شي جينپيڭ گرەنادانىڭ زۇڭليى ميچەلمەن كەزدەستى

1 - ايدىڭ 13 - كۇنى تۇستەن بۇرىن مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگوعا رەسمي ساپارمەن كەلگەن گرەنادانىڭ زۇڭليى ميچەلمەن كەزدەستى.

سۋرەتتى شينحۋا اگەنتتىگىنىڭ ءتىلشىسى ديڭ لين تۇسىرگەن

شينحۋا اگەنتتىگى، 1 - ايدىڭ 13 - كۇنى، بەيجيڭ (ءتىلشى ما جويان). مەملەكەت ءتوراعاسى شي جينپيڭ 1 - ايدىڭ 13 - كۇنى تۇستەن بۇرىن بەيجيڭدەگى حالىق سارايىندا جۇڭگوعا رەسمي ساپارمەن كەلگەن گرەنادانىڭ زۇڭليى ميچەلمەن كەزدەستى.

ميچەل شيزاڭ ديڭرىنىڭ جەر سىلكىنىسى اپاتىنا ۇشىراۋىنا بايلانىستى جۇڭگو ۇكىمەتى مەن حالقىنان شىنايى حال سۇرايتىندىعىن ءبىلدىردى. شي جينپيڭ بۇعان العىس ايتىپ، بىلاي دەپ اتاپ كورسەتتى: وسى رەتكى جەر سىلكىنىسى جۇڭگونىڭ باتىس وڭتۇستىگىندەگى تەڭىز دەڭگەيىنەن بيىكتىگى جوعارى وڭىردە تۋىلدى، جۇڭگو جاق قۇتقارۋ - كومەكتەسۋ جانە ۋاقىتتىق ورنالاستىرۋ جۇمىستارىن ەڭ قىسقا ۋاقىت ىشىندە ورىنداپ بولدى، سونداي - اق ەڭ قىسقا ۋاقىت ىشىندە قايتا قۇرۋ قىزمەتىن ورىستەتەدى، جۇڭگو ۇكىمەتىنىڭ جەر سىلكىنىسىنە قارسى اتتانىپ، اپاتتان قۇتقارۋدىڭ جەڭىسىنە قول جەتكىزۋگە سەنىمى دە، قۋاتى دا بار.

شي جينپيڭ بىلاي دەپ اتاپ كورسەتتى: تاياۋ جىلداردان بەرى جۇڭگو - گرەنادا قارىم - قاتىناسى ورنىقتى دامىدى، ەكى جاق ءوزارا قۇرمەت ەتىپ، تەڭ تۇرعىدا مامىلە جاساپ، ساياسي ءوزارا سەنىمدىلىكتى ۇزدىكسىز بەكەمدەدى، ءار سالاداعى ناقتى سەلبەستىكتە سۇبەلى تابىستارعا قول جەتكىزىپ، حالىقتىڭ دوستىعى كۇن سايىن تەرەڭدەدى. جۇڭگو جاق گرەنادا جاقپەن بىرگە ەكى ەلدىڭ دامۋ ستراتەگياسىن ۇشتاستىرۋدى كۇشەيتىپ، جۇڭگو - گرەنادا سەلبەستىگىنىڭ اناعۇرلىم كوپ تابىسقا جەتۋىن ىلگەرىلەتىپ، ەكى ەل حالقىن اناعۇرلىم باقىتقا كەنەلتۋدى قالايدى.

شي جينپيڭ بىلاي دەپ باسا دارىپتەدى: جۇڭگو - گرەنادا قارىم - قاتىناسىن قورعاۋ جانە دامىتۋ جۇڭگو، گرەنادا ەكى ەلدىڭ جانە ەكى ەل حالقىنىڭ ءتۇبىرلى مۇددەسىنە ۇيلەسەدى. ەكى جاق ديپلوماتيالىق قارىم - قاتىناستى قالپىنا كەلتىرگەن 20 جىلدان بەرگى ەكى ەل قارىم - قاتىناسى دامۋىنىڭ تابىستى تاجىريبەلەرىن قورىتىندىلاپ، جۇڭگو - گرەنادا قارىم - قاتىناسىنىڭ ۇزاق ۋاقىت جوعارى دەڭگەيدە دامۋىنا جاڭا جوبا جاساۋى كەرەك. جۇڭگو جاق گرەنادا جاقتىڭ ءوز ەلىنىڭ مەملەكەت جاعدايىنا ۇيلەسەتىن دامۋ جولىن دەربەس قاراستىرۋىن قولدايدى، گرەنادا جاقپەن ەل باسقارۋ تاجىريبەلەرىن اۋىستىرۋدى كۇشەيتىپ، ءار سالاداعى دوستىق بارىس - كەلىستى جيىلەتۋدى قالايدى. جۇڭگونىڭ دامۋى گرەنادانى قامتىعان ءار ەلگە جاڭا دامۋ ورايىن الا كەلەدى، وڭتۇستىك پەن وڭتۇستىك سەلبەستىگى جۇلگەسىندە گرەنادانىڭ ەكونوميكالىق، قوعامدىق دامۋىنا كومەكتەسىپ، جاڭا ەنەرگيا، جاسىل، تومەن كومىرتەكتى، سيفرلى ەكونوميكا سياقتى سالالاردا ەكى ەل سەلبەستىگىنىڭ جاڭا كورىنەۋ ءتۇيىنىن قالىپتاستىرۋدى قالايدى. جۇڭگو جاق گرەنادا جاقتىڭ كليمات وزگەرىسىنە توتەپ بەرۋ جانە اپاتتان ساقتانۋ، اپات زيانىن ازايتۋ قابىلەتىن جوعارىلاتۋىن قولدايدى، حالىقارالىق قوعامنىڭ شاعىن ارال ەلدەرىنىڭ كليمات وزگەرىسى ماسەلەسىندەگى الاڭداۋشىلىعى مەن تالاپ - تىلەگىن ۇزدىكسىز قاناعاتتاندىرۋدى قالايدى. ەكى جاق تاعى ادامداردىڭ بارىس - كەلىسىن جيىلەتىپ، مادەنيەت، وقۋ - اعارتۋ، ساياحات سياقتى سالالارداعى اۋىس - كۇيىستى، سەلبەستىكتى كۇشەيتىپ، حالىق تىلەگىنىڭ توعىسۋىن اناعۇرلىم جەبەۋى كەرەك. جۇڭگو جاق دۇنيە ءجۇزىنىڭ بارابار، ءتارتىپتى كوپ ۇيەكتەنۋىن، ەكونوميكانىڭ جالپىعا ءتيىمدى، سيىسىمدى جاھاندانۋىن دارىپتەيدى، گرەنادا جاقپەن بىرگە دۇنيە جۇزىلىك دامۋ باستاماسىن، دۇنيە جۇزىلىك حاۋىپسىزدىك باستاماسىن، دۇنيە جۇزىلىك وركەنيەت باستاماسىن تياناقتاندىرىپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋدى قالايدى.

شي جينپيڭ بىلاي دەپ اتاپ كورسەتتى: جۇڭگو كارايب ەلدەرىمەن قارىم - قاتىناسقا باستان - اياق ايرىقشا ءمان بەرىپ كەلەدى، وسى وڭىردەگى مەملەكەتتەردىڭ ەكونوميكاسىنىڭ، قوعامىنىڭ دامۋىنا قولىنان كەلگەنىنشە ۇزدىكسىز كومەك كورسەتىپ، ەكى جاقتىڭ جان - جاقتى سەلبەستىك سەرىكتەستىك قارىم - قاتىناسىن تەرەڭدەتۋدى قالايدى.

ميچەل جۇڭگو جاقتىڭ بىلتىر 7 – ايدا گرەنادا ەرەكشە كۇشتى سۇراپىل داۋىلعا تاپ بولعاننان كەيىن دەر كەزىندە كومەك كورسەتكەنىنە العىس ايتتى. ميچەل مىنالاردى ءبىلدىردى: گرەنادا - جۇڭگو قارىم - قاتىناسى وتكەن 20 جىلدان بەرى ۇزدىكسىز تەرەڭدەدى. گرەنادا جاق ءبىر جۇڭگو پرينسيبىنە تاباندى بولادى، جۇڭگونىڭ يەلىك ۇقىعى مەن تەرريتوريا تۇتاستىعىنا، ءسوز جوق، قۇرمەت ەتىلەدى. گرەنادا جاق گرەنادا - جۇڭگو قارىم – قاتىناسىنان كوپتەگەن يگىلىككە، تيىمدىلىككە كەنەلدى، جۇڭگومەن سەلبەستىكتى ۇزدىكسىز كۇشەيتۋدى ءۇمىت ەتەدى. جۇڭگو كوممۋنيستىك پارتياسى حالىقتى وزەك ەتكەن دامۋ ۇستانىمىنا تاباندى بولىپ، جۇڭگوعا باسشىلىق ەتىپ، ۇلى دامۋ جەتىستىكتەرىنە قول جەتكىزىپ، وركەندەپ كەلە جاتقان ەلدەرگە ۇلگى ورناتتى، گرەنادا جاق جۇڭگودان ەل باسقارۋ تاجىريبەلەرىن ۇيرەنۋدى قالايدى. جۇڭگو − دۇنيە جۇزىندەگى وڭتۇستىك جاقتىڭ باستاۋشىسى، ۇلكەندى - كىشىلى ەلدەردىڭ تەرەزەسى تەڭ بولۋعا باستان - اياق تاباندى بولىپ، ءار ەلدىڭ يەلىك ۇقىعى مەن تەرريتوريا تۇتاستىعىنا قۇرمەت ەتىپ، حالىقارالىق ىستەردە ءسوز - ارەكەتى بىردەي بولىپ، بارعان سايىن ماڭىزدى رول اتقارۋدا. گرەنادا جاق جۇڭگو جاقپەن باتىل بىرگە تۇرىپ، ءۇش ۇلكەن دۇنيە جۇزىلىك باستامانى ويداعىداي تياناقتاندىرىپ، دۇنيە ءجۇزىنىڭ بەيبىتشىلىگىن، ورنىقتىلىعىن قورعاۋدى قالايدى.

ۋاڭ ي كەزدەسۋگە قاتىناستى.

كەلۋ قاينارى: حالىق تورابى