جاڭا جىلدىق تەاتر ساۋىق كەشى بەيجيڭدە وتكىزىلدى

شينحۋا اگەنتتىگى، 12 - ايدىڭ 30 - كۇنى، بەيجيڭ، 2025 - جىلعى جاڭا جىلدىق تەاتر ساۋىق كەشى 12 - ايدىڭ 30 - كۇنى كەشتە مەملەكەتتىك ۇلكەن تەاترحانادا وتكىزىلدى. پارتيا مەن مەملەكەت باسشىلارىنان شي جينپيڭ، لي چياڭ، جاۋ لىجي، ۋاڭ حۋنيڭ، ساي چي، ديڭ شۋەشياڭ، لي شي، حان جىڭ قاتارلىلار استاناداعى ءار سالا بۇقاراسىمەن ءبىر ارادا باس قوسىپ، كونسەرتتى بىرگە تاماشالاپ، جاڭا جىلدى شاتتانا قارسى الدى.

ءتۇن شىمىلدىعىن جامىلعان مەملەكەتتىك ۇلكەن تەاترحانانىڭ اشەكەيلى شامدارى سامالاداي جارقىراپ، تەاترحانا دۋمانعا بولەندى. ساعات 19 دان 45 مينۋت وتكەندە شي جينپيڭ قاتارلى پارتيا مەن مەملەكەت باسشىلارى ساۋىق كەش زالىنا كەلىپ، كونسەرتتى تاماشالاۋعا كەلگەن تەاتر سالاسىنداعى كوركەمونەرشىلەردىڭ ۋاكىلدەرىمەن ىقىلاسپەن قول الىسىپ، ءوزارا سالەمدەستى، بۇكىل زالدان دۋ قول شاپالاق ءۇنى كوتەرىلدى.

ىشەكتى مۋزىكا اۋەنى جاڭا جىلدى قارسى الدى، بايىرعى اۋەن اسقاقتاتا شىرقالدى. «بارلىق گۇل شەشەك اتىپ، جاڭا جىلدى قارسى الۋ» اتتى اسپاپتىق مۋزىكامەن ساۋىق كەشىنىڭ شىمىلدىعى اشىلدى. « بەيجيڭ تەاترى اعىمىنىڭ كورمەسى» اتتى ۇلاسپالى ءان ارقىلى بەيجيڭ تەاترى كوركەمونەرىنىڭ قاۋلاپ جەتىلۋى ايگىلەندى. بەيجيڭ تەاترى «چينشياڭليان»، كۇنچۇي تەاترى «شيشياڭجي»، پيڭجۇي تەاترى «ليۋچياۋىر»، حۋاڭمەي تەاترى «تيانشيانپەي» سياقتىلاردىڭ ۇزىندىلەرىندە وزىندىك ەرەكشەلىك بار بولىپ، كورەرمەندەرگە كلاسسيكالىق اڭگىمە ارقىلى تاڭداۋلى ءداستۇرلى كوركەمونەردىڭ ءنارىن، تارتىمدىلىعىن سەزىندىردى. بيجيڭ تەاترى «شاجياباڭ · جىدۋ» جانە «ياڭمىندەگى ايەل سارداردان» ءۇزىندى قاھارمانداردىڭ وتباسى مەن وتانعا دەگەن سۇيىسپەنشىلىگىن جاندى بەينەلەدى. بيجيڭ تەاترى «مينفاڭلەي · ەندىگارى ايرىلما»، «اسەم تاۋ گۇلى − ۇلتتىق رايونداردىڭ تەاترلارىنان تاڭدامالىلار» بايىرعى تەاتر تۇرلەرىمەن وسىزامانعى تاقىرىپتاردى ايگىلەپ، جاندى داۋىرلىك تىنىستى جانە الۋان ءتۇستى ۇلتتىق سالت - سانانى بەينەلەدى. بەيجيڭ تەاترى مەن كۇنچۇي تەاترىن ورىنداۋشى بالالار ءبىر - بىرلەپ ونەر كورسەتىپ، تەاتر كوركەمونەرىن ۇرپاقتان - ۇرپاققا جالعاستىرۋداي قۋانىشتى بەينەنى ايگىلەدى. ايبىندى تەاتر ءانى «چۇنچيۋ جاڭعىرىعى» ساۋىق كەشىن شىرقاۋ شىڭىنا جەتكىزىپ، قالىڭ ادەبيەت - كوركەمونەر قىزمەتكەرلەرىنىڭ شي جينپيڭ مادەنيەت يدەياسىن جەتەكشى ەتۋگە تاباندى بولىپ، جاڭا داۋىردەگى ادەبيەت - كوركەمونەر ىستەرىنىڭ گۇلدەنۋىن، دامۋىن قۇلشىنا ىلگەرىلەتىپ، سوتسياليستىك مادەنيەتتە قۋاتتى ەل قۇرۋعا ات سالىسۋ بورىشىن، تالپىنىسىن جىرلادى. كوركەمونەرشىلەردىڭ تارتىمدى ويىنىنا بۇكىل زالداعىلار ءالسىن - ءالى القاۋ ايتىپ، قىزۋ قول شاپالاق سوقتى.

تۇتاس ساۋىق كەشىندە تۇرلىشە تەاتر وزىندىك بوگەنايىمەن ورتاعا شىعىپ، كلاسسيكالىق تەاتر مەن جاڭا جاسامپازدىق سارا تۋىندىلارى وزىندىك ەرەكشەلىكتەرىن كورسەتىپ، جۇڭحۋا تەاترىنىڭ جالىندى گۇلدەنىپ - كوركەيگەن جاعدايىن ايگىلەپ، ءبىر نيەت، ءبىر تىلەكپەن ارمانعا قۇلاش سەرمەۋدىڭ ەكپىندى جەڭىس ءانىن شىرقادى.

پارتيا مەن مەملەكەتتىڭ قاتىستى باسشى جولداستارى، قاتىستى تاراۋلارداعى جاۋاپتى جولداستار كونسەرتتى تاماشالادى.

كەلۋ قاينارى: حالىق تورابى