالى رايون، توتە قاراستى قالاسىنداعى 32 مادەنيەت كورمەسى قۇرىلىمىنىڭ 200 پارشادان (توپ) استام ادەمى مادەني مۇرالارى كورمەگە قويىلدى.

كەلۋ قاينارى: حالىق تورابى