شي جينپيڭ برازيليانىڭ زۇڭتۇڭى لۋلامەن بىرگە تىلشىلەرمەن كەزدەستى

سول جەر ۋاقىتى 11 - ايدىڭ 20 - كۇنى تۇستەن بۇرىن مەملەكەت ءتوراعاسى شي جينپيڭ برازيليانىڭ زۇڭتۇڭى لۋلامەن برازيليا زۇڭتۇڭ سارايىنىڭ ارايلى تاڭ سارايىندا كەڭەس وتكىزگەننەن كەيىن تىلشىلەرمەن بىرگە كەزدەستى.

سۋرەتتى شينحۋا اگەنتتىگىنىڭ ءتىلشىسى حۋاڭ جيڭۋىن تۇسىرگەن

«حالىق گازەتى»، 11 - ايدىڭ 20 - كۇنى، برازيليا (تىلشىلەر ياڭ شۋەبو، شى يۋانحاۋ). سول جەر ۋاقىتى 11 - ايدىڭ 20 - كۇنى تۇستەن بۇرىن مەملەكەت ءتوراعاسى شي جينپيڭ برازيليانىڭ زۇڭتۇڭى لۋلامەن برازيليا زۇڭتۇڭ سارايىنىڭ ارايلى تاڭ سارايىندا كەڭەس وتكىزگەننەن كەيىن تىلشىلەرمەن بىرگە كەزدەستى.

شي جينپيڭ بىلاي دەپ اتاپ كورسەتتى: بۇل مەنىڭ 5 جىلدان كەيىن تاعى دا وسى ”سۇيىسپەنشىلىككە جانە ۇمىتكە تولى جەرگە“ قادام تاستاۋىم. اتتانار الدىندا مەن برازيليانىڭ ءار سالاسىنداعى دوس قايراتكەرلەردەن كەلگەن كوپتەگەن حاتتى تاپسىرىپ الدىم، حاتتا برازيليا حالقىنىڭ جۇڭگو - برازيليا دوستىعىن قاستەرلەۋى جانە ەكى ەل دوستىعىن تەرەڭدەتۋ جونىندەگى تىلەگى ايگىلەنىپ، مەنى قاتتى اسەرلەندىردى. الگىندە مەن لۋلا زۇڭتۇڭمەن ىقىلاستى دوسجار بەينەدە ناتيجەلى كەڭەس وتكىزدىم. ءبىز جۇڭگو - برازيليا قارىم - قاتىناسىنىڭ 50 جىلدىق دامۋ بارىسىن بىرگە ەسكە الىپ، ءبىر اۋىزدان بىلاي دەپ قارادىق: ەكى ەل قارىم - قاتىناسى تاريحتاعى ەڭ جاقسى مەزگىلدە تۇر، كۇن سايىن جاھاندىق، ستراتەگيالىق، ۇزاق بولاشاقتىق ىقپالدى ايگىلەپ، وركەندەپ كەلە جاتقان ءىرى ەلدەردىڭ قول ۇستاسا بىرگە ىلگەرىلەۋىنىڭ، ىنتىماقتاسا سەلبەسۋىنىڭ ۇلگىسىنە اينالدى.

ءبىز جۇڭگو - برازيليا قارىم - قاتىناسىنىڭ بولاشاق دامۋى جونىندە جاڭا ستراتەگيالىق ورتاق تانىمعا كەلدىك، مۇنىڭ ىشىندە ەڭ ماڭىزدىسى، ءبىز ەكى جاقتى قارىم - قاتىناستى اناعۇرلىم ادىلەتتى دۇنيە ءجۇزى مەن اناعۇرلىم باياندى پلانەتاداعى جۇڭگو - برازيليا تاعدىرلاس ورتاق تۇلعاسىن قول ۇستاسا قۇرۋ دەڭگەيىنە كوتەرۋدى بىرگە ۇيعاردىق، سونىمەن بىرگە، ”ءبىر بەلدەۋ، ءبىر جولدى“ بىرگە قۇرۋ باستاماسىن برازيليانىڭ دامۋ ستراتەگياسىمەن ۇشتاستىردىق. دۇنيە ءجۇزىنىڭ اۋقىمى جەدەل قۇبىلعان جاعدايدا بۇل جۇڭگو مەن برازيليانىڭ وركەندەپ كەلە جاتقان ەكى ءىرى ەلدىڭ وزگەرىستى تانۋ، وزگەرىسكە توتەپ بەرۋ، وزگەرىسكە ۇمتىلۋ بەكىمىن ايگىلەدى، بۇل ەكى ەل قارىم - قاتىناسىنىڭ بۇرىنعىعا مۇراگەر بولىپ، كەيىنگىگە جول اشۋىن ىلگەرىلەتىپ، كەلەسى ”التىن 50 جىلدىقتى“ باستايدى، سونىمەن بىرگە، دۇنيە ءجۇزىنىڭ وڭتۇستىگىندەگى ەلدەردىڭ ىنتىماقتاسا ءوزىن الۋەتتەندىرۋىنە ۇلگى بولىپ، وركەندەپ كەلە جاتقان ەلدەردىڭ دۇنيە ءجۇزىن باسقارۋداعى ۋاكىلدىك سيپاتى مەن ءسوز سويلەۋ ۇقىعىن جوعارىلاتۋعا تىڭ ۇلەس قوسادى.

ءبىز ءبىر اۋىزدان بىلاي دەپ قارادىق: ستراتەگيالىق ءوزارا سەنىمدىلىكتى ۇزدىكسىز تەرەڭدەتىپ، يەلىك ۇقىق، حاۋىپسىزدىك، دامۋ مۇددەسى سياقتى وزەكتى ماسەلەلەرگە ساياتىن ماسەلەلەردە ءوزارا باتىل قولداۋ كورسەتىپ، وزدەرىنىڭ جوعارى ساپالى دامۋىن جەبەۋ كەرەك. شىعىس، باتىس جارتى شارداعى وركەندەپ كەلە جاتقان ەكى ءىرى ەل رەتىندە، ءبىز دۇنيە جۇزىندەگى وڭتۇستىك ەلدەردىڭ ورتاق مۇددەسىن قورعاۋعا جەتەكشىلىك ەتۋ، حالىقارالىق ءتارتىپتىڭ اناعۇرلىم ءادىل، ۇيلەسىمدى باعىتقا قاراي دامۋىن ىلگەرىلەتۋ سىندى تاريحي اۋىر مىندەتتى ىرىقتىلىقپەن ارقالاۋىمىز كەرەك.

ءبىز ءبىر اۋىزدان بىلاي دەپ قارادىق: ەكى ەلدىڭ دامۋ ستراتەگياسىن ۇشتاستىرۋ سىندى كەلەلى ءىستى ويداعىداي ىستەۋ كەرەك. ەكونوميكا - ساۋدا، فينانس، عىلىم - تەحنيكا، نەگىزدىك قۇرىلعى قۇرىلىسى، قورشاعان ورتانى قورعاۋ سياقتى ءتۇيىندى سالالارداعى سەلبەستىكتى تەرەڭدەتىپ، ەنەرگيادا تيپكە بۇرىلىس جاساۋ، سيفرلى ەكونوميكا، جاساندى زەردە، جاسىل كەن ونىمدەرى سياقتى جاڭادان گۇلدەنگەن سالالارداعى سەلبەستىكتى كۇشەيتىپ، ۋاقىت كۇتىپ تۇرمايدى دەيتىن تەبىنمەن ەكى ەلدىڭ ناقتى سەلبەستىگىن تەرەڭدەتىپ، ناقتىلاندىرىپ، جۇڭگو مەن برازيليانىڭ ءوز - ءوزىنىڭ وسىزامانداندىرۋ قۇرىلىسىنىڭ ۇدەۋىنە دەم بەرۋ كەرەك.

ءبىز ءبىر اۋىزدان بىلاي دەپ قارادىق: جۇڭگو مەن برازيليا بىرلەسكەن مەملەكەتتەر ۇيىمى، 20 ەل توبى، بريكس ەلدەرى سياقتى كوپ جاقتى مەحانيزمدە ۇزدىكسىز تىعىز سەلبەسىپ، اشارشىلىق پەن كەدەيلىك، وڭىرلىك قاقتىعىس، كليمات وزگەرىسى، ينتەرنەت حاۋىپسىزدىگى سياقتى ءداستۇرلى جانە بەي ءداستۇرلى سالالارداعى حاۋىپسىزدىك سىن - سايىسىنا بىرگە توتەپ بەرىپ، دۇنيە ءجۇزىنىڭ بەيبىتشىلىگى مەن دامۋ ىستەرىنە جۇڭگو مەن برازيليا جاڭا ۇلەسىن قوسۋى كەرەك. كەلەر جىل − جۇڭگو - لاتىن امەريكاسى تالقى مىنبەرى رەسمي ىسكە قوسىلعاندىعىنىڭ 10 جىلدىعى، جۇڭگو برازيليامەن جانە لاتىن امەريكاسىنداعى باسقا ەلدەرمەن بىرگە جۇڭگو - لاتىن امەريكاسى سەلبەستىگىنىڭ تىڭ ساتىعا كوتەرىلۋىن ىلگەرىلەتۋدى قالايدى.

شي جينپيڭ بىلاي دەپ باسا دارىپتەدى: قازىر دۇنيە ءجۇزى تىنىش ەمەس، ءالى دە كوپتەگەن وڭىردە سوعىس ءورتى لاۋلاپ، الاساپىراندىق تۋىلىپ وتىر. ادامزات − بولىنبەس حاۋىپسىزدىك ورتاق تۇلعاسى، ورتاق، جالپىلىق، سەلبەستىك، باياندىلىق سىندى حاۋىپسىزدىك كوزقاراسىن امالياتتا ايگىلەگەندە عانا، جاپپاي حاۋىپسىزدىك جولىمەن جۇرۋگە بولادى. جۇڭگو مەن برازيليا بىرلەسىپ ۋكراينا داعدارىسىن ساياسي جولمەن شەشۋ جونىندەگى ”6 ءتۇرلى ورتاق تانىمدى“ جاريالادى، دۇنيە جۇزىندەگى وڭتۇستىك ەلدەرىمەن بىرگە ۋكراينا داعدارىسىنىڭ ”بەيبىتشىلىك دوستارى“ گرۋپپاسىن قۇرادى. ءبىز بەيبىتشىلىككە كۇش سالاتىن اناعۇرلىم كوپ ۇندەردى توپتاپ، ۋكراينا داعدارىسىن ساياسي جولمەن شەشۋگە داڭعىل جول اشۋىمىز كەرەك. ءبىز گازاداعى قاقتىعىستىڭ ۇزدىكسىز كەڭەيۋىنەن قاتتى الاڭدايمىز، سوعىستى جەدەل توقتاتىپ، ”ەكى ەل جوباسىن“ تياناقتاندىرىپ، پالەستينا ماسەلەسىن جاپپاي، ءادىل، باياندى شەشۋ جولىندا قاجىماي - تالماي قۇلشىنۋعا ۇندەيمىز. جۇڭگو مەن برازيليادا ادىلەتتى جاقتايتىن، ادامگەرشىلىكتى سومدايتىن ءداستۇر مەن جاۋاپكەرشىلىك بار، جۇڭگو برازيليامەن بىرگە جۇڭگو - برازيليا تاعدىرلاس ورتاق تۇلعاسىنىڭ داۋىرلىك ءمانىن ۇزدىكسىز بايىتىپ، ناعىز كوپ جاقتىلىقتى باتىل قورعاپ، دامۋ، كەدەيلەسپەۋ، سەلبەسۋ، قارسىلاسپاۋ، ءادىل بولۋ، زورەكەرلىك ىستەمەۋ سىندى جاڭا ءداۋىردىڭ كۇشتى ءۇنىن بىرگە تاراتىپ، اناعۇرلىم كوركەم دۇنيە ءجۇزىن قول ۇستاسا قۇرۋدى قالايدى.

لۋلا ءتوراعا شي جينپيڭنىڭ ساپارلاي كەلگەندىگىن قىزۋ قارسى الىپ، مىنالاردى ءبىلدىردى: برازيليا مەن جۇڭگونىڭ ارالىعى الىس بولعانىمەن، قۇن ۇستانىمى قارايلاس، ورتاق مۇددەسى كەڭ، دوستىعى تەرەڭ، برازيليا مەن جۇڭگونىڭ سەلبەستىگى ستراتەگيالىق مانگە جانە دۇنيە جۇزىلىك ىقپالعا يە. جۇڭگو − برازيليانىڭ ەڭ ماڭىزدى ساۋدا جانە قارجى قوسۋ سەرىگى، جۇڭگو كاسىپورىندارى برازيليادا برازيليانىڭ ەكونوميكالىق، قوعامدىق دامۋىن پارمەندى جەبەدى. ءتوراعا شي جينپيڭ ەكەۋىمىز ەكى ەل قارىم – قاتىناسىن اناعۇرلىم ادىلەتتى دۇنيە ءجۇزى مەن اناعۇرلىم باياندى پلانەتاداعى جۇڭگو - برازيليا تاعدىرلاس ورتاق تۇلعاسىن قول ۇستاسا قۇرۋ دەڭگەيىنە كوتەرۋدى ۇيعاردىق، سونداي - اق برازيليانىڭ دامۋ ستراتەگياسىن جۇڭگونىڭ ”ءبىر بەلدەۋ، ءبىر جول“ باستاماسىمەن ۇشتاستىرىپ، باياندى دامۋ، نەگىزدىك قۇرىلعى، فينانس، ەنەرگيادا تيپكە بۇرىلىس جاساۋ، عارىش سياقتى سالالاردا ءتۇيىندى تۇردە سەلبەستىكتى كەڭەيتىپ، تەرەڭدەتىپ، ەكى ەل قارىم - قاتىناسىن تىڭ دەڭگەيگە كوتەرۋدى ۇيعاردىق. برازيليا مەن جۇڭگونىڭ حالىقارالىق دامۋ جانە حاۋىپسىزدىك سياقتى كەلەلى ماسەلەلەردەگى تۇرعىسى وسكەلەڭ بىردەي. جۇڭگو جاقتىڭ برازيليانىڭ 20 ەل توبىنا ءتوراعا ەل بولۋ قىزمەتىن زور كۇشپەن قولداعاندىعىنا ءارى ”اشارشىلىق پەن كەدەيلىككە قارسى اتتانۋ دۇنيە جۇزىلىك وداعىنا“ الدىمەن قاتىناسقاندىعىنا العىس ايتامىن. ءبىز بىرلەسكەن مەملەكەتتەر ۇيىمى، 20 ەل توبى، بريكس ەلدەرى سياقتى كوپ جاقتى مەحانيزمدەگى قارىم - قاتىناستى، سەلبەستىكتى اناعۇرلىم جيىلەتىپ، دۇنيە جۇزىلىك باسقارۋ جۇيەسى رەفورماسىن بىرگە دارىپتەپ، اناعۇرلىم ءادىل، دەموكراتيالى، تەرەزەسى تەڭ جانە باياندى حالىقارالىق جۇيە ورناتىپ، قولامتالى ماسەلەلەردى بەيبىت جولمەن شەشۋدى ىلگەرىلەتەمىز. ءتوراعا شي جينپيڭنىڭ وسى رەتكى ساپارى برازيليا - جۇڭگو قارىم - قاتىناسىنىڭ جاڭا تاريحي پاراعىن اشتى.

ساي چي، ۋاڭ ي قاتارلىلار قاتىناستى.

كەلۋ قاينارى: حالىق تورابى