مەملەكەت ءتوراعاسى شي جينپيڭ 2025 - جىلعى جاڭا جىلدى قۇتتىقتاۋ ءسوزىن سويلەدى

شينحۋا اگەنتتىگى، 12 - ايدىڭ 31 - كۇنى، بەيجيڭ. جاڭا جىل قارساڭىندا مەملەكەت ءتوراعاسى شي جينپيڭ ورتالىق راديو - تەلەۆيزيا باس ستانسياسى جانە ينتەرنەت ارقىلى 2025 - جىلعى جاڭا جىلدى قۇتتىقتاۋ ءسوزىن سويلەدى. تولىعى تومەندەگىدەي:

كوپشىلىك، سالەمەتسىزدەر مە! ۋاقىت زىمىراپ ءوتىپ، جاڭا جىل جەتىپ كەلۋ الدىندا تۇر، مەن بەيجيڭنەن كوپشىلىككە ىزگى تىلەك جولدايمىن!

2024 - جىلى ءبىز كوكتەمدى، جازدى، كۇزدى جانە قىستى بىرگە وتكەرىپ، بوران - شاشىندى جانە ارايلى كۇندەردى بىرگە باسىپ وتتىك، ءاربىر ءسات وسى ءبىر وزگەشە جىلدا ايشىقتالىپ جازىلىپ، ادام جانىن تەبىرەنتىپ ەستەن كەتپەستەي بولدى.

ءبىز ەل ءىشى - سىرتىنداعى ورتا وزگەرىسى اكەلگەن ىقپالعا بەلسەنە توتەپ بەرىپ، ءبىرقىدىرۋ ساياساتتىق ”كەشەندى شارا“ شىعارىپ، جوعارى ساپالى دامۋدى تىڭعىلىقتى ىلگەرىلەتتىك، ەلىمىز ەكونوميكاسى جاندانىپ، جاقسارىپ، ىشكى ءوندىرىس جالپى ءونىم قۇنى 130 تريلليون يۋاننان اساتىنى مەجەلەندى. استىق ءونىم مولشەرى ءبىر تريلليون 400 ميلليارد جىڭنان اسىپ، جۇڭگونىڭ كەسەسىنە اناعۇرلىم كوپ جۇڭگو استىعى سالىندى. وڭىرلەردىڭ دامۋى سايكەسىپ بىرگە ارەكەتتەنىپ، تاماشا اۋقىم قالىپتاستىردى، جاڭاشا قالا - قالاشىقتاندىرۋ مەن اۋىل - قىستاقتى گۇلدەندىرۋ ءوزارا توعىستى، سايكەستى قاداممەن ىلگەرىلەدى. جاسىل، تومەن كومىر قىشقىل گازدى دامۋ تەرەڭدەي ىلگەرىلەتىلىپ، كورىكتى جۇڭگو كارتيناسى بىرتىندەپ كەستەلەندى.

ءبىز جەرگىلىكتى جاعدايعا قاراي جاڭاشا وندىرگىش كۇشتەردى جەتىلدىردىك، جاڭا كاسىپ سالاسى، جاڭا كاسىپ كۇيى، جاڭا ۇلگى جارىسا جارىققا شىقتى، جاڭا ەنەرگيالى اۆتوكولىكتىڭ جىلدىق ءونىم مولشەرى تۇڭعىش رەت 10 ميلليوننان استى، ينتەگرالدى تىزبەك، جاساندى زەردە، كۆانتتىق حابارلاسۋ سياقتى سالالاردا جاڭا جەتىستىكتەرگە قول جەتتى. چاڭى - 6 تۇڭعىش رەت اي شارىنىڭ ارعى بەتىنەن ۇلگى الىپ كەلدى، مىڭشياڭ اتتى مۇحيت بۇرعىلاپ بارلاۋ كەمەسى مۇحيتتىڭ سىرىنا بويلادى، شىنجىن − جۇڭشان جولى تولقىندى تەڭىزدە كوسىلدى، وڭتۇستىك ۇيەكتەگى چينليڭ پۋنكتى مۇزدى القاپتا ەڭسە كوتەردى، بۇلار جۇڭگولىقتاردىڭ شەكسىز ۇلان - قايىر دۇنيەدە ارمان قۋعان اسقاق جىگەرىن ايگىلەدى.

بيىل مەن جەرگىلىكتى ورىنداردا قىزمەت تەكسەرىپ، كوپشىلىكتىڭ تۇرمىسىنىڭ ءماندى دە ءساندى ەكەنىن كوردىم. تيانشۇيدىڭ حۋا - نيۋ الماسى ۇلكەن دە قىزىل ەكەن، دۇڭشاننىڭ اۋجياۋ قىستاعىندا بالىق مول اۋلانىپتى. مايجيشان تاس ۇڭگىرىندەگى ”شىعىستىڭ كۇلىمسىرەۋى“ مىڭ جىلدان كوكتەي ءوتىپتى، ليۋچى كوشەسىندەگى سىپايىلىقپەن جول بەرۋ سىندى وتباسى ستيلى ۇرپاقتان - ۇرپاققا جالعاسىپتى. تيانجيندەگى بايىرعى مادەنيەت كوشەسىندە ادام اياعى ۇزىلمەيدى ەكەن، يىنچۋانداعى كوپ ۇلتتى الەۋمەتتىك اۋماقتىڭ تۇرعىندارى ءبىر ءۇيلى جانداي ەتەنە ەكەن. كوپشىلىك كوڭىل ءبولىپ وتىرعان جۇمىستانۋ، كىرىستى ارتتىرۋ، قارتتار مەن بالالار، وقۋ - اعارتۋ جانە ەمدەۋ سياقتى ماسەلەلەردى قاشان دا ەسىمنەن شىعارماي كەلەمىن. ءبىر جىلدان بەرى نەگىزدىك زەينەتاقى جوعارىلادى، تۇرعىن ءۇي قارىزىنىڭ ءوسىم مولشەرى تومەندەتىلدى، تىكەلەي ەسەپ جابۋ كولەمىنىڭ كەڭەيۋى وزگە جەردە ەمدەلۋگە قولايلىلىق اكەلدى، تۇتىنۋ بۇيىمدارىنىڭ كونەسىنىڭ ورنىنا جاڭاسىن اۋىستىرۋ تۇرمىس ساپاسىن جوعارىلاتتى... كوپشىلىكتىڭ تابىس سەزىمى تاعى دا ەداۋىر نىعايدى.

پاريج وليمپيادا سپورت جارىسىندا ەلىمىزدىڭ دەنە تاربيە ساڭلاقتارى ەرلىكپەن العا ۇمتىلىپ، شەكارا سىرتىنداعى جارىسقا قاتىناسۋداعى ەڭ تاماشا ناتيجەگە قول جەتكىزىپ، جاس ۇرپاقتىڭ اسقاق ارىنمەن العا ىلگەرىلەگەن، وزىنە سەنىمدى ءارى شۋاقتى بەينەسىن ايگىلەدى. تەڭىز ارمياسى، اۋە ارمياسى 75 جاسقا تولعان تۋعان كۇنىن تويلاپ، حالىق پەرزەنت اسكەرلەرى جاڭا كەلبەتتەرىن ايگىلەدى. تاسقىن، تايفىڭ داۋىلى سياقتى جاراتىلىستىق اپاتتار الدىندا قالىڭ پارتيا مۇشەلەرى، كادرلار اتويلاپ الدا ءجۇرىپ، كوپشىلىك ەل بىرلىگىنەن بەرىك قامال تۇرعىزدى، ءبىر - بىرىنە قارايلاستى. سانسىز ەڭبەكشىلەر، قۇرىلىسشىلار، شارۋاشىلىق قۇرۋشىلار ارمان ءۇشىن ايانباي شايقاستى. مەن مەملەكەت وردەنى جانە مەملەكەت داڭق اتاعى يەگەرلەرىنە سيلىق تاراتتىم، داڭق سولارعا تاۋەلدى، سونداي - اق كوكىرەك كەرە جاۋاپكەرشىلىك ارقالاعان ءاربىر كۇرەسكەرگە تاۋەلدى.

بۇگىنگى تاڭداعى دۇنيە جۇزىندە وزگەرىس پەن بىلىقپالىق قاباتتاسىپ كەتتى، جۇڭگو جاۋاپكەرشىلىك ارقالايتىن ءىرى ەل رەتىندە، دۇنيە جۇزىلىك باسقارۋ رەفورماسىن بەلسەنە ىلگەرىلەتىپ، جەر شارىنىڭ وڭتۇستىگىمەن ىنتىماقتى، سەلبەستىكتى تەرەڭدەتتى. ءبىز ”ءبىر بەلدەۋ، ءبىر جولدى“ جوعارى ساپالى بىرگە قۇرۋدىڭ تەرەڭدەۋىن، ناقتىلانۋىن ىلگەرىلەتىپ، جۇڭگو - افريكا سەلبەستىك تالقى مىنبەرى بەيجيڭ باسشىلار ءماجىلىسىن ءساتتى وتكىزىپ، شاڭحاي سەلبەستىك ۇيىمى، بريكس، ازيا - تىنىق مۇحيت ەكونوميكالىق سەلبەستىك ۇيىمى، 20 ەل توبى سياقتى ەكى جاقتى، كوپ جاقتى ورىنداردا جۇڭگو قۋاتتاماسىن ايقىن العا قويىپ، دۇنيە ءجۇزىنىڭ بەيبىتشىلىگىن، ورنىقتىلىعىن قورعاۋعا اناعۇرلىم كوپ وڭ ەنەرگيا قوستىق.

ءبىز جاڭا جۇڭگو قۇرىلعاندىعىنىڭ 75 جىلدىعىن سالتاناتپەن قۇتتىقتاپ، رەسپۋبليكانىڭ وراسان زور وزگەرىسىن تەرەڭ سۇيىسپەنشىلىكپەن ەسكە الدىق. 5000 جىلدان استام تاريحقا يە جۇڭحۋا وركەنيەتىن جالعاستىرۋ بارىسىندا ۇزدىكسىز ىلگەرىلەدىك، ”جـۇڭگو“ دەگـەن ەكى ءارىپ ”حىزۇن“ توعاسىنىڭ تۇبىنە ويىپ جازىلعان، ونان دا ماڭىزدىسى، ءاربىر حۋاشيا پەرزەنتتەرىنىڭ جۇرەگىنەن وشپەستەي ورىن العان. پارتيا 20 - كەزەكتى ورتالىق كوميتەتىنىڭ ءۇشىنشى جالپى ءماجىلىسى جەڭىسپەن اشىلىپ، رەفورمانى ونان ارى جاپپاي تەرەڭدەتۋدىڭ دابىلى قاعىلدى. ءبىز رەفورما جاساپ، ەسىك اشۋدىڭ داۋىرلىك ۇلكەن اۋقىمىندا ارشىندى قاداممەن العا ىلگەرىلەدىك، جۇڭگو ۇلگىسىندەگى وسىزامانداندىرۋ رەفورما جاساپ، ەسىك اشۋ بارىسىندا، ءسوز جوق، اناعۇرلىم كەڭ ءورىس اشاتىن بولادى.

2025 - جىلى ءبىز ”14 - بەسجىلدىق“ جوبانى جاپپاي ورىندايمىز. اناعۇرلىم بەلسەندى، ءونىمدى ساياسات اتقارىپ، جوعارى ساپالى دامۋدى بار زەيىندى سالىپ ويداعىداي يگەرىپ، جوعارى دەڭگەيلى عىلىم - تەحنولوگيادا ءوز كۇشىمىزگە سۇيەنۋدى، ءوزىمىزدى الۋەتتەندىرۋدى ىلگەرىلەتىپ، ەكونوميكالىق، قوعامدىق دامۋدىڭ تاماشا تەبىنىن ساقتايمىز. قازىرگى كەزدە ەكونوميكالىق اينالىم كەيبىر جاڭا احۋالدارعا ءدوپ كەلدى، سىرتقى ورتانىڭ ايقىنسىزدىعى سىندى سىن - سايىس بار، جاڭا، كونە قوزعالىس قۋاتتارىن اۋىستىرۋدىڭ قىسىمى بار، الايدا وسىلاردى قۇلشىنىس ارقىلى جەڭۋىمىزگە بولادى. ءبىز ەجەلدەن بوران - شاشىندا سىننان ءوتىپ تولىسىپ، سىناقتان ءوتۋ بارىسىندا زورايىپ كەلەمىز، كوپشىلىك تولىق سەنىمگە يە بولۋى كەرەك.

وتباسى ءىسى، مەملەكەت ءىسى، الەم ىستەرىندە حالىقتى باقىتتى تۇرمىسقا كەنەلتۋ − ماڭداي الدى ءىرى ءىس. بارشا وتباسىلار بالالاردىڭ تاماشا وقۋ - اعارتۋدان يگىلىكتەنۋىن، قارتتاردىڭ تاماشا زەينەتكەرلىك قىزمەت وتەۋدەن يگىلىكتەنۋىن، جاستاردىڭ اناعۇرلىم كوپ دامۋ ورايىنا يە بولۋىن ءۇمىت ەتەدى. وسى قاراپايىم تىلەكتەر تاماشا تۇرمىسقا تالپىنىس بولىپ تابىلادى. ءبىز بىرگە قۇلشىنىپ، قوعامدىق قۇرىلىس جانە باسقارۋ دەڭگەيىن ۇزدىكسىز جوعارىلاتىپ، ۇزدىكسىز جاراسىمدى دا سيىسىمدى راي قالىپتاستىرىپ، بۇقارانىڭ ماڭايىنداعى ۇلكەندى - كىشىلى ىستەردى ويداعىداي شەشىپ، كوپشىلىكتى ءتىپتى دە كوپ قۋانىشقا، مەرەيگە بولەۋىمىز كەرەك.

اۋمىننىڭ وتان قۇشاعىنا ورالعاندىعىنىڭ 25 جىلدىعى قارساڭىندا، مەن تاعى دا حاۋجياڭ وزەنىنىڭ جاعاسىنا باردىم، جاڭا دامۋ، جاڭا وزگەرىس قاتتى ءسۇيىندىردى. ءبىز ”ءبىر ەل، ەكى ءتۇزىم“ باعىتىن بۇلجىماي دايەكتىلەندىرىپ، شياڭگاڭنىڭ، اۋمىننىڭ ۇزاق ۋاقىت گۇلدەنۋىن، ورنىقتىلىعىن ساقتايمىز. ەكى جاعالاۋداعى باۋىرلاستار − ءبىر شاڭىراقتىڭ ادامدارى، قان تامىرىمىزداعى باۋىرمالدىقتى ەشكىم دە ءۇزىپ تاستاي المايدى، وتاننىڭ بىرلىككە كەلۋ تاريحي ۇلكەن اۋقىمىن ەشكىم دە توسا المايدى!

دۇنيە ءجۇزىنىڭ 100 جىلدىق وزگەرىسى جەدەل قۇبىلۋدا، دارقان پەيىل ارقىلى ارازدىقتى، قاقتىعىستى باسىپ، ادامزاتتىڭ تاعدىرىنا كەڭ پەيىلمەن قامقور بولۋىمىز كەرەك. جۇڭگو ءار ەلمەن بىرگە دوستىقتىڭ، سەلبەستىكتىڭ امالياتتا ايگىلەۋشىسى، وركەنيەتتەردىڭ ءوزارا ۇلگى الۋىنىڭ ىلگەرىلەتۋشىسى، ادامزاتتىڭ تاعدىرلاس ورتاق تۇلعاسىن قۇرۋدىڭ قاتىناسۋشىسى بولىپ، دۇنيە ءجۇزىنىڭ تاماشا بولاشاعىن بىرگە اشۋدى قالايدى.

ارمان الىس بولسا دا، تالپىنساق جەتە الامىز؛ ارمان ساپارى جاپالى بولسا دا، تاباندى بولساق ورىندالادى. جۇڭگو ۇلگىسىندەگى وسىزامانداندىرۋدىڭ جاڭا جورىعىندا ءاربىر ادام باس كەيىپكەر، ءاربىر بوداۋ توتەنشە قاستەرلى، ءاربىر ساۋلە جارقىراپ شۇعىلا شاشادى.

وتانىمىزدىڭ تاۋ - وزەنى گۇلدەي قۇلپىرىپ، بارلىق شاڭىراققا باقىت نۇرى توگىلدى. جاڭا جىلدى كوكىرەك تولى ۇمىتپەن قارسى الايىق. وتانىمىزدىڭ قاشان دا تىنىش تا امان بولۋىن، گۇلدەنىپ - كوركەيە بەرۋىن تىلەيمىن! بارلىق تىلەكتەرىڭىزدىڭ ورىندالۋىن، مول قۋانىش پەن ماڭگى تىنىشتىق بولۋىن تىلەيمىن!

كەلۋ قاينارى: حالىق تورابى