شي جينپيڭ برازيليانىڭ زۇڭتۇڭى لۋلامەن كەڭەس وتكىزدى

سول جەر ۋاقىتى 11 - ايدىڭ 20 - كۇنى تۇستەن بۇرىن مەملەكەت ءتوراعاسى شي جينپيڭ برازيليا زۇڭتۇڭ سارايىنىڭ ارايلى تاڭ سارايىندا برازيليانىڭ زۇڭتۇڭى لۋلامەن كەڭەس وتكىزدى.

سۋرەتتى شينحۋا اگەنتتىگىنىڭ ءتىلشىسى لي شۋەرىن تۇسىرگەن

سول جەر ۋاقىتى 11 - ايدىڭ 20 - كۇنى تۇستەن بۇرىن مەملەكەت ءتوراعاسى شي جينپيڭ برازيليا زۇڭتۇڭ سارايىنىڭ ارايلى تاڭ سارايىندا برازيليانىڭ زۇڭتۇڭى لۋلامەن كەڭەس وتكىزدى. كەڭەستەن بۇرىن لۋلا زۇڭتۇڭ مەن حانىمى روسانجەلا شي جينپيڭدى قىزۋ قارسى الدى ءارى شي جينپيڭگە ارناپ سالتاناتتى قارسى الۋ سالتىن وتكىزدى.

سۋرەتتى شينحۋا اگەنتتىگىنىڭ ءتىلشىسى لي شۋەرىن تۇسىرگەن

«حالىق گازەتى»، 11 - ايدىڭ 20 - كۇنى، برازيليا (تىلشىلەر دۋ شاڭزى، جاۋ مىڭياڭ). سول جەر ۋاقىتى 11 - ايدىڭ 20 - كۇنى تۇستەن بۇرىن مەملەكەت ءتوراعاسى شي جينپيڭ برازيليا زۇڭتۇڭ سارايىنىڭ ارايلى تاڭ سارايىندا برازيليانىڭ زۇڭتۇڭى لۋلامەن كەڭەس وتكىزدى. ەكى ەل مەملەكەت باسشىلارى جۇڭگو - برازيليا قارىم - قاتىناسىنىڭ ورنىن اناعۇرلىم ادىلەتتى دۇنيە ءجۇزى مەن اناعۇرلىم باياندى پلانەتاداعى جۇڭگو - برازيليا تاعدىرلاس ورتاق تۇلعاسىن قول ۇستاسا قۇرۋ دەڭگەيىنە كوتەرەتىندىگىن جاريالادى.

جاز باسىنداعى برازيليادا اسپان شايداي اشىق. ارايلى تاڭ سارايى جاسىل جەلەك جامىلعان، 450 ايبىندى قۇرمەت قاراۋىلى رەتتى ساپ تۇزەپ تۇر. 120 اتتى اسكەردىڭ قورعاۋىندا شي جينپيڭ اۆتوكولىكپەن ارايلى تاڭ سارايىنىڭ الدىنداعى الاڭعا باردى.

لۋلا زۇڭتۇڭ مەن حانىمى روسانجەلا شي جينپيڭدى قىزۋ قارسى الدى ءارى شي جينپيڭگە ارناپ سالتاناتتى قارسى الۋ سالتىن وتكىزدى.

اسكەري وركەستر جۇڭگو مەن برازيليانىڭ مەملەكەت اندەرىن ورىندادى. ەكى ەلدىڭ مەملەكەت باسشىلارى قۇرمەت قاراۋىلىنىڭ سالتانات قاتارىن بىرگە كوردى. جۇڭگولىق، برازيليالىق بالالار ەكى ەلدىڭ مەملەكەت تۋىن بۇلعاپ شي جينپيڭدى قىزۋ قارسى الدى. برازيليا كوركەمونەرشىلەرى جۇڭگو تىلىندە «مەنىڭ وتانىم» ءانىن شىرقادى.

ەكى ەلدىڭ مەملەكەت باسشىلارى جەكە - جەكە قارسى جاقتان سەرىك بولىپ كەلگەندەرمەن قول الىسىپ قۇرمەت ءبىلدىردى.

قارسى الۋ سالتىنان كەيىن ەكى ەلدىڭ مەملەكەت باسشىلارى كەڭەس وتكىزدى.

شي جينپيڭ بىلاي دەپ اتاپ كورسەتتى: جۇڭگو مەن برازيليانىڭ ديپلوماتيالىق قارىم - قاتىناس ورناتقاندىعىنىڭ 50 جىلدىعى سىندى ماڭىزدى تاريحي مانگە يە جىلدا برازيليادا ساپاردا بولعانىما توتەنشە قۋانىشتامىن. الگىندە لۋلا زۇڭتۇڭنىڭ ماعان ەڭ جوعارى قۇرمەت دارەجەسىندەگى سالتاناتتى قارسى الۋ سالتىن وتكىزۋى جۇڭگو - برازيليا قارىم - قاتىناسىنا ايرىقشا ءمان بەرەتىندىگىن، سونداي - اق جۇڭگو حالقىنا دەگەن تەرەڭ دوستىعىن تولىق ايگىلەپ، مەنى قاتتى اسەرلەندىردى. جۇڭگو مەن برازيليا − شىعىس، باتىس جارتى شارداعى ەكى ۇلكەن وركەندەپ كەلە جاتقان ەل. وتكەن 50 جىلعا قايىرىلا قاراساق، جۇڭگو - برازيليا قارىم - قاتىناسى تاۋ - تەڭىزدەن ءوتىپ، وركەندەپ كەلە جاتقان ءىرى ەلدەردىڭ ءوزارا قۇرمەت ەتۋ، ءوزارا پايدا جەتكىزىپ، دوستىق ورناتۋ، سەلبەسىپ تەڭ يگىلىككە كەنەلۋ سىندى دۇرىس قارىم - قاتىناس جولى اشىلدى. برازيليا − جۇڭگومەن ستراتەگيالىق سەرىكتەستىك قارىم - قاتىناس ورناتقان تۇڭعىش مەملەكەت، جۇڭگومەن جان - جاقتى ستراتەگيالىق سەرىكتەستىك قارىم - قاتىناس ورناتقان لاتىن امەريكاسىنداعى تۇڭعىش مەملەكەت. تاياۋ جىلداردان بەرى لۋلا زۇڭتۇڭ ەكەۋىمىزدىڭ ستراتەگيالىق جەتەكشىلىگىمىزدە، ەكى ەل كۇن سايىن تاعدىرلاس، سەنىمدى دوسقا، بەيبىتشىلىكتى بىرگە جەبەيتىن بەلسەندى كۇشكە اينالدى، جۇڭگو - برازيليا قارىم - قاتىناسى تاريحتاعى ەڭ جاقسى مەزگىلدە تۇر، ەكى ەل حالقىنىڭ ىرىس - قۇتىن ارتتىرۋمەن بىرگە، قالىڭ وركەندەپ كەلە جاتقان ەلدەردىڭ ورتاق مۇددەسىن دە قورعاپ، دۇنيە ءجۇزىنىڭ وڭتۇستىگىنىڭ كۇش - قۋاتى مەن ءۇنىن زورايتىپ، دۇنيە ءجۇزىنىڭ بەيبىتشىلىگى مەن ورنىقتىلىعىنا كورنەكتى ۇلەس قوستى.

شي جينپيڭ بىلاي دەپ باسا دارىپتەدى: بۇگىن ءبىز جۇڭگو - برازيليا قارىم – قاتىناسىن اناعۇرلىم ادىلەتتى دۇنيە ءجۇزى مەن اناعۇرلىم باياندى پلانەتاداعى جۇڭگو - برازيليا تاعدىرلاس ورتاق تۇلعاسىن قول ۇستاسا قۇرۋ دەڭگەيىنە كوتەردىك، سونىمەن بىرگە، ”ءبىر بەلدەۋ، ءبىر جولدى“ بىرگە قۇرۋ باستاماسىن برازيليانىڭ دامۋ ستراتەگياسىمەن ۇشتاستىردىق، بۇل جۇڭگو - برازيليا قارىم - قاتىناسى دامۋىنىڭ تاعى ءبىر تاريحي ءساتى بولىپ، ەكى ەل قارىم - قاتىناسىنىڭ جاھاندىق، ستراتەگيالىق، ۇزاق بولاشاقتىق سيپاتىن ايگىلەدى، بۇل ەكى ەل حالقىنىڭ جالپى بەتتىك تىلەگىنە ۇيلەسەدى، ەكى جاقتىڭ وزدەرىنىڭ وسىزاماندانۋىن ىلگەرىلەتۋىنە قوزعاۋشى كۇش ازىرلەۋمەن بىرگە، جۇڭگو مەن برازيليانىڭ حالىقارالىق ادىلدىك پەن ادىلەتتىلىكتى قول ۇستاسا قورعاپ، دۇنيە ءجۇزىنىڭ بىرگە دامۋىن جەبەۋ بەكىمىن ايگىلەدى. جۇڭگو برازيليا جاقپەن بىرگە ادامزاتتىڭ بولاشاعىن، حالىقتىڭ باقىتىن كوكەيدە ساقتاپ، جاڭا داۋىردەگى جۇڭگو - برازيليا قارىم - قاتىناسىنىڭ مازمۇنىن ۇزدىكسىز بايىتىپ، ءوزارا تابىسقا جەتۋدەگى ”التىنداي سەرىك“ بولىپ، ادامزاتتىڭ تاعدىرلاس ورتاق تۇلعاسىن قۇرۋ، اناعۇرلىم ادىلەتتى دۇنيە ءجۇزىن جانە اناعۇرلىم باياندى پلانەتانى قۇرۋ نىساناسىنا قاراي ۇزدىكسىز قادام تاستاپ، ادامزاتتىڭ بەيبىتشىلىگى مەن العا باسۋ ىستەرىنە اناعۇرلىم زور ۇلەس قوسۋدى قالايدى.

شي جينپيڭ ەكى ەل قارىم - قاتىناسىنىڭ بولاشاقتاعى دامۋى جونىندە 4 جاقتان ۇسىنىس قويدى.

ءبىرىنشى، تاعدىرلاس بولىپ، ستراتەگيالىق ءوزارا سەنىمدىلىكتى ۇزدىكسىز بەكەمدەۋ. يەلىك ۇقىق، حاۋىپسىزدىك، تەرريتوريا تۇتاستىعى سياقتى وزەكتى مۇددەگە ساياتىن ماسەلەلەردە ءبىر - ءبىرىن باتىل قولداپ، ءبىر - بىرىنە سەنەتىن ستراتەگيالىق سەرىكتەر مەن دۇنيە جۇزىندەگى وڭتۇستىك ەلدەردىڭ ىنتىماقتاسا سەلبەسۋىنىڭ، ءوزارا پايدا جەتكىزىپ، تەڭ يگىلىككە كەنەلۋىنىڭ، بىرگە دامۋىنىڭ ۇلگىسى بولۋ كەرەك. مادەنيەت، وقۋ - اعارتۋ، جاستار سياقتى سالالارداعى گۋمانيتارلىق اۋىس - كۇيىستى كۇشەيتىپ، جۇڭگو - برازيليا تاعدىرلاس ورتاق تۇلعاسىنىڭ حالىق رايى نەگىزىن بەكەمدەۋ كەرەك.

ەكىنشى، بىرگە دامىپ، دامۋ ستراتەگياسىن ۇشتاستىرۋدى ۇزدىكسىز تەرەڭدەتۋ. ”ءبىر بەلدەۋ، ءبىر جولدى“ بىرگە قۇرۋ باستاماسىنىڭ برازيليانىڭ دامۋ ستراتەگياسىمەن ۇشتاسۋىنىڭ تاريحي ورايىن يگەرىپ، ەكونوميكا - ساۋدا، نەگىزدىك قۇرىلعى، فينانس، عىلىم - تەحنيكا، قورشاعان ورتانى قورعاۋ سياقتى ءتۇيىندى سالالارداعى سەلبەستىكتى تەرەڭدەتىپ، عارىش، اۋىل شارۋاشىلىق عىلىم - تەحنيكاسى، تازا ەنەرگيا سياقتى سالالارداعى سەلبەستىكتى كۇشەيتۋ كەرەك. جۇڭگو جاق كەدەيلىكتەن ارىلتۋدان قامال الۋدى ەل باسقارۋداعى كورنەكتى ورىنعا قويىپ، برازيليانىڭ ”اشارشىلىقتى نولگە ءتۇسىرۋ“ جوسپارىن قولدايدى، برازيليا جاقپەن كەدەيلەردى ازايتۋ سەلبەستىگىن ۇزدىكسىز كۇشەيتىپ، ەكى ەل حالقىن اناعۇرلىم تاماشا تۇرمىسقا كەنەلتۋدى قالايدى.

ءۇشىنشى، جاۋاپكەرشىلىكتى بىرگە ارقالاپ، دۇنيە ءجۇزىنىڭ بەيبىتشىلىگى مەن ادىلەتتىلىگىن قورعاۋ ءۇشىن جۇڭگو مەن برازيليانىڭ كۇشىن ايگىلەۋ. ناعىز كوپ جاقتىلىقتى امالياتتا ايگىلەپ، ءادىل ءسوز ايتۋعا، ءادىل ءىس ىستەۋگە تاباندى بولىپ، دۇنيە جۇزىلىك باسقارۋدىڭ اناعۇرلىم ءادىل، ۇيلەسىمدى باعىتقا قاراي دامۋىن ىلگەرىلەتۋ كەرەك. جۇڭگو جاق برازيليانىڭ حالىقارالىق ورنى مەن ىقپال كۇشىنە ايرىقشا ءمان بەرەدى، برازيليانىڭ حالىقارالىق ساحنادا اناعۇرلىم زور رول اتقارۋىن قولدايدى، برازيليا جاقپەن بىرلەسكەن مەملەكەتتەر ۇيىمى جانە بريكس ەلدەرى سياقتى كوپ جاقتى مەحانيزمدە پىكىرلەسۋدى، سايكەسۋدى كۇشەيتۋدى قالايدى، برازيريانىڭ كەلەر جىلى بريكس ەلدەرىنىڭ ءتوراعا ەلى مىندەتىن اتقارۋىنا قولداۋ كورسەتەدى، ”ۇلكەن بريكس سەلبەستىگىنىڭ“ جوعارى ساپالى دامۋىنا دەم بەرەدى، كوپ جاقتىلىققا تاباندى بولۋ، دۇنيە جۇزىلىك باسقارۋدى كەمەلدەندىرۋ جونىنەن اناعۇرلىم اسقاق بريكس ءۇنىن شىعارادى.

ءتورتىنشى، بەينەت پەن زەينەتتە بىرگە بولىپ، ادامزاتتىڭ تاعدىرلاس ورتاق تۇلعاسىن قۇرۋعا جۇڭگو - برازيليا ۇلەسىن قوسۋ. جۇڭگو مەن برازيليا وركەندەپ كەلە جاتقان ءىرى ەل رەتىندە، باستاماشىلدىقپەن بىرگە اقىلداسىپ، بىرگە كەڭەسىپ، ”ءبىر جاعادان باس، ءبىر جەڭنەن قول شىعارۋدى“ ىلگەرىلەتىپ، ادامزاتتىڭ بولاشاعى مەن تاعدىرىنا ساياتىن دۇنيە جۇزىلىك سىن - سايىسقا تىزە قوسا توتەپ بەرۋى كەرەك. جاسىل تيپكە بۇرىلىس جاساۋ، باياندى دامۋ، كليمات وزگەرىسىنە توتەپ بەرۋ، جاساندى زەردەنى باسقارۋ سياقتى سالالارداعى سەلبەستىكتى كۇشەيتۋ كەرەك. جۇڭگو جاق برازيليانىڭ «بىرلەسكەن مەملەكەتتەر ۇيىمىنىڭ كليمات وزگەرىسى جونىندەگى جۇلگەلىك شارتىنىڭ» 30 - رەتكى شارتتاسۋشى جاقتار جينالىسىن ويداعىداي وتكىزۋىن قولدايدى.

شي جينپيڭ بىلاي دەپ اتاپ كورسەتتى: 10 جىلدىڭ الدىندا مەن برازيليادا لاتىن امەريكاسى جانە كارايب ەلدەرى باسشىلارىمەن بىرگە جۇڭگو - لاتىن امەريكاسى تالقى مىنبەرىن قۇرۋدى جاريالاپ، جۇڭگو - لاتىن امەريكاسى قارىم - قاتىناسىنىڭ بارابار، ءوزارا پايدا جەتكىزەتىن، جاڭالىق اشاتىن، اشىق، حالىققا تيىمدىلىك جەتكىزەتىن جاڭا داۋىرگە ءوتۋىن ىلگەرىلەتتىم. جۇڭگو جاق برازيليا جاقپەن بىرگە جۇڭگو - لاتىن امەريكاسى تالقى مىنبەرىن ۇزدىكسىز ويداعىداي وتكىزىپ، ”ءبىر بەلدەۋ، ءبىر جولدى“ بىرگە قۇرۋ باستاماسىن لاتىن امەريكاسى مەن كارايب ءوڭىرىنىڭ دامۋ ابزالدىعىمەن جانە سۇرانىسىمەن اناعۇرلىم ويداعىداي ۇشتاستىرىپ، جۇڭگو - لاتىن امەريكاسى تاعدىرلاس ورتاق تۇلعاسى قۇرىلىسىنىڭ اناعۇرلىم كوپ جەتىستىكتەرگە قول جەتكىزۋىن ىلگەرىلەتۋدى قالايدى.

لۋلا مىنالاردى ءبىلدىردى: برازيليا مەن جۇڭگو − ءوزارا قۇرمەت ەتەتىن، ءوزارا ارقا سۇيەيتىن جاقسى دوستار، جۇڭگو − برازيليانىڭ ەڭ ماڭىزدى ستراتەگيالىق سەلبەستىك سەرىگى، جۇڭگو حالقى − برازيليا حالقىنىڭ ەڭ سەنىمدى دوسى. بيىل − برازيليا مەن جۇڭگونىڭ ديپلوماتيالىق قارىم - قاتىناس ورناتقاندىعىنىڭ 50 جىلدىعى، ءتوراعا شي جينپيڭنىڭ وسى ماڭىزدى ساتتە برازيليادا تاعى دا مەملەكەتتىك ساپاردا بولۋىن قىزۋ قارسى الامىز. الگىندەگى قارسى الۋ سالتىندا مەن برازيليا كوركەمونەرشىلەرىن جۇڭگو تىلىندەگى ايگىلى ءان − «مەنىڭ وتانىمدى» ايتۋعا ارنايى ورنالاستىردىم، وسى ارقىلى جۇڭگو جاقتىڭ بىلتىر جۇڭگوعا ساپارلاي بارعانىمدا ىستىق ىقىلاسپەن كۇتىپ العانىنا العىس ايتتىم ءارى برازيليا حالقىنىڭ جۇڭگو حالقىنا دەگەن تەرەڭ سۇيىسپەنشىلىگىن ءبىلدىردىم. وتكەن 50 جىلدا برازيليا مەن جۇڭگونىڭ ءار سالاداعى سەلبەستىگىندە سۇبەلى تابىستارعا قول جەتتى. برازيليا جاق ءتوراعا شي جينپيڭنىڭ ساپارىن جاڭا باستاما ەتىپ، ەكى ەل قارىم - قاتىناسىنىڭ اناعۇرلىم كوپ ناقتى جاڭا جەتىستىكتەرگە قول جەتكىزۋىن ىلگەرىلەتىپ، اناعۇرلىم ادىلەتتى دۇنيە ءجۇزى مەن اناعۇرلىم باياندى پلانەتاداعى برازيليا - جۇڭگو تاعدىرلاس ورتاق تۇلعاسىن قول ۇستاسا قۇرۋدى ءۇمىت ەتەدى. برازيليا جاق قازىر ”ارتۋدى جەدەلدەتۋ جوسپارى“، ”جاڭا ونەركاسىپ جوسپارى“، ”وڭتۇستىك امەريكانى ءبىر تۇلعالاندىرۋ لۋشيان جوسپارى“ سياقتى دامۋ ستراتەگيالارىن زور كۇشپەن ىلگەرىلەتۋدە، بۇلار جۇڭگو جاقتىڭ ”ءبىر بەلدەۋ، ءبىر جول“ باستاماسىمەن بارىنشا قابىسادى، ەكى جاق دامۋ ستراتەگياسىن ۇشتاستىرۋدى كۇشەيتىپ، برازيليانىڭ قايتالاي ونەركاسىپتەندىرۋ اياق الىسىنا بارىنشا دەم بەرىپ، وڭتۇستىك امەريكانى ءبىر تۇلعالاندىرۋ قۇرىلىسىن جەبەپ، وركەندەپ كەلە جاتقان ەلدەردىڭ ىنتىماقتاسا سەلبەسۋىنىڭ، ءوزارا پايدا جەتكىزىپ، تەڭ يگىلىككە كەنەلۋىنىڭ ۇلگىسىن ورناتادى. ەكى جاقتىڭ قىزمەت گرۋپپالارى نەگىزدىك قۇرىلعى، فينانس، كاسىپ سالاسى تىزبەگى، عىلىم - تەحنيكا، ەكولوگيالىق ورتانى قورعاۋ سياقتى ءتۇيىندى سالالارداعى سەلبەستىكتى جەدەل تالقىلاۋى جانە ىلگەرىلەتۋى كەرەك. ءتىپتى دە كوپ جۇڭگو كاسىپورىندارىنىڭ برازيلياعا كەلىپ قارجى قوسىپ، سەلبەستىك جاساۋىن قارسى الامىز. برازيليا جاق جۇڭگومەن ۇلاستىرۋ - تۇتاستىرۋ جانە زات اينالىمى دەڭگەيىن جوعارىلاتىپ، برازيليا مەن جۇڭگونىڭ جانە لاتىن امەريكاسى مەن جۇڭگونىڭ بىرگە دامۋىن، گۇلدەنۋىن جەبەۋدى ءۇمىت ەتەدى. برازيليا جاق ”جاڭا قىرعي قاباقتىق سوعىسقا“ قارسى تۇرادى، دۇنيە ءجۇزىنىڭ كوپ ۇيەكتەنۋىن جانە بارابار بولۋ مەن ءوزارا قۇرمەت ەتۋدى نەگىز ەتكەن دۇنيە جۇزىلىك سەرىكتەستىك قارىم - قاتىناستى ىلگەرىلەتۋدى دارىپتەيدى، جۇڭگو جاقپەن بىرلەسكەن مەملەكەتتەر ۇيىمى، بريكس ەلدەرى، 20 ەل توبى سياقتى كوپ جاقتى جۇلگەدەگى قارىم - قاتىناستى، سەلبەستىكتى ۇزدىكسىز تەرەڭدەتىپ، دۇنيە ءجۇزىنىڭ وڭتۇستىگىنىڭ دۇنيە جۇزىلىك باسقارۋداعى ءسوز بيلىگى مەن ىقپال كۇشىن جوعارىلاتۋدى قالايدى. برازيليا جاق سونداي – اق جۇڭگو جاقپەن كوپ جاقتى سەلبەستىكتى ۇزدىكسىز جيىلەتىپ، ۋكراينا داعدارىسى سياقتى قولامتالى ماسەلەلەردى بەيبىت جولمەن شەشۋدى ىلگەرىلەتۋگە بەلسەندى ۇلەس قوسۋدى قالايدى. ءتوراعا شي جينپيڭنىڭ وسى رەتكى ساپارى برازيليا - جۇڭگو قارىم - قاتىناسى تاريحىنداعى جاڭا بەلەسكە اينالىپ، برازيليا - جۇڭگو تاعدىرلاس ورتاق تۇلعاسىن قۇرۋدىڭ تىڭ پاراعىن اشتى.

كەڭەستەن كەيىن ەكى ەل مەملەكەت باسشىلارى «جۇڭحۋا حالىق رەسپۋبليكاسى مەن برازيليا فەدەراتسيالىق رەسپۋبليكاسىنىڭ اناعۇرلىم ادىلەتتى دۇنيە ءجۇزى مەن اناعۇرلىم باياندى پلانەتاداعى جۇڭگو - برازيليا تاعدىرلاس ورتاق تۇلعاسىن قول ۇستاسا قۇرۋ جونىندەگى بىرلەسكەن مالىمدەمەسىنە» بىرگە قول قويدى.

ەكى ەلدىڭ مەملەكەت باسشىلارى «جۇڭحۋا حالىق رەسپۋبليكاسى ۇكىمەتى مەن برازيليا فەدەراتسيالىق رەسپۋبليكاسى ۇكىمەتىنىڭ ”ءبىر بەلدەۋ، ءبىر جولدى“ بىرگە قۇرۋ باستاماسىن ”ارتۋدى جەدەلدەتۋ جوسپارىمەن“، ”برازيليانىڭ جاڭا ونەركاسىپ جوسپارىمەن“، ”ەكولوگيادا تيپكە بۇرىلىس جاساۋ جوسپارىمەن“، ”وڭتۇستىك امەريكانى ءبىر تۇلعالاندىرۋ لۋشيان جوسپارىمەن“ ۇشتاستىرۋ جونىندەگى سەلبەستىك جوباسىنا» قول قويۋعا بىرگە كۋا بولدى.

ساپار كەزىندە ەكى جاق تاعى ەكونوميكا - ساۋدا، قارجى قوسۋ، اۋىل شارۋاشىلىعى، سيفرلى ەكونوميكا، باياندى دامۋ، عىلىم - تەحنيكا، جاساندى زەردە، دۇنيە جۇزىلىك دامۋ سەلبەستىگى سياقتى سالالارداعى 30 نەشە ەكى جاقتى سەلبەستىك قۇجاتىنا قول قويدى.

ساي چي، ۋاڭ ي قاتارلىلار جوعارىداعى قيمىلدارعا قاتىناستى.

كەلۋ قاينارى: حالىق تورابى