شي جينپيڭ بوتسۆانانىڭ زۇڭتۇڭى بوكومەن جۇڭگو مەن بوتسۆانانىڭ ديپلوماتيالىق قارىم - قاتىناس ورناتقاندىعىنىڭ 50 جىلدىعى بايلانىسىمەن ءوزارا قۇتتىقتاۋ تەلەگرامماسىن جولدادى

شينحۋا اگەنتتىگى، 1 - ايدىڭ 6 - كۇنى، بەيجيڭ. 1 - ايدىڭ 6 - كۇنى مەملەكەت ءتوراعاسى شي جينپيڭ بوتسۆانانىڭ زۇڭتۇڭى بوكومەن ءوزارا قۇتتىقتاۋ تەلەگرامماسىن جولداپ، ەكى ەلدىڭ ديپلوماتيالىق قارىم - قاتىناس ورناتقاندىعىنىڭ 50 جىلدىعىن قۇتتىقتادى.

شي جينپيڭ بىلاي دەپ اتاپ كورسەتتى: ديپلوماتيالىق قارىم - قاتىناس ورناتقان 50 جىلدان بەرى، حالىقارالىق جاعداي قالاي وزگەرسە دە، جۇڭگو - بوتسۆانا قارىم - قاتىناسى باستان - اياق تاماشا دامۋ ارىنىن ساقتاپ، تەڭ تۇرعىدا مامىلە جاسايتىن جاقسى دوسقا، قول ۇستاسا داميتىن جاقسى سەرىككە اينالدى. مەن ەكى ەل شىنايى دوستىققا، ىنتىماقتاسا سەلبەسۋگە تاباندى بولسا بولعانى، جۇڭگو - بوتسۆانا قارىم - قاتىناسىنىڭ دامۋ جولى، ءسوز جوق، بارعان سايىن كەڭەيەتىندىگىنە، ەكى جاق سەلبەستىگىنىڭ بولاشاعى، ءسوز جوق، اناعۇرلىم نۇرلى بولاتىندىعىنا كامىل سەنەمىن. بيىل − جۇڭگو - افريكا سەلبەستىك تالقى مىنبەرى بەيجيڭ باسشىلار ءماجىلىسىنىڭ تابىستارىن تياناقتاندىرۋدىڭ باستاما جىلى. جاڭا باستامادا مەن زۇڭتۇڭ مىرزامەن بىرگە قۇلشىنىپ، ەكى جاقتىڭ ساياسي ءوزارا سەنىمدىلىگىن ونان ارى ارتتىرىپ، ءبىر - ءبىرىمىزدىڭ ءجىتى قاداعالاپ وتىرعان كەلەلى ىستەرىمىزدى باتىل قولداپ، ءوز - ءوزىمىزدىڭ وسىزاماندانۋ ىستەرىمىزدى قول ۇستاسا ىلگەرىلەتىپ، جۇڭگو - بوتسۆانا ستراتەگيالىق سەرىكتەستىك قارىم - قاتىناسىنىڭ شىت جاڭا تاراۋىن اشۋدى قالايمىن.

بوكو مىنالاردى ءبىلدىردى: ديپلوماتيالىق قارىم - قاتىناس ورناتقاندىعىمىزدىڭ 50 جىلدىعى − بوتسۆانا - جۇڭگو قارىم - قاتىناسىنىڭ ماڭىزدى بەلەسى. مەن جۇڭگونىڭ وتكەن 50 جىلدان بەرى بوتسۆانامەن تەرەڭ دوستىق ورناتىپ، ىنتىماقتاسا سەلبەستىك جاساسقاندىعىنا ايرىقشا ىستىق ىقىلاسپەن العىس ايتامىن. بوتسۆانا جاق جۇڭگونىڭ وزگەشە دامۋ جەتىستىكتەرىنەن اسا زور شابىت الدى، ەكى ەلدىڭ ستراتەگيالىق سەرىكتەستىك قارىم - قاتىناسىنىڭ بوتسۆانانىڭ قامتىمدى دامۋىنا وراي اكەلەتىندىگىنە سەنەمىن. ءبىز ءبىر جۇڭگو ساياساتىن باتىل قولدايمىز، ءوزارا سەنىم ارتۋ جانە قۇرمەت ەتۋ نەگىزىندە بوتسۆانا - جۇڭگو قارىم - قاتىناسىن ونان ارى كۇشەيتىپ، جۇڭگو - افريكا سەلبەستىك تالقى مىنبەرى بەيجيڭ باسشىلار ءماجىلىسىنىڭ جەتىستىكتەرىن قول ۇستاسا تياناقتاندىرىپ، بىرگە دامۋ مەن گۇلدەنۋدى جۇزەگە اسىرۋدى ءۇمىت ەتەمىز.

كەلۋ قاينارى: حالىق تورابى