جاۋ لىجي پەرۋ پارلامەنتىنىڭ ءتوراعاسى سالۋانامەن كەڭەس وتكىزدى

شينحۋا اگەنتتىگى، 1 - ايدىڭ 6 - كۇنى، بەيجيڭ. مەملەكەتتىك حالىق قۇرىلتايى تۇراقتى كوميتەتىنىڭ باستىعى جاۋ لىجي 1 - ايدىڭ 6 - كۇنى تۇستەن كەيىن حالىق سارايىندا پەرۋ پارلامەنتىنىڭ ءتوراعاسى سالۋانامەن كەڭەس وتكىزدى.

جاۋ لىجي مىنالاردى ءبىلدىردى: جۇڭگو مەن پەرۋدىڭ دوستىعى ارىدان باستاۋ الادى. تاياۋدا ءتوراعا شي جينپيڭ پەرۋگە بارىپ ازيا - تىنىق مۇحيت ەكونوميكالىق سەلبەستىك ۇيىمى باسشىلارىنىڭ 31 - رەتكى بەيرەسمي ماجىلىسىنە قاتىناستى ءارى پەرۋدە مەملەكەتتىك ساپاردا بولدى. ەكى ەلدىڭ مەملەكەت باسشىلارى جۇڭگو -پەرۋ قارىم - قاتىناسىنىڭ ستراتەگيالىق، جالپى جاعدايلىق ماسەلەلەرى جونىندە ىشكەرىلەي پىكىرلەسىپ، ماڭىزدى ورتاق تانىمعا كەلدى. جۇڭگو جاق پەرۋ جاقپەن بىرگە قۇلشىنىپ، مەملەكەت باسشىلارى ديپلوماتياسىنىڭ ماڭىزدى جەتىستىكتەرىن تياناقتاندىرىپ، جۇڭگو مەن پەرۋدىڭ جالپى بەتتىك ستراتەگيالىق سەرىكتەستىك قارىم - قاتىناسىنىڭ ۇزدىكسىز العا دامۋىن ىلگەرىلەتىپ، ەكى ەل مەن ەكى ەل حالقىنا ءتىپتى دە زور باقىت جاراتۋدى قالايدى.

جاۋ لىجي بىلاي دەپ اتاپ كورسەتتى: جۇڭگو مەن پەرۋدىڭ دوستىق سەلبەستىگىن تەرەڭدەتۋ − ەكى ەل حالقىنىڭ ورتاق ءۇمىتى، زاڭ شىعارۋ قۇرىلىمى ەكى ەل قارىم - قاتىناسىنىڭ ورنىقتى قاداممەن الىسقا جەتۋىن جەبەۋگە ۇلەس قوسۋى كەرەك. پەرۋ ۇزاق ۋاقىتتان بەرى ءبىر جۇڭگو پرينسيبىنە تاباندى بولىپ كەلەدى، جۇڭگو جاق مۇنى القايدى. جۇڭگو مەملەكەتتىك حالىق قۇرىلتايى پەرۋ پارلامەنتىمەن جوعارى جىكتەگىلەر، ارناۋلى كوميتەتتەر، ەكى جاقتى دوستىق گرۋپپالارى، حالىق قۇرىلتايى ۋاكىلدەرى جانە پارلامەنت مۇشەلەرى اراسىنداعى اۋىس - كۇيىستى، بارىس - كەلىستى كۇشەيتىپ، ەل باسقارۋ تاجىريبەلەرىن ءوزارا ۇيرەنۋدى، ءوزارا ۇلگى الۋدى تەرەڭدەتىپ، ءوزارا ءتۇسىنىسۋ مەن دوستىقتى كۇشەيتىپ، ءوزارا ءوز مەملەكەت جاعدايىنا ۇيلەسەتىن دامۋ جولىمەن ءجۇرۋدى قولدايدى. چيانكاي پورتى − جۇڭگو مەن پەرۋدىڭ سەلبەستىگىندەگى بوگەنايلىق نىسان، پەرۋدىڭ قۇرلىق پەن تەڭىزدى ۇلاستىراتىن، ازيا مەن لاتىن امەريكاسىن تۇتاستىراتىن ۇلاستىرۋ - تۇتاستىرۋ ارناسىن قالىپتاستىرۋىنا، جۇڭگو مەن پەرۋدىڭ، جۇڭگو مەن لاتىن امەريكاسىنىڭ ”ءبىر بەلدەۋ، ءبىر جولدى“ جوعارى ساپامەن بىرگە قۇرۋىن جەبەۋگە ءتيىمدى. پەرۋ پارلامەنتىنىڭ چيانكاي پورتى قۇرىلىسىنا ۇزدىكسىز كوڭىل ءبولۋىن جانە قولداۋ كورسەتۋىن ءۇمىت ەتەمىن. جۇڭگو مەن پەرۋ ەنەرگيا، نەگىزدىك قۇرىلعى قۇرىلىسى، حابارلاسۋ سياقتى سالالاردا اسا ءونىمدى سەلبەستىك ورىستەتىپ، سيفرلى ەكونوميكا، جاسىل دامۋ، جاساندى زەردە سياقتى سالالاردا سەلبەستىكتى كەڭەيتۋ جونىندە بەلسەنە تالقى جۇرگىزۋدە. ەكى ەلدىڭ زاڭ شىعارۋ قۇرىلىمدارىنىڭ جۇڭگو مەن پەرۋدىڭ ناقتى سەلبەستىگىنە تاماشا زاڭمەن جونگە سالۋ ورتاسىن بىرگە قالىپتاستىرۋىن ءۇمىت ەتەمىن.

جاۋ لىجي جۇڭگونىڭ رەفورما جاساپ، ەسىك اشۋ جانە ەكونوميكالىق ەرەكشە رايوندارعا بايلانىستى زاڭ شىعارۋ جاعدايىن تانىستىرىپ، مىنانى ءبىلدىردى: جۇڭگو جاق پەرۋ جاقپەن قاتىستى سالالارداعى زاڭ شىعارۋ تاجىريبەلەرىن اۋىستىرۋدى كۇشەيتىپ، ءوز ەلدەرىنىڭ سىرتقا ەسىك اشۋىنا، دامۋىنا، گۇلدەنۋىنە دەم بەرۋدى قالايدى.

سالۋانا مىنالاردى ءبىلدىردى: پەرۋ، جۇڭگو ەكى ەل حالقىنىڭ دوستىعى تەرەڭ. پەرۋ ءبىر جۇڭگو پرينسيبىنە تاباندى بولىپ، ءتوراعا شي جينپيڭ العا قويعان جەلىلەس دۇنيە جۇزىلىك باستامالاردى جوعارى باعالايدى ءارى قولدايدى. ”ءبىر بەلدەۋ، ءبىر جولدى“ بىرگە قۇرۋ قاتىستى ەلدەر حالقىنا باقىت اكەلدى. چيانكاي پورتى پەرۋدىڭ دامۋىن جەبەۋدە ستراتەگيالىق مانگە يە. پەرۋ جۇڭگو جاقپەن ەكونوميكا ـ ساۋدا، قارجى قوسۋ، ەلەكتر، نەگىزدىك قۇرىلعى، گۋمانيتارلىق سياقتى سالالارداعى ءوزارا ءتيىمدى سەلبەستىكتى كۇشەيتۋدى قالايدى. پەرۋ پارلامەنتىندەگى ءارقايسى پارتيا - توپتار پەرۋ - جۇڭگو قارىم - قاتىناسىن تەرەڭدەتۋدى ءبىر اۋىزدان قولداۋدا، جۇڭگو مەملەكەتتىك حالىق قۇرىلتايىمەن دوستىق بارىس - كەلىستى كۇشەيتىپ، زاڭ شىعارۋ تاجىريبەلەرىن اۋىستىرىپ، ءوزارا ۇلگى الىپ، ەكى جاقتى قارىم - قاتىناستىڭ دامۋىن جەبەۋگە زاڭ شىعارۋ قۇرىلىمدارىنىڭ ۇلەسىن قوسۋدى قالايمىز.

ۋ ۋەيحۋا كەڭەسكە قاتىناستى.

كەلۋ قاينارى: حالىق تورابى