ۋاقىتپەن جارىسىپ، بار كۇشپەن قاتەردەن اراشالاۋ، قۇتقارۋ ىستەرىن ورىستەتتى

1 - ايدىڭ 7 - كۇنى ساعات 9 دان 5 مينۋت وتكەندە شيزاڭنىڭ رىكازى قالاسى ديڭرى اۋدانىندا 6.8 بال جەر سىلكىندى. جەر سىلكىنگەننەن كەيىن باس شۋجي شي جينپيڭ ايرىقشا نازار اۋدارىپ ءارى ماڭىزدى نۇسقاۋ بەرىپ، ”ادامداردى ىزدەۋ - قۇتقارۋدى بار كۇشپەن ورىستەتىپ، جارالانعانداردى بار كۇشپەن قۇتقارۋ، ەمدەۋ كەرەك“، ”اپاتقا ۇشىراعان بۇقارانى ۇيلەسىمدى ورنالاستىرىپ، سوڭعى جۇمىس سياقتىلاردى جاقسى ىستەۋ كەرەك“، ”بۇقارانىڭ نەگىزگى تۇرمىسىن ويداعىداي ورنالاستىرىپ، قىستان حاۋىپسىز، جىلى وتۋىنە كەپىلدىك ەتۋ كەرەك“ دەپ باسا دارىپتەدى.

باس شۋجي شي جينپيڭنىڭ ماڭىزدى نۇسقاۋىنىڭ رۋحىن باتىل دايەكتىلەندىرىپ، تياناقتاندىرعان ءبىرىنشى شەپتەگى قۇتقارۋ - كومەكتەسۋ قىزمەتكەرلەرى نەگىزگى ساتى پارتيا ۇيىمىنىڭ جاۋىنگەر قورعاندىق رولى مەن قالىڭ پارتيا مۇشەلەرىنىڭ وزىق ۇلگىلىك رولىن ساۋلەلەندىرىپ، جەر سىلكىنىسىنە قارسى اتتانىپ، اپاتتان قۇتقارۋ ۇلى رۋحىن بارىنشا اسقاقتاتىپ، ۋاقىتتى ۇتا ادامداردى ىزدەستىرىپ، قۇتقارۋدى ورىستەتىپ، جارالانعانداردى بار كۇشپەن قۇتقارىپ، ەمدەپ، اپاتقا ۇشىراعان بۇقارانى ۇيلەسىمدى كوشىرىپ ورنالاستىردى؛ قاتىستى تاراۋلار حالىقتى بارىنەن جوعارى قويۋعا، ءومىردى بارىنەن جوعارى قويۋعا تاباندى بولىپ، جەر سىلكىنىسىنە قارسى اتتانىپ، اپاتتان قۇتقارۋدىڭ ءتۇرلى قىزمەتتەرىن شۇعىل، ءتارتىپتى ورىستەتىپ، قاتەردەن اراشالاۋ، قۇتقارۋ زاتتىق ماتەريالدارىن دەر كەزىندە جەتكىزىپ، حالىق بۇقاراسىنىڭ ءومىرى مەن مال - مۇلكىنىڭ حاۋىپسىزدىگىن شىنايى قامتاماسىز ەتتى.

حالىقتى، ءومىردى بارىنەن جوعارى قويۋعا تاباندى بولدى

جەر سىلكىنگەننەن كەيىن كوپ ءتۇرلى قۇتقارۋ كۇشتەرى اپات تۋىلعان رايونعا سۋىت بارىپ، قاتەردەن اراشالاۋ، قۇتقارۋ قىزمەتىن ورىستەتتى، كوپتەگەن تاراۋ شۇعىل جاعدايعا توتەپ بەرۋ ۇندەۋىن دەرەۋ ىسكە قوستى.

مەملەكەتتىك كەڭەستىڭ جەر سىلكىنىسىنە قارسى اتتانىپ، اپاتتان قۇتقارۋعا قولباسشىلىق ەتۋ شتابى كەڭسەسى، شۇعىل جاعدايعا توتەپ بەرۋدى باسقارۋ مينيسترلىگى مەملەكەتتىڭ جەر سىلكىنىسىنە شۇعىل توتەپ بەرۋ ۇندەۋىن 3 - دارەجەدەن 2 - دارەجەگە كوتەردى، مەملەكەتتىك اپاتتان ساقتانۋ، اپات زيانىن ازايتۋ، اپاتتان قۇتقارۋ كوميتەتى مەملەكەتتىڭ اپاتتان قۇتقارۋعا شۇعىل ءۇن قوسۋ دارەجەسىن 2 - دارەجەگە كوتەردى. اپاتقا ۇشىراعان رايونعا ورتالىقتىڭ اپاتتان قۇتقارۋ زاتتارىنان 22 مىڭ داناسىن جوتكەۋ نەگىزىندە، مەملەكەتتىك اپاتتان ساقتانۋ، اپات زيانىن ازايتۋ، اپاتتان قۇتقارۋ كوميتەتى كەڭسەسى، شۇعىل جاعدايعا توتەپ بەرۋدى باسقارۋ مينيسترلىگى شۇعىل جاعدايعا توتەپ بەرۋ زاتتىق ماتەريالدارىن ۇكىمەت پەن قوعامدىق ۇيىمدار سەلبەسىپ قامتاماسىز ەتۋ مەحانيزمىن شۇعىل ىسكە قوسىپ، اپاتقا ۇشىراعان رايونعا كومەككە بەرىلەتىن پەش، ەلەكترلى ءاديال سياقتى 130 مىڭنان استام اپاتتان قۇتقارۋ زاتىن دايىنداپ، اپاتقا ۇشىراعان بۇقارانىڭ قىستان امان - ەسەن، جىلى وتۋىنە بار كۇشپەن كەپىلدىك ەتتى. 1 - ايدىڭ 7 -كۇنى ساعات 22 مولشەرىندە العاشقى توپتاعى 5800 دەن استام شاتىر، ماقتا كيىم - كەشەك سياقتى ورتالىقتىڭ اپاتتان قۇتقارۋ بۇيىمدارى اپات تۋىلعان رايونعا جەتكىزىلدى.

1 - ايدىڭ 7 - كۇنى مەملەكەتتىك دامۋ جانە رەفورما كوميتەتى ورتالىقتىڭ مەجە ەسەبى ىشىندە 100 ميلليون يۋان قارجى بوساتتى، قازىنا مينيسترلىگى، شۇعىل جاعدايعا توتەپ بەرۋدى باسقارۋ مينيسترلىگى ورتالىقتىڭ جاراتىلىستىق اپاتتان قۇتقارۋ قارجىسىنان 100 ميلليون يۋاندى شۇعىل بوساتىپ، اپات تۋىلعان رايوننىڭ جەر سىلكىنىسىنە قارسى اتتانىپ، اپاتتان قۇتقارۋ قىزمەتىن ويداعىداي ىستەۋىنە قولداۋ كورسەتتى.

حالىقتى بارىنەن جوعارى قويۋعا، ءومىردى بارىنەن جوعارى قويۋعا تاباندى بولىپ، مەيىر - شاپاعات جەتكىزۋ اپات ەڭ قاتەرلى جەرلەرگە شوعىرلانىپ، كۇش - قۋات اپاتقا ۇشىراعان بۇقارانىڭ جانىنا شوعىرلاندى. ءار جاقتىڭ كاسىپتىك كۇشتەرى ۇستىرتتەگى سۋىق سياقتى ءتيىمسىز ىقپالداردى كۇش سالا جەڭىپ، قامالىپ قالعانداردى بار كۇشپەن ىزدەستىردى.

ازاتتىق ارميا مەن قارۋلى ساقشى بولىمدەرىنىڭ كوپتەگەن كۇشتەرى جەر سىلكىنىسى اپاتى تۋىلعان رايونعا بارىپ قۇتقارۋ قىزمەتىن ورىستەتتى. باتىس بولىك سوعىس رايونى جوبا بويىنشا شۇعىل جاعدايعا توتەپ بەرۋ، قۇتقارۋ مەحانيزمىن ىسكە قوسىپ، جەر سىلكىنىسى تۋىلعان ءوڭىردىڭ ماڭىنداعى اسكەري كۇش، ەمدەۋ، قاتىناس، اۋا رايى سياقتى جاعدايلارعا نەگىزدەلىپ، قۇتقارۋ كۇشتەرىن جىبەردى. قازىر سوعىس رايونى العا قولباسشىلىق ورنىنىڭ قىزمەتكەرلەرى تاسىمال - 20 ۇشاعىنا وتىرىپ اپات تۋىلعان رايونعا باردى.

1 - ايدىڭ 7 - كۇنى ساعات 21 گە دەيىن شيزاڭ اسكەري رايونى ءبىرىنشى توپتاعى 750 نەشە ادامدىق اسكەري كۇشتى ديڭرى اۋدانى جاڭسو اۋىلىنا بارىپ قۇتقارۋ - كومەك بەرۋگە اتتاندىردى، 3 ەمدەۋ اترەتىنەن 70 نەشە ەمدەۋ قىزمەتكەرىن اپاتتان قۇتقارۋدىڭ ءبىرىنشى شەبىنە اتتاندىردى. رىكازى باعىتىندا 143 شاتىر، 49 جىلىتۋ جابدىعى جينالدى. 1 - ايدىڭ 7 - كۇنى ساعات 15 تەن 30 مينۋت وتكەنگە دەيىن قارۋلى ساقشى شيزاڭ باس اترەتى 595 كوماندير - جاۋىنگەردى قۇتقارۋ ارەكەتىنە قاتىناستىرىپ، اپاتقا ۇشىراعان بۇقارادان 120 نەشە ادامدى كوشىرىپ، باسىلىپ قالعان بۇقارادان 32 ادامدى قۇتقارىپ شىعارىپ، 12 ادامدى ەمدەدى.

قازىرگە دەيىن مەملەكەتتىڭ ءورت ءسوندىرۋ، ورتتەن ساقتانۋ امبەباپ قۇتقارۋ - كومەكتەسۋ قوسىنى 1500 ادامدى قۇتقارۋ - كومەكتەسۋگە قاتىناستىردى، ولاردىڭ ىشىندە 300 ادام سىلكىنىس ورتالىعى وڭىرىنە جەتىپ، اپات ءبىرشاما اۋىر بولعان اۋىل - قالاشىقتا قامالىپ قالعان 26 ادامدى قۇتقارىپ، بۇقارادان 660 نەشە ادامدى باسقا جەرگە جوتكەدى. مەملەكەتتىك دەنساۋلىق ساقتاۋ، سالاماتتىق كوميتەتى بەيجيڭ شيەحى شيپاحاناسىنىڭ، سىچۋان داشۋەسى حۋاشي شيپاحاناسىنىڭ مەملەكەتتىك شۇعىل مەديتسينالىق قۇتقارۋ اترەتى ماماندارىن جەر سىلكىنىسى اپاتى تۋىلعان رايونعا شۇعىل جىبەردى.

قوعام حاۋىپسىزدىگى مينيسترلىگى شۇعىل جاعدايعا توتەپ بەرۋ مەحانيزمىن ىسكە قوسىپ، شيزاڭ قوعام حاۋىپسىزدىگى ورگانىن جۇمىلدىرىپ قاتەردەن اراشالاۋ، قۇتقارۋ - كومەكتەسۋ، قاتىناسقا جول كورسەتۋ، اماندىقتى قورعاۋ سياقتى قىزمەتتەردى كۇش سالا ورىستەتىپ، قوعامدىق جالپى جاعدايدىڭ ورنىقتىلىعىن قورعادى. 1 -ايدىڭ 7 - كۇنى تۇسكە دەيىن رىكازى قالاسىنىڭ، ديڭرى اۋدانىنىڭ جانە توڭىرەكتەگى اۋدان، رايونداردىڭ قوعام حاۋىپسىزدىگى ورگاندارى ىلگەرىندى - كەيىندى 3 توپتا 460 تان استام ساقشى كۇشىن ناق مايدانعا بارىپ قۇتقارۋ قىزمەتىن ورىستەتۋگە جىبەردى، قوعام حاۋىپسىزدىگى قاتىناس باسقارۋ تاراۋلارى جول قاتىناسىن باسقارۋ ەسكەرتۋىن دەر كەزىندە جاريالاپ، قۇتقارۋ كۇشتەرىنىڭ اپات تۋىلعان رايونعا ءساتتى جەتۋىنە كەپىلدىك ەتتى. شيزاڭ شەكارادان كىرۋ - شىعۋ شەكارا قورعانىس تەكسەرۋ باس پۋنكتى 1 - توپتاعى 200 دەن استام ادامنان ۇيىمداسقان شۇعىل قۇتقارۋ كۇشتەرىن ۇيىمداستىرىپ، اپات تۋىلعان رايونعا اتتاندىردى. 1 - ايدىڭ 7 ـ كۇنى ساعات 15 تەن 30 مينۋت وتكەنگە دەيىن قۇتقارۋعا قاتىناسقان كوشپەندىلەردى باسقارۋ ساقشىلارى قامالىپ قالعان بۇقارادان 21 ادامدى قۇتقارىپ، اپاتقا ۇشىراعان 600 دەن استام تۇرعىندى حاۋىپسىز جوتكەپ، 116 حاۋىپسىزدىك كومەسكى قاتەرىن تەكسەردى.

جەر سىلكىنگەننەن كەيىن قاتىستى تاراۋلار بۇلىنگەن ەلەكتر، حابارلاسۋ، قاتىناس، جىلۋمەن قامداۋ سياقتى نەگىزدىك قۇرىلعىلاردى شۇعىل جوندەۋگە ۇيىمداستىرىپ، بۇقارانىڭ نەگىزگى تۇرمىسىن ويداعىداي ورنالاستىرۋعا كومەكتەسىپ، قىستان حاۋىپسىز، جىلى وتۋىنە شىنايى كەپىلدىك ەتتى.

ونەركاسىپ جانە ينفورماتسيالاندىرۋ مينيسترلىگى ينفورماتسيا، حابارلاسۋ سالاسىن ۇيىمداستىرىپ، حابارلاسۋ نەگىزدىك قۇرىلعىلارىن شۇعىل جوندەدى، اپات تۋىلعان رايونعا قىزمەت گرۋپپاسىن جىبەرىپ، شۇعىل جاعدايعا توتەپ بەرۋ، حابارلاسۋدى قامتاماسىزداندىرۋ قىزمەتىن سايكەستىردى. قاتىناس - تاسىمال مينيسترلىگى 3 - دارەجەلى شۇعىل جاعدايعا توتەپ بەرۋ ۇندەۋىن ىسكە قوستى، 1 - ايدىڭ 7 - كۇنى ساعات 18 گە دەيىن بارلىق بۇلىنگەن جول بولىكتەرى شۇعىل جوندەلىپ، تۇتاستىرىلدى.

جاراتىلىستىق بايلىق مينيسترلىگى گەولوگيالىق اپاتتان ساقتانۋدىڭ Ⅳ دارەجەلى ۇندەۋىن ىسكە قوسىپ، مامانداردى اپات تۋىلعان وڭىرگە جىبەرىپ، جەرگىلىكتى ورىننىڭ قۇتقارۋ - كومەكتەسۋگە تەحنيكالىق جاقتان تىرەك بولۋ سياقتى قىزمەتتەردى ويداعىداي ىستەۋىنە كومەكتەستى. تۇرعىن ءۇي، قالا - اۋىل قۇرىلىسى مينيسترلىگى جەر سىلكىنىسىنە شۇعىل توتەپ بەرۋدىڭ 2 - دارەجەلى ۇندەۋىن ىسكە قوستى ءارى قىزمەت گرۋپپاسىن اپات تۋىلعان رايونعا جىبەرىپ، سىلكىنىستەن كەيىنگى ءۇي قۇرىلىسى مەن قالا ىستەرى قۇرىلعىلارىن حاۋىپتەن اراشالاۋ، شۇعىل جوندەۋ سياقتى قىزمەتتەرگە جەتەكشىلىك ەتتى.

سۋ يگىلىگى مينيسترلىگى سۋ يگىلىگىنىڭ 4 - دارەجەلى شۇعىل جاعدايعا توتەپ بەرۋ ۇندەۋىن ىسكە قوسىپ، جەر سىلكىنگەن وڭىردەگى سۋ يگىلىگى ينجەنەرياسى مەن قوسالقى اپاتتارعا قالتارىس قالدىرماۋ فورماسىندا تەكسەرۋ جۇرگىزدى، 1 - ايدىڭ 7 - كۇنى ساعات 10 نان 43 مينۋت وتكەن ۋاقىتتاعى جاساندى سەرىك ارقىلى تالداۋ جاساۋعا قاراعاندا، سىلكىنىس ورتالىعىنىڭ ماڭىنداعى وزەندەردە بوگەت كول، توسپانىڭ ورىلۋى سياقتى قاتەرلى جاعدايلار بايقالماعان. جۇڭگو اۋا رايى مەكەمەسى جەر سىلكىنىسى اپاتىنا بايلانىستى اۋا رايى جاعىنان قىزمەت وتەۋدىڭ 3 - دارەجەلى شۇعىل جاعدايعا توتەپ بەرۋ ۇندەۋىن 2 - دارەجەگە كوتەرىپ، اپاتقا ۇشىراعان بۇقاراعا سۋىقتان ساقتانىپ، جىلۋ ساقتاۋ جانە بوراننان ساقتانۋعا كوڭىل ءبولۋ كەرەكتىگىن ەسكەرتتى.

كادرلار مەن بۇقارا ءبىر نيەتپەن ىنتىماقتاسىپ، قيىنشىلىقتاردى تىزە قوسا جەڭدى

جەر سىلكىنگەننەن كەيىن شۇعىل جاعدايعا توتەپ بەرۋ قولباسشىلىق شتابى جەر سىلكىنىسىنە شۇعىل توتەپ بەرۋ ۇندەۋىن ءبىرىنشى دارەجەگە كوتەردى. شيزاڭ اۆتونوميالى رايونىنداعى نەگىزگى جاۋاپتى جولداستار قىزمەت گرۋپپاسىىن باستاپ اپات رايونىنا بارىپ، كۇش ۇيىمداستىرىپ قۇتقارۋ ىستەرىن ورىستەتتى. اپاتقا ۇشىراعان وڭىرلەردەگى پارتيالى كادرلار اتويلاپ الدا ءجۇردى، ءار ۇلت بۇقاراسى ءبىر نيەتپەن ىنتىماقتاسىپ، شۇعىل جاعدايعا توتەپ بەرۋ، قاتەردەن اراشالاۋ، قۇتقارۋ قىزمەتىن بار كۇشپەن ويداعىداي ىستەپ، اپاتقا ۇشىراعان بۇقارانى ۇيلەسىمدى ورنالاستىرىپ، جوتكەپ ورنالاستىرىلعان بۇقارانىڭ قالىڭ كيىم، ىستىق تاماق، تازا سۋى، حاۋىپسىز، جىلى ۋاقىتتىق تۇراعى بولۋىنا كەپىلدىك ەتتى.

شيزاڭ اۆتونوميالى رايونى ءار دارەجەلى شۇعىل قۇتقارۋ، ءورت ءسوندىرۋ، ورتتەن ساقتانۋ قۇتقارۋ - كومەك بەرۋ، ورماندا ءورت ءسوندىرۋ، ورتتەن ساقتانۋ، قوعام حاۋىپسىزدىگى كادر - ساقشىلارى، سونداي - اق قوعامدىق شۇعىل جاعدايعا توتەپ بەرۋ، قۇتقارۋ - كومەك بەرۋ كۇشتەرىنەن 12 مىڭنان استام ادامدى جۇمىلدىرىپ، ادامداردى ىزدەۋ - قۇتقارۋ قىزمەتىن بار كۇشپەن ورىستەتىپ، قامالىپ قالعان بۇقارادان 407 ادامدى قۇتقارىپ، 14 ورنالاستىرۋ ورنىن قۇرىپ، اپاتقا ۇشىراعان بۇقارادان 30 مىڭ 400 دەن استام ادامدى باسقا جەرگە كوشىرىپ ورنالاستىردى. اۆتونوميالى رايون، قالا، اۋدان 3 دارەجەلى ورىندار جالپى 568 ادامنان قۇرالعان 24 ەمدەۋ - قۇتقارۋ قوسىنىن، 106 قۇتقارۋ اۆتوموبيلىن جىبەرىپ، وتكەرمەلەپ تاسىمالداۋ، قۇتقارۋ - ەمدەۋ قىزمەتىن ورىستەتتى، جارالانعاندار تۇگەلدەي ەم قابىلدادى. اپات تۋىلعان وڭىرگە شۇعىل قاجەت بولعان شاتىر، ماقتا شاپان (سۋىقتان قورعانۋ كيىمى)، ىسىتقىش سياقتى زاتتىق بۇيىمداردان 170 مىڭى اپات تۋىلعان رايونعا شۇعىل جەتكىزىلىپ، اپاتقا ۇشىراعان بۇقارانىڭ نەگىزگى تۇرمىسىنا بار كۇشپەن كەپىلدىك ەتىلدى.

قازىر ديڭرى اۋدانىنىڭ سوگو، جاڭسو، چۇيلو اۋىلدارىنىڭ جىلجىمالى سيگنالى تۇگەلدەي جوندەلىپ، ىسكە قوسىلدى؛ ديڭرى اۋدانىنىڭ اۋدان ورتالىعىندا جانە شەگىر قالاشىعى، گاڭگا قالاشىعى، گاسو اۋىلى، رۇڭشيا اۋىلى، كىما اۋىلى ەلەكترمەن قامداۋدى قالپىنا كەلتىردى، ديڭري الاڭى، جاڭسو اۋىلى جانە شياگو اۋىلى سياقتى 6 ورنالاستىرۋ ءتۇيىنىن ەلەكترمەن قامداۋ قىزمەتى تارتىپپەن ورىستەتىلۋدە.

شيزاڭ اۆتونوميالى رايوندىق حالىق شيپاحاناسى 43 ەمدەۋ قىزمەتكەرىن اپات تۋىلعان وڭىرگە جىبەردى، اپات تۋىلعان وڭىردەگى قاتىستى شيپاحانالار جارالىلاردى قۇتقارۋ - ەمدەۋدىڭ جاسىل ارناسىن اشىپ، توسەك جەتكىلىكتى بولدى، جارالىلاردى قۇتقارۋ - كومەكتەسۋ جانە ەمدەۋ - قۇتقارۋ، سونداي - اق الەۋمەتتىك دەنساۋلىق ساقتاۋ سياقتى قىزمەتتەر تارتىپپەن جۇرگىزىلۋدە. شيزاڭ اسكەر رايونى باس شيپاحاناسى 50 مامان جانە 12 قۇتقارۋ اۆتوموبيلىنەن ۇيىمداسقان قۇتقارۋ اترەتىن اپات رايونىنا جىبەرىپ، قۇتقارۋ قىزمەتىن بار كۇشپەن ويداعىداي ىستەدى.

ءبىر جاق قيىنشىلىققا ۇشىراعاندا جان - جاقتان كومەكتەسىپ، اپاتتان قۇتقارۋدىڭ ءبىرىنشى شەبىن مەيىرگە بولەدى

ءبىر جاق قيىنشىلىققا ۇشىراعاندا، جان - جاقتان كومەك قولى سوزىلدى. جەر سىلكىنىسى اپاتى بۇكىل ەل حالقىنىڭ تىلەكتەستىگىن قوزعادى. بۇكىل ەلدىڭ جەر - جەرىندەگى كوپ جاقتى كۇشتەر بەلسەندىلىكپەن كومەك بەرىپ، اپاتتان قۇتقارۋ الدىڭعى شەبىنە جەدەل اتتانىپ، اپاتقا ۇشىراعان بۇقارانىڭ قىيىن وتكەلدەن وتۋىنە كومەك بەردى.

سىچۋان ولكەلىك جەر سىلكىنىسى مەكەمەسى شيزاڭنىڭ لينجى قالاسىندا قىزمەت ىستەپ جاتقان 3 ماماندى سول جەردىڭ وزىندە ءبىرىنشى توپتاعى كومەك كۇشى بولۋعا جۇمىلدىرىپ، جەر سىلكىنىسى ورتالىعىنا دەرەۋ جىبەردى، سونىمەن بىرگە، 8 ماماندى جىبەرىپ، ەكىنشى توپتاعى كومەك كۇشىن ۇيىمداستىردى، ولار سول كۇنى شيزاڭعا شۇعىل بارىپ، جەر سىلكىنىسى اپاتىنا توتەپ بەرۋ، شۇعىل ءبىر جاقتى ەتۋ قىزمەتىنە كومەكتەستى.

شۇعىل جاعدايعا توتەپ بەرۋدى باسقارۋ مينيسترلىگىنىڭ جاراتىلىستىق اپاتتان قۇتقارۋ ينجەنەرياسى چىڭدۋ بازاسى (جۇڭگو اننىڭ چىڭدۋ بازاسى) 50 ادام - رەت كاسىپتىك قۇتقارۋ - كومەكتەسۋ قىزمەتكەرلەرىن شۇعىل شىعارىپ، جان يەلەرىن بارلاۋ اسپابى، لازەر نۇرلى جىلجۋ رادارى، 5G تورى ارقىلى دىبىس - كەسكىن جەتكىزۋ جابدىعى، الىپ جۇرۋگە قولايلى درون سياقتى قۇتقارۋ - تەكسەرۋ جابدىقتارىن الىپ ۇشاق، پويەز سياقتى قاتىناس قۇرالدارىنا وتىرىپ اپاتقا ۇشىراعان ناق مايدانعا شۇعىل اتتاندى.

قۇتقارۋ قىزمەتكەرلەرى جەدەل جينالىپ، قۇتقارۋ بۇيىمدارى كۇندىز - ءتۇنى كەلىپ جاتتى. جۇڭگو قىزىل كرەست باس قوعامى شۇعىل جاعدايعا توتەپ بەرۋگە ءۇن قوسىپ، ماقتا شاتىر، كورپە، جىلۋ ساقتايتىن شەنەل، بۇكتەمەلى توسەك 4600 دانا (پار) اپاتتان قۇتقارۋ بۇيىمىن شۇعىل جوتكەپ، اپاتقا ۇشىراعان رايونداعى بۇقارانى كوشىرىپ ورنالاستىرۋ جانە تۇرمىسىن قامتاماسىزداندىرۋ قىزمەتىن ويداعىداي ىستەۋگە قولداۋ كورسەتتى، سونىمەن بىرگە، قىزمەت گرۋپپاسىن جانە قۇتقارۋ اترەتى مۇشەلەرىن جەر سىلكىنگەن رايونعا جىبەرىپ، قۇتقارۋ، كومەك بەرۋ قىزمەتىن ورىستەتتى. اۋمىن قىزىل كرەست قوعامى اپاتتان قۇتقارۋ قورىنان 200 مىڭ يۇان حالىق اقشاسىن شيزاڭداعى اپات تۋىلعان رايونعا جىبەرىپ، شۇعىل قۇتقارۋ قىزمەتىن قولدادى.

مەملەكەتتىك ايەلدەر بىرلەستىگىنە قاراستى جۇڭگو بالالار - ورەندەر قور قوعامى مەن جۇڭگو ايەلدەر دامۋ قور قوعامى 13 ميلليون 749 مىڭ يۋان شۇعىل قارجى توپتاپ، اپات تۋىلعان رايونداعى ايەلدەر مەن بالالاردىڭ جانە وتباسىلاردىڭ قىستان جىلى وتۋىنە قولداۋ كورسەتتى.

ورتالىق كاسىپورىندارى دەرەۋ ءۇن قوسىپ، شۇعىل جاعدايعا توتەپ بەرۋ جوباسىن اتقارىپ، اپاتقا ۇشىراعان رايونداعى بۇقارانىڭ قىستان جىلى ءوتۋىن قامتاماسىزداندىردى. جۇڭگو مۇنايى جەلى بويىنداعى ماي قۇيۋ پۋنكتتەرىندە كورنەكتى بەلگى ورناتىپ، ارناۋلى جاسىل ارنا اشىپ، قاتەردەن اراشالاپ، اپاتتان قۇتقارۋ اۆتوموبيلدەرىنە الدىمەن ماي قۇيدى، جەلى بويىنداعى جانە جەر سىلكىنگەن وڭىردەگى ماي قۇيۋ پۋنكتتەرىنىڭ ماي قۇيۋ ونىمدەرىنىڭ قورى جەتكىلىكتى، قامداۋى ورنىقتى بولدى. مەملەكەتتىك ەلەكتر تورابى 141 ادامنان قۇرالعان 6 شۇعىل جاعدايعا توتەپ بەرۋ قوسىنىن ۇيىمداستىرىپ، 40 شۇعىل جوندەۋ اۆتوموبيلى، 17 ەلەكترگە كەپىلدىك ەتۋ جابدىعىن ناق مايدانعا جىبەرىپ، شۇعىل جاعدايعا توتەپ بەرۋ قىزمەتىن ورىستەتتى. جۇڭگو جىلجىمالى حابارلاسۋى شيزاڭ سەرىكتەستىگى جيىنى 57 قامتاماسىزداندىرۋ قىزمەتكەرىن جۇمىلدىرىپ، 113 بازالىق پۋنكتتى قالپىنا كەلتىردى، قالعان بازالىق پۋنكتتەردى ىسكە قوسۋ جۇمىسى بار كۇشپەن ىستەلۋدە. جۇڭگو قاتىناس توبىنا قاراستى ەرىكتى قىزمەت وتەۋ اترەتى شۇعىل جاعدايعا توتەپ بەرۋ، اپاتتان قۇتقارۋ بۇيىمدارىن ساتىپ الىپ، ارناۋلى اۆتوكولىكپەن اپاتتان قۇتقارۋ تۇيىنىنە جەتكىزىپ بەردى، سونىمەن بىرگە، سۋىقتان ساقتانۋ بۇيىمدارىن دايىنداپ، بۇقارانىڭ قىستان جىلى وتۋىنە كومەكتەستى.

(«حالىق گازەتىنىڭ» تىلشىلەرى يۋان چۋان، ياڭ شوبي، چيۇڭداجوگا، سۇڭ حاۋشين، ليۋ ۋىنشين، ليۋ جىچياڭ، چۇي جىحان، جين جىڭبو، لي لۇڭ - ي، جاڭ تيانپەي، چي يۇيكۇن، باي جيانفىڭ، ۋاڭ جىڭ، ۋاڭ يۇنشان، حان شين، چاڭ چين، ديڭ ي - تيڭ، لي شياۋچيڭ، لي حۇڭمەي، شىن شاۋتيە، فۋ زىمەي، ياڭ حاۋ جانە حالىق تورىنىڭ تىلشىلەرى ۋ يۇيرىن، حاۋ جيە، ەرىكتى ءتىلشى ياڭ شياۋبولاردىڭ جيناق حابارى)

كەلۋ قاينارى: حالىق تورابى