شيزاڭنىڭ ديڭرى اۋدانىنداعى جەر سىلكىنىسىنە قارسى اتتانىپ، اپاتتان قۇتقارۋ قىزمەتىن اقىلداستى، ورنالاستىردى

شينحۋا اگەنتتىگى، 1 - ايدىڭ 9 - كۇنى، بەيجيڭ. جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى كوميتەتى 1 - ايدىڭ 9 - كۇنى ءماجىلىس اشىپ، شيزاڭنىڭ ديڭرى اۋدانىنداعى جەر سىلكىنىسىنە قارسى اتتانىپ، اپاتتان قۇتقارۋ قىزمەتىن اقىلداستى، ورنالاستىردى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى شي جينپيڭ ءماجىلىستى باسقاردى ءارى ماڭىزدى ءسوز سويلەدى.

ءماجىلىس بىلاي دەپ اتاپ كورسەتتى: شيزاڭنىڭ ديڭرى اۋدانىندا 6.8 بال جەر سىلكىنىسى تۋىلعاننان بەرى شي جينپيڭ جولداستى ۇيىتقى ەتكەن پارتيا ورتالىق كوميتەتىنىڭ پارمەندى باسشىلىعىندا، قاتىستى جەرلەر مەن تاراۋلاردىڭ اڭىسى تەز، ۇيىمداستىرۋى پارمەندى بولىپ، قالىڭ پارتيا مۇشەلەرى، كادرلار، بۇقارا ىنتىماقتاسا كۇرەس جۇرگىزدى، اسىرەسە، مەملەكەتتىك امبەباپ ءورت ءسوندىرۋ، ورتتەن ساقتانۋ، قۇتقارۋ - كومەكتەسۋ قوسىنى، ازاتتىق ارميا، قارۋلى ساقشى بولىمدەرى جانە ورتالىق كاسىپورىندارى سياقتى قۇتقارۋ - كومەكتەسۋ كۇشتەرى ءۇستىرتتى، سۋىق بولۋ، وتتەگى جەتپەۋ قيىنشىلىعىن جەڭىپ، ۋاقىتتى ۇتىپ، قامالىپ قالعانداردى ىزدەپ، قۇتقارىپ، ءولىم - ءجىتىمدى ەڭ جوعارى شەكتە ازايتىپ، جەر سىلكىنىسىنە قارسى اتتانىپ، اپاتتان قۇتقارۋ قىزمەتىن جالپى جاقتان ءساتتى جۇرگىزدى.

ءماجىلىس بىلاي دەپ باسا دارىپتەدى: قازىر جەر سىلكىنىسىنە قارسى اتتانىپ، اپاتتان قۇتقارۋ قىزمەتى شەشۋشى كەزەڭدە تۇر، تيتتەي دە بوساڭسۋعا بولمايدى. قىزمەتتەردى ءتىپتى دە ۇقىپتى ىستەپ، جەر سىلكىنىسىنە قارسى اتتانىپ، اپاتتان قۇتقارۋ سىندى قاتاڭ شايقاستىڭ جەڭىسىنە باتىل قول جەتكىزۋ كەرەك. قۇتقارۋ - كومەكتەسۋ، سوڭعى جۇمىستاردى ىڭعايلاستىرۋ قىزمەتىن ۇزدىكسىز ورىستەتۋ كەرەك. ەمدەۋ ماماندارىن بىرلەسىپ دياگنوز قويۋعا ۇيىمداستىرىپ، جارالانعانداردى بار كۇشپەن قۇتقارۋ - ەمدەۋ كەرەك. اپاتقا ۇشىراعان بۇقارانىڭ نەگىزگى تۇرمىسىن دەن قويا، سۇيىسپەنشىلىكپەن قامتاماسىزداندىرىپ، ۋاقىتتىق ورنالاستىرۋ مەن وتپەلى مەزگىلدى ءبىر تۇتاس جوسپارلاپ، اپاتقا ۇشىراعان بۇقارانىڭ قىستان توڭباي وتۋىنە شىنايى كەپىلدىك ەتۋ كەرەك. اپاتتان كەيىنگى قالپىنا كەلتىرۋ، قايتا قۇرۋدى جەدەلدەتىپ، نەگىزدىك قۇرىلعىلاردى جوندەۋ جانە قيراندىنى تازالاۋ قىزمەتىن ويداعىداي ىستەپ، اپات تۋىلعان رايوننىڭ قالىپتى ءوندىرىس، تۇرمىس ءتارتىبىن تەز ارادا قالپىنا كەلتىرۋ كەرەك. قوعام ورنىقتىلىعى قىزمەتىن شىنايى جاقسى ىستەپ، ءتۇرلى قايشىلىقتار مەن داۋ - شاردى دەر كەزىندە تەكسەرىپ شەشىپ، قۇزىرلى ورىنداردىڭ ينفورماتسيا تاراتۋىن ويداعىداي ىستەۋ كەرەك. ءتۇيىندى رايونداعى ۇيلەردىڭ، نەگىزدىك قۇرىلعىلاردىڭ جەر سىلكىنىسىنە توزىمدىلىك قۋاتىن جانە جەر سىلكىنىسى اپاتىنا توتەپ بەرۋ قۋاتىن ونان ارى جوعارىلاتىپ، ءتۇرلى شۇعىل جاعدايعا توتەپ بەرۋ دايىندىعىن ويداعىداي ىستەۋ كەرەك.

ءماجىلىس مىنالاردى تالاپ ەتتى: جەرگىلىكتى پارتكومدار مەن ۇكىمەتتەر ساياسي جاۋاپكەرشىلىكتى شىنايى ارقالاۋى، قاتىستى جاقتار تىعىز سەلبەسۋى، سايكەسۋى، ءار دارەجەلى كادرلار ءبىرىنشى شەپتە تاپجىلماي، بار كۇشىن سالۋى، نەگىزگى ساتى پارتيا ۇيىمدارى مەن قالىڭ پارتيا مۇشەلەرى جاۋىنگەر قامالدىق رولى مەن اتويشى ۇلگىلىك رولىن تولىق ساۋلەلەندىرۋى كەرەك.

ءماجىلىس باسقا ىستەردى دە اقىلداستى.

كەلۋ قاينارى: حالىق تورابى